ការពិនិត្យឡេីងវិញរយៈពេល ១០ឆ្នាំ ៖ ការរំលោភសិទ្ធិមនុស្សនៅកម្ពុជា
ចេញផ្សាយ ថ្ងៃទី១ ខែធ្នូ ឆ្នាំ២០១៩ដើម្បីប្រារព្ធទិវាសិទ្ធិមនុស្សអន្តរជាតិ នៅថ្ងៃទី១០ ខែធ្នូ ឆ្នាំ២០១៩ ខាងមុខនេះ អង្គការលីកាដូ ធ្វើការសង្ខេបនូវព្រឹត្តិការណ៍ ស្តីពីសិទិ្ធមនុស្ស និង ការរំលោភសិទ្ធិមនុស្សសំខាន់ៗនានា ក្នុងរយៈពេលមូយទសវត្សចុងក្រោយនេះ។ ជារៀងរាល់ថ្ងៃ យើងនឹងបង្ហាញអំពី ស្ថានភាពសិទិ្ធមនុស្ស ក្នុងឆ្នាំនីមួយៗ (ពីឆ្នាំ ២០១០ ដល់ឆ្នាំ ២០១៩) ដោយចាប់ផ្តើមពីថ្ងៃទី ០១ ខែ ធ្នូ ឆ្នាំ២០១៩ ដល់ថ្ងៃទី ១០ ខែធ្នូ ឆ្នាំ២០១៩ ។
បង្ហាញតាមប្រធានបទ៖ ដីធ្លី នយោបាយ ការងារ សង្គមស៊ីវិល បញ្ចេញមតិ
បញ្ចេញមតិ៖ នៅថ្ងៃទី៩ ខែមករា អ្នកលក់សាច់មាន់តាមផ្លូវម្នាក់នៅរាជធានីភ្នំពេញ ត្រូវបានតុលាការផ្តន្ទាទោសពន្ធនាគាររយៈពេល ៣ឆ្នាំ យោងតាមបញ្ញត្តិហាមឃាត់ការប្រមាថព្រះមហាក្សត្រ បន្ទាប់ពីតុលាការបានរកឃើញថា លោកបានប្រមាថព្រះមហាក្សត្រ នៅក្នុងគេហទំព័រហ្វេសប៊ុករបស់លោក កាលពីឆ្នាំមុន ។
នយោបាយ៖ នៅថ្ងៃទី១៦ ខែមករា មន្ត្រីគណបក្សសង្គ្រោះជាតិម្នាក់ លោក គង់ ម៉ាស ត្រូវបានអាជ្ញាធរចាប់ខ្លួន និងចោទប្រកាន់ពីបទញុះញង់ និងបរិហារកេរិ៍្ត ពាក់ព័ន្ធនឹងការបង្ហោះលើគេហទំព័រហ្វេសប៊ុករបស់លោករិះគន់រាជរដ្ឋាភិបាល និងអាជ្ញាធរក្នុងតំបន់ ។
ដីធ្លី៖ នៅថ្ងៃទី២០ ខែមករា អ្នកតំណាងសហគមន៍ម្នាក់មកពីខេត្តព្រះវិហារ លោក ស៊ុម ម៉ឺន ត្រូវបានចាប់ខ្លួនជាមួយកូនរបស់លោក ដោយទាហានកងអន្តរាគមន៍លេខ ៦ ដែលធ្វើការជាបុគ្គលិកសន្តិសុខឯកជនឱ្យក្រុមហ៊ុនឯកជនមួយ ។ សមាជិកសហគមន៍ចំនួន ១៤ នាក់ ត្រូវបានឃាត់ខ្លួន ពាក់ព័ន្ធនឹងជម្លោះដីធ្លីមួយ ដែលជម្លោះដីធ្លីនោះប៉ះពាល់ដល់ពលរដ្ឋចំនួនជាង ៣០០ គ្រួសារ ។ សាក្សី បានរាយការណ៍ថា លោក ម៉ឺន ត្រូវបានគេវាយដំ ក្រោយពេលចាប់ខ្លួន ។ ក្រោយមកលោកបានបាត់ខ្លួនអស់រយៈពេលជាង ២ខែ ដោយអាជ្ញាធរបានអះអាងថាលោក បានរត់គេចខ្លួន ។ ភ្លាមៗបន្ទាប់ពីអ្នកសារព័ត៌មាន និងអង្គការសង្គមស៊ីវិល ចាប់ផ្តើមរាយការណ៍អំពីការបាត់ខ្លួនរបស់លោក និងអំពាវនាវសុំឲ្យមានការស៊ើបអង្កេត លោកបានបង្ហាញខ្លួន ក្នុងអាការៈស្លេកស្លាំង និងសុខភាពមិនសូវល្អ ។
ដីធ្លី៖ នៅថ្ងៃទី២៤ ខែមករា បុរសម្នាក់ ត្រូវបានគេបាញ់ និងរងរបួសយ៉ាងធ្ងន់ធ្ងរ បន្ទាប់ពីនគរបាល កងរាជអាវុធហត្ថ និងទាហានជាង ១០០ នាក់ បានចូលទៅក្នុងភូមិគគីរ នៃខេត្តព្រះសីហនុ ។ កងកម្លាំងចម្រុះនេះ ចុះទៅក្នុងភូមិ ដើម្បីអនុវត្តសាលដីកាតុលាការកំពូល ពាក់ព័ន្ធនឹងជម្លោះដីធ្លីមួយ ដោយសម្រេចប្រគល់ដីជម្លោះនោះទៅពលរដ្ឋចំនួន ៩គ្រួសារ ។ អ្នកតវ៉ា ដែលមានមួយចំនួនកាន់ដំបង គប់ដុំថ្ម ដុតកង់ឡាន បានព្យាយាមរារាំងកងកម្លាំងទាំងនោះ ពីការអនុវត្តសាលដីកានោះ ។ កងកម្លាំង បានឆ្លើយតប ដោយការបាញ់កាំភ្លើងជាច្រើនគ្រាប់ទៅក្រុមអ្នកតវ៉ា ដោយធ្វើឲ្យបុរសម្នាក់អាយុ ២៨ឆ្នាំ រងរបួសយ៉ាងធ្ងន់ ។
