ប្រជាពលរដ្ឋរាប់ពាន់នាក់ ប្រារព្ធទិវាសិទិ្ធមនុស្សអន្តរជាតិនៅទូទាំងប្រទេស
ចេញផ្សាយ ថ្ងៃទី៤ ខែធ្នូ ឆ្នាំ២០១៥; ក្រុមសង្គមស៊ីវិល
.jpg)
ប្រជាពលរដ្ឋកម្ពុជារាប់ពាន់នាក់ យ៉ាងតិចណាស់នៅក្នុង ១៦ រាជធានីនិងខេត្ត នឹងប្រមូលផ្តុំគ្នាដើម្បីប្រារព្ធខួបលើកទី ៦៧ នៃទិវាសិទិ្ធមនុស្សអន្តរជាតិ ដែលនៅក្នុងនោះនឹងមានការប្រមូលផ្តុំគ្នាជាក្រុមធំមួយនៅក្នុងរាជធានីភ្នំពេញ។
ចាប់តាំងពីថ្ងៃទី៦ ខែធ្នូ ក្រុមប្រជាពលរដ្ឋមូលដ្ឋាន សហគមន៍ដែលរងផលប៉ះពាល់ពីជម្លោះដីធ្លី បណ្តាញយុវជន សហជីព សមាគម ព្រះសង្ឃ និងអង្គការមិនមែនរដ្ឋាភិបាលជាច្រើននៅក្នុងប្រទេសកម្ពុជា នឹងធ្វើការប្រារព្ធទិវានេះនៅតាមទីកន្លែងទាំងនោះនៅក្រោមប្រធានបទរួមគឺ “យុត្តិធម៌”។ ក្នុងព្រឹត្តិការណ៍នេះ ក្រុមមិត្ត ១០ធ្នូ បានរៀបចំឲ្យមាននូវវេទិកាសាធារណៈជាច្រើនកន្លែង ដើម្បីពិភាក្សាអំពីបញ្ហាសិទិ្ធមនុស្សដែលកំពុងកើតមាននិងដាក់ញត្តិជូនអាជ្ញាធរក្នុងតំបន់ ល្ខោនស្តីពីសិទិ្ធមនុស្ស និងដើរហែក្បួនក្នុងទីរួមស្រុកនិងទីរួមខេត្ត។
នៅថ្ងៃទី១០ ខែធ្នូ ប្រជាពលរដ្ឋជាង ៣.០០០ នាក់ មកពីរាជធានីភ្នំពេញ និងតាមបណ្តាខេត្តនានា នឹងជួបជុំគ្នាក្នុងរាជធានីភ្នំពេញ មុនពេលធ្វើការដើរហែក្បួនទៅដាក់ញត្តិជូនក្រសួងយុត្តិធម៌ និងរដ្ឋសភាជាតិ។ ញត្តិនឹងលើកឡើងពីការអំពាវនាវសំខាន់ៗចំនួន ៥ ជូនដល់រាជរដ្ឋាភិបាល៖
▪ ស្នើសុំឲ្យមានដំណោះស្រាយលើបញ្ហាជម្លោះដីធ្លី
▪ កំណែទម្រង់ប្រព័ន្ធតុលាការ និងដោះលែងអ្នកការពារនិងសកម្មជនសិទិ្ធមនុស្ស
▪ ដំឡើងប្រាក់ឈ្នួលអប្បបរមានិងគោរពសិទិ្ធការងារ
▪ បញ្ឈប់អំពើហិង្សាដែលគាំទ្រដោយអាជ្ញាធររដ្ឋ
▪ គោរពសេរីភាពក្នុងការបញ្ចេញមតិ ជួបប្រជុំ និងជួបជុំគ្នាដោយអហិង្សា។
កញ្ញា ម៉េង ឡាម៉ី សមាជិកនៃបណ្តាញក្រុមការពារកុមារ មានប្រសាសន៍ថា៖ “ទិវាសិទិ្ធមនុស្សអន្តរជាតិ គឺជាពេលវេលាដើម្បីប្រារព្ធពិធី ប៉ុន្តែក៏ជាពេលវេលាដើម្បីអំពាវនាវឲ្យមានការចាត់វិធានការលើបញ្ហានានាផងដែរ”។ កញ្ញា បានបន្តទៀតថា៖ “យុវជន គឺជាអនាគតរបស់ប្រទេសជាតិ ហើយយើងទាមទារយុត្តិធម៌សម្រាប់យើងទាំងអស់គ្នានៅពេលបច្ចុប្បន្ន និងអនាគត។”
ការប្រារព្ធទិវាត្រូវបានប្រព្រឹត្តឡើងនៅចុងឆ្នាំ ស្របពេលដែលមានភាពតានតឹងលើបញ្ហាសិទិ្ធមនុស្សនៅក្នុងប្រទេសកម្ពុជា។ អ្នករៀបចំកម្មវិធីនិងអ្នកចូលរួមជឿជាក់ថា ការប្រារព្ធទិវាសិទិ្ធមនុស្សនៅឆ្នាំនេះ គឺជាការប្រារព្ធដ៏ល្អបំផុតមួយ ដោយសារស្ថិតក្នុងបរិយាកាសរឹតត្បិតកាន់តែខ្លាំងឡើង តាមរយៈការអនុម័តច្បាប់ដែលមានការគាបសង្កត់ និងការបន្តចាប់ខ្លួន ការចោទប្រកាន់ និងការដាក់ពន្ធនាគារដោយមិនមានហេតុផលផ្លូវច្បាប់ត្រឹមត្រូវ។
