ដំណើរឆ្ពោះទៅមុខនៃពាក្យបណ្ដឹងរបស់អង្គការមិនមែនរដ្ឋាភិបាលប្រឆាំងនឹងក្រុមហ៊ុន Oikocredit ដែលបានដាក់ទៅស្ថាប័នទទួលពាក្យបណ្ដឹងថ្នាក់ជាតិហូឡង់ ស្ដីពីគោលការណ៍ណែនាំរបស់អង្គការ OECD
ចេញផ្សាយ ថ្ងៃទី១៨ ខែកញ្ញា ឆ្នាំ២០២៣; ក្រុមសង្គមស៊ីវិលស្ថាប័នទទួលពាក្យបណ្តឹងថ្នាក់ជាតិរបស់រដ្ឋាភិបាលប្រទេសហូឡង់ សម្រាប់ការទទួលខុសត្រូវសកម្មភាពអាជីវកម្ម (ស្ថាប័នទទួលពាក្យបណ្តឹងថ្នាក់ជាតិហូឡង់) បានទទួលយក និងដំណើរការឆ្ពោះទៅមុខនៃពាក្យបណ្ដឹងមួយ ពាក់ព័ន្ធនឹងការចោទប្រកាន់ ក្រុមហ៊ុន Oikocredit ដែលជាអ្នកវិនិយោគសង្គមអន្តរជាតិ មានមូលដ្ឋាននៅក្នុងប្រទេសហូឡង់ ថាបានរួមចំណែកធ្វើឱ្យមានផលប៉ះពាល់នៃការរំលោភសិទ្ធិមនុស្សយ៉ាងធ្ងន់ធ្ងរក្នុងវិស័យមីក្រូហិរញ្ញវត្ថុ នៅកម្ពុជា ។
ពាក្យបណ្ដឹងនេះ ធ្វើឡើងក្រោយពីមានភស្តុតាងជាសាធារណៈយ៉ាងទូលំទូលាយ ស្ដីពីការរំលោភសិទ្ធិមនុស្សជាច្រើន និងជាលក្ខណៈប្រព័ន្ធក្នុងវិស័យមីក្រូហិរញ្ញវត្ថុ នៅកម្ពុជា ក្នុងនោះមានរបាយការណ៍នៃការរំលោភបំពាន ពាក់ព័ន្ធនឹងអ្នកផ្ដល់កម្ចីឥណទានខ្នាតតូច ដែលទទួលបានមូលនិធិហិរញ្ញវត្ថុផ្ទាល់ពីក្រុមហ៊ុន Oikocredit ។ បណ្ដឹងនេះ បានចោទប្រកាន់ក្រុមហ៊ុន Oikocredit ថាបានដឹងពីរបាយការណ៍នៃការផ្ដល់កម្ចីបែបកេងប្រវ័ញ្ច ការអនុវត្តការប្រមូលឥណទានដោយបង្ខិតបង្ខំ និងផលប៉ះពាល់ធ្ងន់ធ្ងរផ្សេងទៀត ក្នុងវិស័យមីក្រូហិរញ្ញវត្ថុនៅកម្ពុជា យ៉ាងហោចណាស់ចាប់តាំងពីឆ្នាំ២០១៧មក ប៉ុន្តែនៅតែបន្ត និងបង្កើនការវិនិយោគរបស់ខ្លួនកាន់តែច្រើនទៀត ក្នុងឆ្នាំ២០២២ ។
ស្ថាប័នទទួលពាក្យបណ្តឹងថ្នាក់ជាតិហូឡង់ បានសម្រេចនៅក្នុងការវាយតម្លៃដំបូងរបស់ខ្លួន ដែលបានចេញផ្សាយ នៅថ្ងៃទី១៥ ខែកញ្ញាថា ពាក្យបណ្ដឹងនេះគឺ “សមហេតុផលសម្រាប់ការត្រួតពិនិត្យបន្ថែមទៀត” ក្រោយពីបានពិនិត្យមើលការចោទប្រកាន់នេះ ស្របតាមលក្ខខណ្ឌទទួលយកបណ្ដឹងរបស់ស្ថាប័នទទួលពាក្យបណ្តឹងថ្នាក់ជាតិហូឡង់ ។ លក្ខខណ្ឌនេះ រួមមាន “ថាតើបញ្ហានេះ មានសារៈសំខាន់ មានភស្តុតាងបញ្ជាក់ អាចជឿទុកចិត្តបាន និងពាក់ព័ន្ធយ៉ាងណាខ្លះ ទៅនឹង “គោលការណ៍ណែនាំសម្រាប់សហគ្រាសពហុជាតិរបស់អង្គការសម្រាប់កិច្ចសហប្រតិបត្តិការសេដ្ឋកិច្ច និងអភិវឌ្ឍន៍ (OECD)” ហើយ “ថាតើវាមើលទៅមានទំនាក់ទំនងនឹងគ្នាយ៉ាងណារវាង សកម្មភាពសហគ្រាស និងបញ្ហាដែលបានលើកឡើងនៅក្នុងករណីជាក់លាក់នេះ” ។