ផ្សេងៗ៖ កាលពីថ្ងៃទី១១ ខែកុម្ភៈ សហគមន៍អឺរ៉ុប បានចាប់ផ្តើមនីតិវិធីដកប្រព័ន្ធអនុគ្រោះពន្ធ (EBA) ជាផ្លូវការពីកម្ពុជា ។ គណកម្មាការអឺរ៉ុប បានលើកឡើងពីការរំលោភយ៉ាងធ្ងន់ធ្ងរ និងជាលក្ខណៈប្រព័ន្ធ លើសិទិ្ធមនុស្សជាមូលដ្ឋាន និងសិទិ្ធការងារនៅក្នុងប្រទេសកម្ពុជា រួមមានសេរីភាពចូលរួមក្នុងជីវភាពនយោបាយ សេរីភាពក្នុងការជួបជុំ បញ្ចេញមតិ និងសេរីភាពចងក្រងជាសមាគមនិងអង្គការ ។ ការព្រួយបារម្ភតាំងពីយូរមកហើយអំពីកង្វះខាតការគោរពសិទិ្ធកម្មករ និងជម្លោះដីធ្លីពាក់ព័ន្ធនឹងការផ្តល់ដីសម្បទានសេដ្ឋកិច្ច ក៏ជាកត្តាមួយជំរុញឲ្យមានការសម្រេចចិត្តបែបនេះរបស់គណកម្មាការអឺរ៉ុប ។
សង្គមស៊ីវិល៖ នៅថ្ងៃទី៨ ខែមីនា កងកម្លាំងចម្រុះ បានរារាំងពលរដ្ឋចំនួន ៥០០ នាក់ ដោយមិនឱ្យធ្វើការដើរក្បួនដើម្បីប្រារព្ធទិវាអន្តរជាតិសិទិ្ធនារី ។ អាជ្ញាធរ បានបិទទ្វាររបងពហុកីឡាដ្ឋានជាតិ អូឡាំពិក ដែលធ្វើឲ្យអ្នកប្រារព្ធទិវាមិនអាចចេញមកក្រៅបាន ដោយអ្នកទាំងនោះរួមមានស្ត្រី និងកុមារជាច្រើន ត្រូវបានឃ្លាំមើលយ៉ាងខ្លាំងពីនគរបាលបង្ក្រាបបាតុកម្មដែលពាក់មួកសុវត្ថិភាព និងខែលការពារ ។
នយោបាយ៖ នៅថ្ងៃទី១៥ ខែមីនា អ្នកដឹកនាំគណបក្សសង្គ្រោះជាតិចំនួន ៨នាក់ ត្រូវបានតុលាការចេញដីកាបង្គាប់ឲ្យចាប់ខ្លួន ដែលក្នុងនោះរួមមាន លោក សម រង្ស៊ី អ្នកស្រី មួរ សុខហួរ និងលោក អេង ឆៃអាង ពាក់ព័ន្ធនឹងបទចោទក្បត់ជាតិ និងញុះញង់ឱ្យប្រព្រឹត្តបទឧក្រិដ្ឋ ។
នយោបាយ៖ នៅថ្ងៃទី១៦ ខែមេសា សកម្មជនគណបក្សសង្គ្រោះជាតិ លោក ទិត រ៉ន ត្រូវបានបញ្ជូនខ្លួនទៅឃុំឃាំងនៅពន្ធនាគារ និងរកឃើញថាបានស្លាប់នៅក្នុងពន្ធនាគារ ក្នុងរយៈពេល ៧២ម៉ោង ក្រោយពេលមានការចាប់ខ្លួនលោក ដោយបន្សល់ស្លាកស្នាមវាយដំនៅលើខ្លួនរបស់លោក ។
នយោបាយ៖ នៅថ្ងៃទី២ ខែឧសភា អតីតប្រធានគណបក្សជំទាស់ លោក សម រង្ស៊ី ត្រូវបានតុលាការផ្តន្ទាទោសក្រោមបញ្ញត្តិហាមឃាត់ការប្រមាថព្រះមហាក្សត្រ និងញុះញង់ឲ្យកងកម្លាំងប្រដាប់អាវុធមិនស្តាប់បញ្ជាថ្នាក់លើ ដោយដាក់ឲ្យជាប់ពន្ធនាគារចំនួន ៨ឆ្នាំ និងពិន័យជាប្រាក់ ២០ លានរៀល (៥.០០០ ដុល្លារអាមេរិក) ។
បញ្ចេញមតិ៖ នៅថ្ងៃទី២២ ខែឧសភា ពលរដ្ឋខេត្តស្វាយរៀងម្នាក់ ឈ្មោះ ឃឹម បញ្ញា ត្រូវបានចាប់ខ្លួន និងចោទប្រកាន់តាមបញ្ញត្តិហាមឃាត់ការប្រមាថព្រះមហាក្សត្រ និងបរិហាកេរ្តិ៍ជាសាធារណៈ បន្ទាប់ពីលោករិះគន់សម្តេចនាយករដ្ឋមន្ត្រី និងព្រះមហាក្សត្រនៅលើបណ្តាញសង្គមហ្វេសប៊ុក ។
នយោបាយ៖ នៅចុងខែឧសភា យ៉ាងតិចអតីតសមាជិកគណបក្សសង្គ្រោះជាតិចំនួន ១៤០នាក់ ទទួលបានដីកាកោះហៅឱ្យចូលខ្លួនសាកសួរ ដោយនគរបាល ពាក់ព័ន្ធនឹងការមិនគោរពសាលដីកាតុលាការកំពូលកាលពីឆ្នាំ ២០១៧ ដែលបង្គាប់ឲ្យរំលាយគណបក្សសង្គ្រោះជាតិ ។ ការចេញដីកាយ៉ាងច្រើននេះ បានកើតឡើង ទោះបីជាការពិត មិនមាននរណាម្នាក់ក្នុងចំណោមអ្នកទាំង ១៤០ នោះ មានឈ្មោះក្នុងបញ្ជីហាមឃាត់ធ្វើនយោបាយក្នុងសាលដីកាតុលាការកំពូលឆ្នាំ ២០១៧ ក៏ដោយ ។
ផ្សេងៗ៖ នៅថ្ងៃទី២២ ខែមិថុនា អគារកំពស់ ៧ជាន់ នៅខេត្តព្រះសីហនុ បានបាក់រលំ ដោយបានសម្លាប់កម្មករសំណង់ចំនួន ២៨នាក់ និងបណ្តាលឲ្យកម្មករផ្សេងទៀតចំនួន ២៦ នាក់រងរបួស ។ ក្រុមហ៊ុនចិនមួយ ដែលគ្រប់គ្រងការសាងសង់នេះ ត្រូវបានដឹងជាសាធារណៈថា មិនបានទទួលការអនុញ្ញាតឲ្យចាប់ផ្តើមសាងសង់តាមច្បាប់នោះទេ ប៉ុន្តែការដ្ឋាននេះបានសាងសង់ ៨០% ទៅហើយ ទោះបីជាមានសេចក្តីជូនដំណឹងឲ្យផ្អាកការសាងសង់ចំនួនពីរដង ចេញដោយអាជ្ញាធរក៏ដោយ ។ លោកអភិបាលខេត្តព្រះសីហនុ បានលាលែងពីតំណែងក្រោយពីមានព្រឹត្តិការណ៍នោះ ហើយក្រោយមកត្រូវបានតំឡើងឋានៈជាឧត្តមសេនីយ៍ផ្កាយបួន និងជារដ្ឋលេខាធិការក្រសួងការពារជាតិ ។