អ្នកស្រី អ៊ុំ សុភី អ្នកតំណាងសហគមន៍ ឡពាង បានមានប្រសាសន៍ថា៖ “ប្រជាពលរដ្ឋ ដែលនៅតែបន្តតស៊ូជារៀងរាល់ថ្ងៃ ដើម្បីការពារដីធ្លីរបស់អ្នកទាំងនោះនៅទូទាំងប្រទេសកម្ពុជា ប៉ុន្តែសកម្មជនដីធ្លីនៅតែត្រូវបានបំភិតបំភ័យ និងចាប់ដាក់ពន្ធនាគារដោយសារប្រព័ន្ធតុលាការមានទំនោរទៅរកអ្នកមានអំណាច និងអ្នកមានទ្រព្យសម្បត្តិ។” អ្នកស្រី បានបន្តទៀតថា៖ “រាជរដ្ឋាភិបាលគួរតែជួយពួកយើងខ្ញុំឲ្យទទួលបានយុត្តិធម៌ ដោយមិនគួរដាក់គោលដៅចោទប្រកាន់លើយើងនោះទេ”។
លោក មឿន តុលា ប្រធានកម្មវិធីសិទិ្ធការងារនៃមជ្ឈមណ្ឌលអប់រំច្បាប់សម្រាប់សហគមន៍ បានមានប្រសាសន៍ថា៖ “ប្រាក់ឈ្នួលអប្បបរមាបច្ចុប្បន្ន គឺទាបជាងប្រាក់ឈ្នួលសមរម្យដែលអាចរស់នៅបាន”។ លោក បានបន្តថា៖ “សេចក្តីព្រាងច្បាប់ស្តីពីសហជីព នឹងបង្កហានិភ័យកាន់តែខ្លាំងលើលទ្ធភាពរបស់កម្មករក្នុងការរៀបចំ និងប្រើប្រាស់ការទាមទារជាសមូហភាព”។
ទោះជាស្ថានភាពលទ្ធិប្រជាធិបតេយ្យ និងលំហសេរីភាពសង្គមស៊ីវិល កាន់តែមានភាពរួញតូចទៅ ការបន្តប្រើប្រាស់ប្រព័ន្ធតុលាការដើម្បីបំបិទសំលេងនិងគំរាមកំហែងសកម្មជន និងកង្វះខាតការប្តេជ្ញាចិត្តរបស់រាជរដ្ឋាភិបាលក្នុងការគោរពសិទិ្ធការងារនិងដីធ្លីក៏ដោយ ក៏សកម្មជននៅទូទាំងប្រទេសកម្ពុជា នៅតែបន្តធ្វើការតវ៉ានឹងភាពអយុត្តិធម៌ ទាមទារសិទិ្ធរបស់អ្នកទាំងនោះ និងអំពាវនាវឲ្យមានការផ្លាស់ប្តូរ។
លោក អ៊ី សារ៉ុម នាយកប្រតិបត្តិនៃអង្គការសមាគមធាងត្នោត បានមានប្រសាសន៍ថា៖ “យើងខ្ញុំអំពាវនាវដល់រាជរដ្ឋាភិបាល សូមលោកមេត្តាលើកកំពស់ភាពយុត្តិធម៌ ហើយការដោះលែងអ្នកការពារសិទ្ធិមនុស្សនិងសកម្មជនសិទិ្ធមនុស្សទាំងអស់ នឹងជាជំហានដំបូងដ៏ល្អមួយ”។ លោកបានបន្តទៀតថា៖ “សកម្មជនជាច្រើនបានជាប់ពន្ធនាគារ ដែលនេះមិនបានគោរពរដ្ឋធម្មនុញ្ញប្រទេសកម្ពុជា គោលការណ៍ឯករាជ្យភាពនៃប្រព័ន្ធតុលាការ និងច្បាប់អន្តរជាតិ។”
ក្រុមមិត្ត១០ធ្នូ សូមអញ្ចើញមិត្តភក្តិ និងអ្នកសារព័ត៌មានទាំងអស់ ចូលរួមការប្រារព្ធទិវាសិទ្ធិមនុស្សអន្តរជាតិនេះ។
*សម្រាប់ព័ត៌មានស្តីពីរបៀបដែលអ្នកការពារសិទ្ធិមនុស្សត្រូវបានគេវាយប្រហារ និងគំរាមកំហែងក្នុងឆ្នាំ ២០១៣ និង ២០១៤ សូមចូលទៅកាន់គេហទំព័ររបស់អង្គការលីកាដូស្តីពីទិវាសិទ្ធិមនុស្សអន្តរជាតិ ១០ធ្នូ។
សម្រាប់ព័ត៌មានបន្ថែម សូមទាក់ទង៖
▪ លោក អ៊ី សារ៉ុម នាយកប្រតិបត្តិនៃសមាគមធាងត្នោត, លេខទូរស័ព្ទ៖ ០១២ ៨៣៦ ៥៣៣, អ៊ីមែល៖ sarom@teangtnaut.org
▪ លោក អំ សំអាត អ្នកសម្របសម្រួលបច្ចេកទេសស៊ើបអង្កេតនៃអង្គការ លីកាដូ, លេខទូរស័ព្ទ៖ ០១២ ៣២៧ ៧៧០
PDF៖ ទាញយកសេចក្តីថ្លែងការណ៍ជាភាសាអង់គ្លេស - ទាញយកសេចក្តីថ្លែងការណ៍ជាភាសាខ្មែរ
MP3៖ ស្តាប់សំឡេងជាភាសាខ្មែរ
- ឯកសារទាក់ទង
- ចំណងជើង & មូលបទ
- តុលាការ និងនីតិរដ្ឋ សិទិ្ធបញ្ចេញមតិ និងចូលរួម ទិវាសិទ្ធិមនុស្សអន្តរជាតិ សិទ្ធិដីធ្លី