ការរំលោភសិទ្ធិមនុស្សធ្ងន់ធ្ងរក្នុងវិស័យមីក្រូហិរញ្ញវត្ថុនៅកម្ពុជា កើតមានកាន់តែខ្លាំងឡើងៗអស់រយៈពេលជិតមួយទសវត្សរ៍មកហើយ ខណៈដែលវិនិយោគិនបរទេសតែងមើលរំលងលើបញ្ហានេះ
ពាក្យបណ្ដឹងនេះ ត្រូវបានប្ដឹងរួមគ្នាទៅកាន់ ស្ថាប័នទទួលពាក្យបណ្តឹងថ្នាក់ជាតិហូឡង់ នៅក្នុងខែធ្នូ ឆ្នាំ២០២២ ដោយអង្គការមិនមែនរដ្ឋាភិបាលនៅកម្ពុជាចំនួន២ គឺអង្គការសមធម៌កម្ពុជា (“អង្គការសមធម៌”) និងអង្គការសម្ព័ន្ធខ្មែរជំរឿន និងការពារសិទ្ធិមនុស្ស លីកាដូ (“អង្គការលីកាដូ”) ក៏ដូចជាអង្គការមួយទៀតនៅក្នុងប្រទេសអាឡឺម៉ង់ គឺអង្គការ FIAN អាឡឺម៉ង់ ។ ស្ថាប័នទទួលពាក្យបណ្តឹងថ្នាក់ជាតិហូឡង់ គឺជាយន្តការបណ្ដឹងតវ៉ាគាំទ្រដោយរាជរដ្ឋាភិបាល សម្រាប់ពាក្យបណ្ដឹងប្រឆាំងនឹង ក្រុមហ៊ុននៅប្រទេសហូឡង់ ពាក់ព័ន្ធនឹងអនុលោមភាពនៃគោលការណ៍ណែនាំរបស់អង្គការ OECD និងការទទួលខុសត្រូវលើសកម្មភាពអាជីវកម្មរបស់ពួកគេ ។
ជំហានបន្ទាប់នៃដំណើរការទទួលពាក្យបណ្តឹងថ្នាក់ជាតិហូឡង់ គឺជាការជួបសន្ទនាគ្នារវាងភាគី ដូចជាការសម្របសម្រួល ឬការផ្សះផ្សា ដែលស្ថាប័នទទួលពាក្យបណ្តឹងថ្នាក់ជាតិហូឡង់ បានស្នើឱ្យមានការសម្របសម្រួល ។ ស្ថាប័នទទួលពាក្យបណ្តឹងថ្នាក់ជាតិហូឡង់ នឹងចេញផ្សាយជាសាធារណៈនូវសេចក្ដីថ្លែងការណ៍ចុងក្រោយមួយលើករណីនេះ បន្ទាប់ពីការព្យាយាមចរចាជាលក្ខណៈឯកជនរបស់ភាគី ដើម្បីឈានដល់ដំណាក់កាលព្រមព្រៀងគ្នា ។ ដោយសារតែពុំមានការកម្រិតពីចំនួននៃការចរចា ប្រសិនបើភាគីមិនអាចឈានដល់ដំណាក់កាលព្រមព្រៀងគ្នាទេ ស្ថាប័នទទួលពាក្យបណ្តឹងថ្នាក់ជាតិហូឡង់ នឹងត្រួតពិនិត្យមើលទៅលើបញ្ហាទាំងនេះ ព្រមទាំងផ្ដល់ជាអនុសាសន៍ស្របតាមគោលការណ៍ណែនាំរបស់អង្គការ OECD មុនពេលចេញសេចក្ដីថ្លែងការណ៍ចុងក្រោយរបស់ខ្លួន ។
អ្នកនាង ណាលី ពីឡូក នាយិកាទទួលបន្ទុកកិច្ចការក្រៅតំបន់នៃអង្គការលីកាដូ បានមានប្រសាសន៍ថា “ការរំលោភសិទ្ធិមនុស្សធ្ងន់ធ្ងរក្នុងវិស័យមីក្រូហិរញ្ញវត្ថុនៅកម្ពុជា កើតមានកាន់តែខ្លាំងឡើងៗអស់រយៈពេលជិតមួយទសវត្សរ៍មកហើយ ខណៈដែលវិនិយោគិនបរទេសតែងមើលរំលងលើបញ្ហានេះ” ។ អ្នកនាងបន្តថា “ក្រុមហ៊ុន Oikocredit និងវិយោគិនផ្សេងទៀត បានអះអាងពីការធ្វើឱ្យប្រសើរឡើងនូវជីវភាពរស់នៅរបស់សហគមន៍ដែលមានចំណូលទាប ។ ដូច្នេះ យើងរំពឹងថា ពួកគេនឹងដោះស្រាយបញ្ហាប្រឈមទាំងនេះពិតប្រាកដ សម្រាប់អ្នកខ្ចីប្រាក់ ដែលរងគ្រោះជាច្រើនឆ្នាំមកហើយ” ។