បញ្ចេញមតិ៖ នៅថ្ងៃទី៩ និងទី១០ ខែកក្កដា មនុស្សចំនួន ៧នាក់ ត្រូវបានឃាត់ខ្លួន ទាក់ទងនឹងការបញ្ចេញមតិរបស់អ្នកទាំងនោះចូលរួមរំលែកទុក្ខ និងគាំទ្រឲ្យមានការស៊ើបអង្កេតឡើងវិញលើករណីឃាតកម្មលើលោកបណ្ឌិត កែម ឡី ។ ក្នុងនោះមាន លោក គង់ រៃយ៉ា និងលោក សួង នាគព័ន្ធ ដែលត្រូវបានតុលាការឃុំខ្លួនបណ្តោះអាសន្ន បន្ទាប់ពីត្រូវបានចោទប្រកាន់ពីបទញុះញង់ឲ្យប្រព្រឹត្តបទឧក្រិដ្ឋ ។ លោក រៃយ៉ា បានលក់អាវយឺតដែលមានរូបលោកបណ្ឌិត កែម ឡី និងបង្ហោះសារអំពាវនាវឲ្យពលរដ្ឋទៅចូលរួមខួបនៃការបាញ់សម្លាប់លោកបណ្ឌិត ដោយចេញសោហ៊ុយធ្វើដំណើរដល់អ្នកស្ម័គចិត្តទៅចូលរួម ។ រីឯលោក នាគព័ន្ធ ត្រូវបានចាប់ខ្លួននៅពេលដែលលោក កាន់ក្រដាសមួយសន្លឹកអំពាវនាវឲ្យ “បញ្ឈប់ការសម្លាប់មនុស្សក្រៅប្រព័ន្ធតុលាការ” ។ ក្រុមសង្គមស៊ីវិល និងអ្នករាយការណ៍ពិសេសស្តីពីសិទិ្ធមនុស្សរបស់អង្គការសហប្រជាជាតិ បានអំពាវនាវឲ្យមានការដោះលែងអ្នកទាំងនោះ នៅខណៈដែលអង្គការលើកលែងទោសអន្តរជាតិ បានកំណត់អ្នកទាំងនោះថាជា “អ្នកទោសមនសិការ” ។
នយោបាយ៖ ចាប់ពីថ្ងៃទី១៧ ខែសីហា ដល់ថ្ងៃទី១០ ខែវិច្ឆិកា យ៉ាងតិចណាស់មានសមាជិក ឬសកម្មជនគណបក្សសង្គ្រោះជាតិចំនួន ១២៥នាក់ ត្រូវបានអាជ្ញាធររដ្ឋចោទប្រកាន់ពាក់ព័ន្ធនឹងរឿងនយោបាយ ហើយមនុស្សចំនួន ៧៨នាក់ ត្រូវបានឃុំខ្លួនក្នុងពន្ធនាគារ ។ ការចោទប្រកាន់នេះ ត្រូវបានធ្វើឡើងដោយតុលាការចំនួន ២១ ខេត្ត នៅទូទាំងប្រទេស ដោយចោទប្រកាន់ពីបទ “រួមគំនិតក្បត់” និង "ញុះញង់ឲ្យប្រព្រឹត្តបទឧក្រិដ្ឋ” ហើយនិង “ការមិនគោរពសេចក្តីសម្រេចរបស់តុលាការ” ។ បទចោទប្រកាន់ និងការឃុំខ្លួនទាំងអស់ ត្រូវបានធ្វើឡើងដោយផ្អែកលើការរំលាយគណបក្សជំទាស់កាលពីឆ្នាំ ២០១៧ ។ ក្រោយមក មនុស្ស ៧៨ នាក់ ដែលត្រូវបានឃុំខ្លួន ត្រូវបានតុលាការដោះលែងឲ្យនៅក្រៅឃុំបណ្តោះអាសន្នរង់ចាំសវនាការ កាលពីខែវិច្ឆិកា ប៉ុន្តែបទចោទប្រកាន់របស់អ្នកទាំងនោះ មិនទាន់ត្រូវបានទម្លាក់ចោលនោះទេ ។
សង្គមស៊ីវិល៖ នៅថ្ងៃទី៤ ខែកញ្ញា អ្នកនាំពាក្យរាជរដ្ឋាភិបាលបាន “អញ្ជើញ” អង្គការ លីកាដូ និងសមាគមធាងត្នោត ទៅពិភាក្សាអំពីការចេញផ្សាយរបាយការណ៍រួមកាលពីពេលថ្មីៗនេះ ដែលនិយាយអំពីការរំលោភសិទិ្ធមនុស្សដែលបង្កឡើងដោយគ្រឹះស្ថានមីក្រូហិរញ្ញវត្ថុនៅកម្ពុជា ។ កិច្ចប្រជុំបិទទ្វារនោះ ត្រូវបានធ្វើឡើងដោយអាជ្ញាធររដ្ឋធ្វើការដាក់សំពាធដល់អង្គការទាំងពីរ ឱ្យចេញនូវសេចក្តីថ្លែងការណ៍រួមមួយជាមួយសមាគមគ្រឹះស្ថានមីក្រូហិរញ្ញវត្ថុ និងរាជរដ្ឋាភិបាល ដោយក្នុងន័យសម្រាលនូវអត្ថន័យពិតក្នុងរបាយការណ៍នោះ ។ ប៉ុន្តែអង្គការទាំងពីរ មិនបានធ្វើតាមនោះទេ ។ បន្ទាប់មកអង្គការ ទាំងពីរ ត្រូវបានរាជរដ្ឋាភិបាល អញ្ជើញម្តងទៀត ប៉ុន្តែត្រូវបានបដិសេធដោយអង្គការទាំងពីរ ។
សង្គមស៊ីវិល៖ នៅថ្ងៃទី៩ ខែកញ្ញា ប្រធានអង្គការតម្លាភាពកម្ពុជា លោក ព្រាប កុល ត្រូវបាន “អញ្ជើញ” ឲ្យចូលរួមប្រជុំជាមួយអ្នកនាំពាក្យរាជរដ្ឋាភិបាលដូចគ្នា ដើម្បីធ្វើការ “អប់រំ” អំពីការផ្តល់កិច្ចសម្ភាសន៍ “ដែលមិនច្បាស់លាស់” ជាមួយអ្នកកាសែត ។ លោក ព្រាប កុល បានផ្តល់កិច្ចសម្ភាសន៍ជាមួយទស្សនាវដ្តីក្នុងតំបន់មួយ ដែលនិយាយអំពីភាពមិនស្មើគ្នានៃការទទួលបានប្រយោជន៍ពីការរីកចំរើនផ្នែកសេដ្ឋកិច្ច ដោយបានកត់សម្គាល់ថា ពលរដ្ឋកម្ពុជាភាគច្រើន “មិនបានទទួលប្រយោជន៍” ពីការរីកចំរើននៃសេដ្ឋកិច្ចជាតិនោះទេ ។
ដីធ្លី៖ នៅថ្ងៃទី១៦ ខែតុលា នគរបាលបានចាប់ខ្លួនអ្នកតំណាងសហគមន៍ពីររូប នៅខែត្រត្បូងឃ្មុំ ពាក់ព័ន្ធនឹងជម្លោះដីធ្លីដ៏រ៉ាំរ៉ៃជាមួយក្រុមហ៊ុនចំការកៅស៊ូចិនមួយឈ្មោះ ហាម៉ូនី វីន អ៊ិនវេសម៉េន (Harmony Win Investment) ។ អ្នកតំណាងទាំងពីរនេះ ត្រូវបានចោទប្រកាន់ពីបទល្មើសជាច្រើន ពាក់ព័ន្ធនឹងភាពសកម្មនិយមរបស់អ្នកទាំងពីរ ក្នុងការការពារដីធ្លីរបស់សហគមន៍ពីការទន្ទ្រានពីក្រុមហ៊ុន ។
នយោបាយ៖ នៅថ្ងៃទី៣០ ខែតុលា សកម្មជនគណបក្សសង្គ្រោះជាតិ អ្នកស្រី សំ បុប្ផា បានស្លាប់ បន្ទាប់ពីអ្នកស្រីបានធ្លាក់ពីលើម៉ូតូរបស់នគរបាល នៅពេលដែលអ្នកស្រីត្រូវបាននគរបាលនាំខ្លួន ទាំងដែលអ្នកស្រីមិនព្រម ទៅកាន់ប៉ុស្តិ៍នគរបាលមួយក្នុងខេត្តស្វាយរៀង ។
នយោបាយ៖ នៅថ្ងៃទី៧ ដល់ថ្ងៃទី៩ ខែវិច្ឆិកា កងកម្លាំងប្រដាប់អាវុធជាច្រើនរយនាក់ ត្រូវបានដាក់ពង្រាយនៅទូទាំងប្រទេសកម្ពុជា មុនពេលដែលលោក សម រង្ស៊ី វិលត្រឡប់ចូលប្រទេសវិញ ។ រថយន្តយោធាដែលបំពាក់ដោយកាំភ្លើងយន្ត ត្រូវបានដាក់នៅចំពីមុខអាកាសយានដ្ឋានអន្តរជាតិភ្នំពេញ ហើយមានការចល័តទ័ពនៅតាមដងផ្លូវជាច្រើននៅតាមបណ្តាខេត្ត និងរាជធានីភ្នំពេញ ដែលរួមមានខេត្តបន្ទាយមានជ័យ បាត់ដំបង កំពង់ធំ កោះកុង និងស្វាយរៀងជាដើម ។
បញ្ចេញមតិ៖ នៅថ្ងៃទី៩ ខែវិច្ឆិកា អ្នកកាសែតពីររូបមកពីវិទ្យុសំឡេងប្រជាធិបតេយ្យ (VoD) ត្រូវបានឃាត់ខ្លួនអស់រយៈពេល ៣ម៉ោង ដោយកងរាជអាវុធហត្ថក្រុងប៉ោយប៉ែត បន្ទាប់ពីអ្នកទាំងនោះយកព័ត៌មាននៅក្បែរព្រំដែនកម្ពុជា-ថៃ ។ អ្នករាយការណ៍ទាំងពីរ បាននិយាយថា ក្រៅពីការសួរនាំ មន្ត្រីនគរបាលទាំងនោះ បានឆែកឆេរសម្ភារៈរបស់អ្នកទាំងពីរ និងការសន្ទនាឯកជនក្នុងទូរស័ព្ទរបស់ពួកគេថែមទៀតផង ។
នយោបាយ៖ នៅថ្ងៃទី១០ ខែវិច្ឆិកា ប្រធានគណបក្សសង្គ្រោះជាតិ លោក កឹម សុខា ត្រូវបានដោះលែងពីការឃុំខ្លួនក្នុងផ្ទះ ប៉ុន្តែលោកនៅតែមិនមានសេរីភាពក្នុងការចូលរួមក្នុងវិស័យនយោបាយ ហើយបទចោទប្រកាន់ ក៏មិនទាន់ត្រូវបានតុលាការទំលាក់ចោលនៅឡើយ ។
ផ្សេងៗ៖ នៅថ្ងៃទី១២ ខែវិច្ឆិកា សហគមន៍អឺរ៉ុប បានចេញនូវរបាយការណ៍ស្វែងរកការពិត ពាក់ព័ន្ធនឹងការរំលោភសិទិ្ធមនុស្ស ដែលជាកត្តាឈានទៅរកការដកប្រព័ន្ធអនុគ្រោះពន្ធក្នុងវិស័យពាណិជ្ជកម្ម (EBA) ពីកម្ពុជា ហើយបានផ្ញើរបាយការណ៍នោះមកភាគីកម្ពុជា ។
បញ្ចេញមតិ៖ នៅថ្ងៃទី១៥ ខែវិច្ឆិកា លោក សួង នាគព័ន្ធ ត្រូវបានតុលាការដោះលែងឲ្យនៅក្រៅឃុំបណ្តោះអាសន្នរង់ចាំសវនាការ បន្ទាប់ពីត្រូវបានចាប់ខ្លួនកាលពីខែកក្កដា ។ បទចោទប្រកាន់ មិនទាន់ត្រូវបានទំលាក់ចោលនៅឡើយ ទោះបីជាមានការរិះគន់ និងសំណូមពរពីសង្គមស៊ីវិល និងអ្នកជំនាញអង្គការសហប្រជាជាតិ និងក្រុមសិទិ្ធមនុស្សអន្តរជាតិក៏ដោយ ។