នេះជាពេលវេលាដែលក្រុមហ៊ុន Oikocredit និងអ្នកវិយោគផ្សេងទៀតដែលធ្វើឱ្យប៉ះពាល់ដល់សង្គម បញ្ឈប់ការពន្យារពេល ហើយចាប់ផ្ដើមចាត់វិធានការជាក់លាក់ ដើម្បីដោះស្រាយផលប៉ះពាល់ដែលពួកគេបានរួមចំណែក
ចាប់តាំងពីឆ្នាំ២០១៩ អង្គការលីកាដូ និងអង្គការសមធម៌ បានចេញផ្សាយរបាយការណ៍ចំនួន៥ ពាក់ព័ន្ធនឹងការរំលោភបំពានក្នុងវិស័យមីក្រូហិរញ្ញវត្ថុនៅកម្ពុជា ។ របាយការណ៍ស្ដីពី “ហានិភ័យនៃបំណុល” គឺជាការសិក្សាចុងក្រោយមួយ ចេញផ្សាយរួមគ្នាដោយអង្គការលីកាដូ និងអង្គការសមធម៌ នៅក្នុងខែសីហា ឆ្នាំ២០២៣ ដែលរៀបរាប់លម្អិតអំពី អសុវត្ថិភាពស្បៀងអាហារ ការលក់ដីដោយបង្ខំ ពលកម្មកុមារ ចំណាកស្រុក និងការរំលោភបំពានផ្សេងទៀត ទាក់ទិននឹងកម្រិតច្រើនលើសលប់នៃបំណុលមីក្រូហិរញ្ញវត្ថុ ។
កាលពីខែកុម្ភៈ ឆ្នាំ២០២២ អង្គការលីកាដូ និងអង្គការសមធម៌ ក៏បានដាក់ពាក្យបណ្ដឹងមួយក្នុងនាមប្រជាពលរដ្ឋកម្ពុជាអ្នកខ្ចីប្រាក់ ទៅកាន់យន្តការគណនេយ្យភាពឯករាជ្យរបស់សាជីវកម្មហិរញ្ញវត្ថុអន្តរជាតិ (IFC) ស្ដីពីការវិនិយោគលើវិស័យមីក្រូហិរញ្ញវត្ថុរបស់ស្ថាប័ននេះ នៅកម្ពុជា ។ បច្ចុប្បន្ន បណ្ដឹងសាជីវកម្មហិរញ្ញវត្ថុអន្តរជាតិនេះ កំពុងស្ថិតក្នុងដំណាក់កាល ការស៊ើបអង្កេតអំពីអនុលោមភាព ។
លោក អៀង វុទ្ធី នាយកប្រតិបត្តិនៃអង្គការសមធម៌កម្ពុជា បានមានប្រសាសន៍ថា “យើងរីករាយក្នុងការឃើញដំណើរការឆ្ពោះទៅមុខនេះ ។ នេះជាពេលវេលាដែលក្រុមហ៊ុន Oikocredit និងអ្នកវិយោគផ្សេងទៀតដែលធ្វើឱ្យប៉ះពាល់ដល់សង្គម បញ្ឈប់ការពន្យារពេល ហើយចាប់ផ្ដើមចាត់វិធានការជាក់លាក់ ដើម្បីដោះស្រាយផលប៉ះពាល់ដែលពួកគេបានរួមចំណែក” ៕
សម្រាប់ព័ត៌មានបន្ថែម សូមទាក់ទង៖
▪ លោក អៀង វុទ្ធី នាយកប្រតិបត្តិនៃអង្គការសមធម៌កម្ពុជាតាមរយៈ Signal: (+៨៥៥) ១២ ៧៩១ ៧០០ (ភាសាខ្មែរ និងអង់គ្លេស)
▪ អ្នកនាង ណាលី ពីឡូក នាយិកាទទួលបន្ទុកកិច្ចការក្រៅតំបន់នៃអង្គការលីកាដូ តាមរយៈ Signal: (+៨៥៥) ១២ ២១៤ ៤៥៤ (ភាសាអង់គ្លេស)
▪ លោក Pfeifer Mathias មន្ត្រីកម្មវិធីនៃអង្គការ FIAN អាឡឺម៉ង់ តាមរយៈ Signal: (+៤៩) ១៧៦៥៤១១៣៩៨៨, m.pfeifer@fian.de (ភាសាអង់គ្លេស និងអាឡឺម៉ង់)
PDF៖ ទាញយកសេចក្តីថ្លែងការណ៍ជាភាសាអង់គ្លេស - ទាញយកសេចក្តីថ្លែងការណ៍ជាភាសាខ្មែរ
MP3៖ ស្តាប់សំឡេងជាភាសាខ្មែរ
- ចំណងជើង & មូលបទ
- គ្រឹះស្ថានមីក្រូហិរញ្ញវត្ថុ និងបញ្ហាបំណុល