នយោបាយ៖ នៅថ្ងៃទី១៩ ខែវិច្ឆិកា សម្តេចនាយករដ្ឋមន្ត្រី បានថ្លែងសុន្ទរកថាសាធារណៈមួយ ថាមន្ត្រីក្រុមប្រឹក្សាឃុំជាប់ឆ្នោតមកពីគណបក្សសង្គ្រោះជាតិចំនួនជាង ៥.០០០ នាក់ កាលពីឆ្នាំ ២០១៧ នឹងមិនទទួលបានតំណែងវិញនោះទេ ។ ក្រុមប្រឹក្សាឃុំជាប់ឆ្នោតទាំងនោះ តំណាងឲ្យពលរដ្ឋកម្ពុជា ៤៣% នៃពលរដ្ឋកម្ពុជាទាំងអស់នៅទូទាំងប្រទេសកាលពីឆ្នាំ ២០១៧ ។ មានឃុំ-សង្កាត់ចំនួនជាង ១.៦០០ ឃុំ-សង្កាត់ មានក្រុមប្រឹក្សាឃុំសង្កាត់យ៉ាងតិចមួយរូបមកពីគណបក្សសង្គ្រោះជាតិ ដែលត្រូវបានគេដកយកតំណែង ដោយមានតែ ៣៩ ឃុំ-សង្កាត់ប៉ុណ្ណោះ ដែលមិនមានក្រុមប្រឹក្សាឃុំសង្កាត់មកពីគណបក្សសង្គ្រោះជាតិ ។
នយោបាយ៖ នៅថ្ងៃទី២០ ខែវិច្ឆិកា ក្រសួងការបរទេស បានមោឃភាពលិខិតឆ្លងដែនរបស់សមាជិក និងសកម្មជនគណបក្សសង្គ្រោះជាតិចំនួន ២៧នាក់ ដោយបានផ្ញើសេចក្តីជូនដំណឹងនេះ ទៅកាន់ស្ថានទូត និងកុងស៊ុលបរទេសនានានៅកម្ពុជា ។
ការងារ៖ នៅថ្ងៃទី២៦ ខែវិច្ឆិកា រដ្ឋសភាជាតិ បានធ្វើវិសោធនកម្មច្បាប់ស្តីពីសហជីពចំនួន ១០មាត្រា ។ មេដឹកនាំសហជីពឯករាជ្យជាច្រើន បានរិះគន់ការធ្វើវិសោធនកម្មនេះ ដោយបានលើកឡើងថាមាត្រាដែលមានលក្ខណៈគាបសង្កត់ជាច្រើនផ្សេងទៀត មិនត្រូវបានអាជ្ញាធរកែប្រែឡើយ ហើយបញ្ហាចំបងជាច្រើននៅក្នុងច្បាប់នេះ នៅតែមិនទាន់ត្រូវបានដោះស្រាយ ។
បញ្ចេញមតិ៖ នៅថ្ងៃទី២៩ ខែវិច្ឆិកា លោក គង់ រ៉ៃយា ត្រូវបានតុលាការដោះលែងឲ្យនៅក្រៅឃុំបណ្តោះអាសន្នរង់ចាំសវនាការ បន្ទាប់ពីត្រូវបានអាជ្ញាធរចាប់ខ្លួនកាលពីខែកក្កដា ។ បទចោទប្រកាន់ មិនទាន់ត្រូវបានទំលាក់ចោលនៅឡើយ ទោះបីជាមានការរិះគន់ និងសំណូមពរពីសង្គមស៊ីវិល និងអ្នកជំនាញអង្គការសហប្រជាជាតិ និងក្រុមសិទិ្ធមនុស្សអន្តរជាតិក៏ដោយ ។
នយោបាយ៖ នៅថ្ងៃទី២ ខែធ្នូ សាលាដំបូងរាជធានីភ្នំពេញ បានអះអាងថាតុលាការមានភស្តុតាងគ្រប់គ្រាន់ ក្នុងការបញ្ជូនលោក កឹម សុខា ទៅជំនុំជម្រះ ពាក់ព័ន្ធនឹងបទចោទ “សន្និដ្ឋិភាពជាមួយបរទេស” ដោយបដិសេធសំណើសុំរបស់មេធាវីរបស់លោក ក្នុងការទំលាក់ចោលបទចោទនេះ ។
បង្ហាញតាមប្រធានបទ៖ ដីធ្លី នយោបាយ ការងារ សង្គមស៊ីវិល បញ្ចេញមតិ
សង្គមស៊ីវិល៖ នៅថ្ងៃទី៤ ខែមករា សាលាដំបូងរាជធានីភ្នំពេញបានសម្រេចធ្វើការចោទប្រកាន់អ្នកដឹកនាំសង្គមស៊ីវិលដែលល្បីចំនួន ៣រូប គឺលោក ប៉ា ងួនទៀង លោក មឿន តុលា និងព្រះតេជគុណ ប៊ុត ប៊ុនតិញ ពីបទ “រំលោភលើទំទុកចិត្ត” ។ បទចោទប្រកាន់នេះ គឺពាក់ព័ន្ធទៅនឹងការអះអាងថាអ្នកទាំងបីគ្រប់គ្រងថវិកាបុណ្យមិនបានត្រឹមត្រូវក្នុងពិធីបុណ្យសព លោកបណ្ឌិត កែម ឡី ជាអ្នកវិភាគនយោបាយមួយរូបដែលត្រូវបានគេធ្វើឃាត ។ ការចោទប្រកាន់បែបមិនសមទំនងមួយនេះ ត្រូវបានធ្វើឡើងតាមរយៈបណ្តឹងរបស់លោក ពេជ្រ ស្រស់ ជាអ្នកនយោបាយមួយរូប ដែលធ្លាប់បានដាក់ពាក្យបណ្តឹងប្រឆាំងនឹងគណបក្សសង្រ្គោះជាតិ ដែលនាំឱ្យមានការរំលាយគណបក្សនេះ ។ ក្រុមគ្រួសារបណ្ឌិត កែម ឡី បានហៅបណ្តឹងនេះថាជា “បណ្តឹងគ្មានមូលដ្ឋាន” ។
បញ្ចេញមតិ៖ នៅថ្ងៃទី៨ ខែកុម្ភៈ អាជ្ញាធរប្រទេសថៃបាននិរទេស អ្នកស្រី សំ សុខា ស្ត្រីម្នាក់ដែលត្រូវបានអង្គការសហប្រជាជាតិចាត់ទុកជាជនភៀសខ្លួនមកពីប្រទេសកម្ពុជា ។ អ្នកស្រី សុខា ត្រូវបានចោទប្រកាន់ដោយអាជ្ញាធរកម្ពុជាពាក់ព័ន្ធនឹងការគប់ស្បែកជើងទៅលើផ្ទាំងប៉ាណូដែលមានរូបសម្តេចនាយករដ្ឋមន្ត្រី ហ៊ុន សែន និងសម្តេច ហេង សំរិន ប្រធានរដ្ឋសភាជាតិ ។ អ្នកស្រីត្រូវបានផ្តន្ទាទោសដោយកំបាំងមុខដោយតុលាការខេត្តកំពង់ស្ពឺពីបទ “ញុះញង់ឱ្យមានការរើសអើង” និងបទ “ប្រមាថមន្ត្រីសាធារណៈ” ។
បញ្ចេញមតិ៖ នៅថ្ងៃទី១៤ ខែកុម្ភៈ សភាឯកបក្សនៅកម្ពុជាបានអនុម័តជាឯកច្ឆ័ន្ធនូវច្បាប់ស្តីពី ការប្រមាថព្រះមហាក្សត្រ ដែលហាមឃាត់ចំពោះការប្រមាថដល់ព្រះមហាក្សត្រ។ បញ្ញត្តិនៃច្បាប់នេះបានកំណត់ដាក់ពន្ធនាគារចាប់ពី១ ទៅ ៥ឆ្នាំ និងពិន័យជាប្រាក់ចាប់ពី ៥០០ ដុល្លារ ទៅ ២.៥០០ ដុល្លារអាមេរិក ។
នយោបាយ៖ នៅថ្ងៃទី២៥ ខែកុម្ភៈ ការបោះឆ្នោតជ្រើសរើសសមាជិកព្រឹទ្ធសភាត្រូវបានធ្វើឡើង ។ សមាជិកព្រឹទ្ធសភាត្រូវបានបោះឆ្នោតជ្រើសតាំងដោយសមាជិកក្រុមប្រឹក្សាឃុំសង្កាត់ ។ បន្ទាប់ពីមានការរំលាយគណបក្សសង្រ្គោះជាតិ ក្រុមប្រឹក្សាឃុំសង្កាត់ដែលបានជាប់ឆ្នោតប្រមាណជាង ៥.០០០នាក់ ត្រូវបានផ្លាស់ជំនួសភាគច្រើនដោយសមាជិកមកពីគណបក្សប្រជាជនកម្ពុជាក៏ដូចជាគណបក្សតូចៗផ្សេងទៀតដែលពលរដ្ឋមិនបានបោះឆ្នោតគាំទ្រ ដែលធ្វើឲ្យគណបក្សប្រជាជនកម្ពុជាបានឈ្នះឆ្នោតចំនួន ៥៨អាសនៈលើ ៥៨អាសនៈ ក្នុងការបោះឆ្នោតព្រឹទ្ធសភានៅថ្ងៃ២៥ ខែកុម្ភៈនោះ ។
ដីធ្លី៖ នៅថ្ងៃទី៨ ខែមីនា ពលរដ្ឋ ៣នាក់ នៅខេត្តក្រចេះត្រូវបានបាញ់ និងរងរបួសនៅពេលដែលកម្លាំងនគរបាល កងរាជអាវុធហត្ថ និងកម្លាំងយោធាប្រមាណ ១០០នាក់ បានធ្វើការបាញ់ទៅលើពលរដ្ឋប្រមាណ ៣០០នាក់ ដែលកំពុងធ្វើការតវ៉ាប្រឆាំងនឹងការបណ្តេញចេញយ៉ាងហិង្សាមួយដោយកម្លាំងសមត្ថកិច្ចដែលដឹកនាំដោយមន្ត្រីខេត្តក្រចេះ ។ ការប៉ះទង្គិចនេះកើតឡើងដោយសារជម្លោះដីធ្លីរវាងពលរដ្ឋ និងក្រុមហ៊ុនចំការកៅស៊ូមេមត់ ។
នយោបាយ៖ នៅថ្ងៃទី១៩ ខែមេសា ក្រុមការងាររបស់អង្គការសហប្រជាជាតិស្តីពីការឃុំខ្លួនដោយខុសច្បាប់ (WGAD) បានអះអាងថាការបន្តឃុំខ្លួនលោក កឹម សុខា ប្រធានគណបក្សសង្គ្រោះជាតិ គឺជា “រឿងនយោបាយ” ហើយអំពាវនាវស្នើសុំឲ្យអាជ្ញាធរកម្ពុជាដោះលែងលោកជាបន្ទាន់ និងផ្តល់សំណងនិងជួសជុលការខូចខាតដល់លោក ។
បញ្ចេញមតិ៖ នៅថ្ងៃទី៥ ខែឧសភា កាសែតភ្នំពេញប៉ុស្តិ៍ ដែលជាសារព័ត៌មានឯករាជ្យចុងក្រោយមួយ ត្រូវបានលក់ទៅឲ្យក្រុមហ៊ុនទំនាក់ទំនងសាធារណៈដែលមានម្ចាស់ជាជនជាតិម៉ាឡេស៊ី ។ ក្រុមហ៊ុននេះ ពីមុនធ្លាប់ធ្វើការជូនសម្តេចនាយករដ្ឋមន្ត្រី កាលពីទស្សវត្សរ៍ឆ្នាំ ១៩៩០ ។ កាសែតភ្នំពេញប៉ុស្តិ៍ ក៏បានរងនូវការបង្ខំឲ្យបង់ពន្ធដែលមិនត្រឹមត្រូវចំនួន ៣,៩ លានដុល្លារអាមេរិក ផងដែរ មុនពេលស្ថាប័នសារព័ត៌មាននេះ ត្រូវបានលក់ ។ កាសែតភ្នំពេញប៉ុស្តិ៍ បានចេញផ្សាយអត្ថបទព័ត៌មានដោយស្មោះត្រង់ និងដោយឥតលាក់លៀមនូវស្ថានភាពនៃការលក់របស់ស្ថាប័ននេះ ប៉ុន្តែអ្នកតំណាងម្ចាស់សារព័ត៌មានថ្មី បានបង្គាប់ឲ្យលុបនូវអត្ថបទនោះចេញពីគេហទំព័ររបស់ស្ថាប័ន ។ ស្ថានភាពនេះ បានធ្វើឲ្យមានការបណ្តេញចេញនូវនិពន្ធនាយកម្នាក់ ដែលបានយល់ព្រមឲ្យអត្ថបទនោះចេញផ្សាយនៅលើគេហទំព័ររបស់ភ្នំពេញប៉ុស្តិ៍ និងការលាឈប់នៃអ្នករាយការណ៍ និងអ្នកសរសេរព័ត៌មានមួយចំនួនធំ ត្រឹមតែរយៈពេលមួយសប្តាហ៍ដំបូង បន្ទាប់ពីមានគណៈគ្រប់គ្រងថ្មី ។
នយោបាយ៖ នៅថ្ងៃទី១៩ ខែឧសភា អតីតអ្នកដឹកនាំគណបក្សសង្គ្រោះជាតិថ្នាក់ស្រុកម្នាក់ នៅខេត្តសៀមរាប ត្រូវបានចាប់ខ្លួន ក្រោយពេលលោកបានចែករំលែកអត្ថបទមួយរិះគន់ព្រះមហាក្សត្រ និងសម្តេចនាយករដ្ឋមន្ត្រី នៅលើគេហទំព័រហ្វេសប៊ុករបស់លោក ។ លោក បាន សម្ភីរ ដែលជាអតីតមន្ត្រីគណបក្សជំទាស់ ត្រូវបានផ្តន្ទាទោសតាមបញ្ញត្តិថ្មីស្តីពីការហាមឃាត់ការប្រមាថព្រះមហាក្សត្រ ដែលទើបតែត្រូវបានសភាអនុម័តថ្មី និងដាក់ទោសពន្ធនាគាររយៈពេល ១ឆ្នាំ ។
បញ្ចេញមតិ៖ នៅថ្ងៃទី២៨ ខែឧសភា រាជរដ្ឋាភិបាល បានសេចក្តីប្រកាសអន្តរក្រសួងមួយ អំពាវនាវឲ្យរឹតបន្តឹងការឃ្លាំមើល និងត្រួតពិនិត្យតាមដានចាប់ពិរុទ្ធនូវការបញ្ចេញមតិនៅលើបណ្តាញសង្គម និងអ៊ិនធើណេត ។ សេចក្តីប្រកាសនេះ បង្គាប់ឲ្យរដ្ឋមន្ត្រីពាក់ព័ន្ធ ត្រួតពិនិត្យចាប់ពិរុទ្ធ និង “បិទ” គេហទំព័រលើបណ្តាញសង្គម និងអ៊ិនធើណេតណា ដែលមានអត្ថបទ “បែបញុះញង់ បំបែកបំបាក់សាមគ្គីភាពជាតិ រើសអើង និងចេតនាបង្កអសន្តិសុខជាតិ សណ្តាប់ធ្នាប់សង្គម និងប្រយោជន៍សាធារណៈ” ។
សង្គមស៊ីវិល៖ នៅខែឧសភា បុគ្គលិកអង្គការ លីកាដូ បានប្រទះនូវការវាយប្រហារលើប្រព័ន្ធអ៊ិនធើណេតមួយ ដែលព្យាយាមក្លែងជាគេហទំព័រស្វែងរករបស់ក្រុមហ៊ុន ហ្គូហ្គល (Google) ដើម្បីបញ្ឆោតឱ្យបុគ្គលិករបស់ លីកាដូ បង្ហាញនូវលេខសំងាត់អ៊ីមែលរបស់បុគ្គលិក ទៅជនទីបី នៅពេលដែលបុគ្គលិកទាំងនោះ ចូលទៅមើលគេហទំព័ររបស់កាសែតភ្នំពេញប៉ុស្តិ៍ ។ ការវាយប្រហារដោយប្រើប្រាស់គេហទំព័ររបស់កាសែតភ្នំពេញប៉ុស្តិ៍ ត្រូវបានបញ្ជាក់ដោយអ្នកវិភាគផ្នែកសុវត្ថិភាពប្រព័ន្ធអ៊ិនធើណេតឯករាជ្យ ។
នយោបាយ៖ នៅថ្ងៃទី២៩ ខែកក្កដា គណបក្សប្រជាជនកម្ពុជា បានឈ្នះអាសនៈទាំងអស់នៃរដ្ឋសភាជាតិ នៅក្នុងការបោះឆ្នោតជាតិមួយ ដែលសាធារណៈមតិជាតិ និងអន្តរជាតិអះអាងថា មិនមានការចូលរួមពីគណបក្សជំទាស់ ក្រោយពេលដែលមានការបង្ក្រាបផ្នែកនយោបាយយ៉ាងខ្លាំងជាច្រើន ដែលរួមមានការរំលាយគណបក្សសង្គ្រោះជាតិ ដែលជាគណបក្សជំទាស់ធំតែមួយគត់ ។ នេះជាលើកទីមួយក្នុងប្រវត្តិសាស្ត្រប្រជាធិបតេយ្យកម្ពុជា ដែលមានតែគណបក្ស មួយគត់ គ្រប់គ្រងរដ្ឋសភាជាតិ ។ ចំនួនសន្លឹកឆ្នោតមិនបានការ ច្រើនជាងចំនួនសន្លឹកឆ្នោតបានការដែលគណបក្សតូចៗដទៃទៀតទទួលបាន ។
ដីធ្លី៖ នៅថ្ងៃទី២០ ខែសីហា សកម្មជនដីធ្លី អ្នកស្រី ទេព វន្នី ត្រូវបានព្រះមហាក្សត្រ ព្រះរាជទានលើកលែងទោស និងដោះលែងពីពន្ធនាគារ បន្ទាប់ពីត្រូវបានឃុំខ្លួនអស់រយៈពេលជិត ២ឆ្នាំ ដោយបទចោទប្រកាន់មិនត្រឹមត្រូវជាច្រើន ។ ភ្លាមៗក្រោយពេលដោះលែង អ្នកស្រី និងសកម្មជន ៥នាក់ផ្សេងទៀត ត្រូវបានតុលាការផ្តន្ទាទោសពន្ធនាគារមួយទៀត ប៉ុន្តែទោសត្រូវព្យួរ ។ អ្នកស្រី ត្រូវបានគេតាមដាន និងបំភិតបំភ័យយ៉ាងខ្លាំង ក្រោយពេលដែលអ្នកស្រី ត្រូវបានគេដោះលែង ដែលធ្វើឲ្យអ្នកស្រី បង្ខំចិត្តគេចចេញពីប្រទេស ។
បញ្ចេញមតិ៖ នៅថ្ងៃទី២១ ខែសីហា អ្នករាយព័ត៌មានរបស់វិទ្យុអាស៊ីសេរី លោក យាង សុធារិន និងលោក អ៊ួន ឈិន ដែលធ្លាប់ត្រូវបានឃុំខ្លួនពីបទចោទប្រកាន់មិនត្រឹមត្រូវ ត្រូវបានដោះលែងឲ្យនៅក្រៅឃុំបណ្តោះអាសន្នរង់ចាំសវនាការ ប៉ុន្តែអ្នកទាំងពីរ ត្រូវបានកម្រិតសិទិ្ធសេរីភាពមួយចំនួន ជាពិសេសពាក់ព័ន្ធនឹងការធ្វើដំណើរ ។
សង្គមស៊ីវិល៖ នៅថ្ងៃទី២៦ ខែកញ្ញា បុគ្គលិកបួនរូបរបស់សមាគម អាដហុក និងមួយរូបរបស់គណៈកម្មាធិការជាតិរៀបចំការបោះឆ្នោត ត្រូវបានតុលាការផ្តន្ទាទោសពីបទ សូកប៉ាន់សាក្សី ដែលជាប់ពាក់ព័ន្ធនឹងករណីមួយរបស់ប្រធានគណបក្សសង្គ្រោះជាតិ លោក កឹម សុខា ។ អ្នកទាំងប្រាំ ត្រូវបានផ្តន្ទាទោសពន្ធនាគារចំនួន ៥ឆ្នាំ ដែលទោសនៅសល់ពីការឃុំខ្លួនបណ្តោះអាសន្ន ត្រូវបានតុលាការព្យួរ ។ អ្នកទាំងប្រាំ បានជាប់ក្នុងពន្ធនាគាររយៈពេល ១៤ខែ ។ មិនមានភស្តុតាងគួរឲ្យជឿបានណាមួយ ត្រូវបានបង្ហាញដោយព្រះរាជអាជ្ញា អំឡុងពេលសវនាការមួយថ្ងៃ កាលពីថ្ងៃទី១៨ ខែកញ្ញានោះទេ ហើយមនុស្សដែលអះអាងថាជាសាក្សី ក៏មិនមានវត្តមានក្នុងសវនាការដែរ ។
ដីធ្លី៖ នៅថ្ងៃទី១ ខែតុលា អាជ្ញាធរជាច្រើន បានរារាំងសហគមន៍ចំនួន ២ ដោយមិនឲ្យប្រារព្ធទិវាអន្តរជាតិសិទិ្ធលំនៅដ្ឋាន ។ សហគមន៍មួយ ត្រូវបានរារាំង ដោយមិនអនុញ្ញាតឲ្យដើររើសសំរាមនៅក្នុងរាជធានីភ្នំពេញ ហើយអ្នកតំណាង ត្រូវបានឃាត់ខ្លួន និងបង្ខំឲ្យផ្តិតមេដៃសន្យាថានឹងមិនរៀបចំកម្មវិធីបែបនេះដោយមិនមានការអនុញ្ញាតពីអាជ្ញាធរទៀត។ សហគមន៍មួយទៀត នៅខេត្តសៀមរាប ត្រូវបានរារាំងដោយអាជ្ញាធរខេត្ត ដោយបានអះអាងថាខុសនឹងច្បាប់ ។
ផ្សេងៗ៖ នៅថ្ងៃទី៥ ខែតុលា សហគមន៍អឺរ៉ុប បានប្រកាសពីផែនការចាប់ផ្តើមស៊ើបអង្កេតទៅលើការគោរពតាមកាតព្វកិច្ចរបស់កម្ពុជាលើវិស័យសិទិ្ធមនុស្ស ពាក់ព័ន្ធនឹងទទួលបានការអនុគ្រោះពន្ធផ្នែកពាណិជ្ជកម្មក្រោមយន្តការអ្វីទាំងអស់លើកលែងតែអាវុធ EBA ។ ប្រព័ន្ធអនុគ្រោះពន្ធនេះ មានយន្តការការពារសិទិ្ធមនុស្ស និងសិទិ្ធការងារ សម្រាប់រដ្ឋដែលទទួលបានអត្ថប្រយោជន៍នេះ ។
សង្គមស៊ីវិល៖ នៅថ្ងៃទី១០ ខែធ្នូ កងសន្តិសុខរាប់រយនាក់ ដោយមានពាក់មួកសុវត្ថិភាព បានឡោមព័ទ្ធការប្រមូលផ្តុំមួយរបស់កម្មកររោងចក្រ កសិករ គ្រូបង្រៀន សហជីព និងអ្នកតំណាងនិងសមាជិកសហគមន៍ជាច្រើនរយនាក់ នៅពេលអ្នកទាំងនោះប្រារព្ធទិវាសិទិ្ធមនុស្សអន្តរជាតិនៅរាជធានីភ្នំពេញ ។ រាជរដ្ឋាភិបាល បានរារាំងក្រុមពលរដ្ឋទាំងនោះ ដោយមិនឲ្យដើរក្បួន ហើយក្រុមពលរដ្ឋនៅខេត្តរតនគិរី បន្ទាយមានជ័យ និងកោះកុង ក៏បានរាយការណ៍ថា អាជ្ញាធរបានរឹតត្បិតសិទិ្ធសេរីភាពរបស់អ្នកទាំងនោះក្នុងការជួបជុំផងដែរ ។
ការងារ៖ នៅថ្ងៃទី១១ ខែធ្នូ មេដឹកនាំសហជីពឯករាជ្យដែលល្បីឈ្មោះចំនួន ៦នាក់ ត្រូវបានតុលាការផ្តន្ទាទោសពីបទល្មើសដែលពាក់ព័ន្ធនឹងព្រឹត្តិការណ៍នៃការតវ៉ាខែធ្នូ ឆ្នាំ២០១៣ និងខែមករា ឆ្នាំ២០១៤ នៅរាជធានីភ្នំពេញ ។ ម្នាក់ៗក្នុងចំណោមអ្នកទាំង ៦ ត្រូវបានតុលាការផ្តន្ទាទោសពន្ធនាគារចំនួន ២ឆ្នាំកន្លះ ដែលទោសពន្ធនាគារត្រូវបានព្យួរ ហើយបង្គាប់ឲ្យបង់ពិន័យចូលរដ្ឋចំនួន ៨.៦០០ ដុល្លារអាមេរិកក្នុងម្នាក់ ។ ការកាត់ទោសនេះ មិនបានបង្ហាញនូវភស្តុតាងណាមួយដែលបង្ហាញថាមេដឹកនាំសហជីពទាំងនោះ បានប្រព្រឹត្តបទល្មើសនោះទេ ។
បង្ហាញតាមប្រធានបទ៖ ដីធ្លី នយោបាយ ការងារ សង្គមស៊ីវិល បញ្ចេញមតិ
ផ្សេងៗ៖ ថ្ងៃទី០១ ខែមករា “យុទ្ធនាការបង្រ្កាបគ្រឿងញៀនរបស់រាជរដ្ឋាភិបាល” បានចាប់ផ្តើម ។ យោងតាមទិន្នន័យរបស់រាជរដ្ឋាភិបាល នៅក្នុង ៦ខែ ដើមឆ្នាំ ២០១៧ មនុស្សប្រមាណជាង ១០.០០០នាក់ ត្រូវបានចាប់ខ្លួន ដែលរួមមានមនុស្សរាប់ពាន់នាក់ត្រូវបានឃុំខ្លួនក្នុងពន្ធនាគារ ដោយមិនបានគោរពដល់នីតិវិធីត្រឹមត្រូវរបស់តុលាការ និងសិទ្ធិជាមូលដ្ឋាន ដូចជាសិទ្ធិទទួលបានមេធាវី ។ ចំនូនអ្នកជាប់ពន្ធនាគារ ដែលកើនឡើងលើសចំណុះនៃពន្ធនាគារដែលអាចផ្ទុកបានស្រាប់ទៅហើយ បានកើនឡើងបន្ថែមទៀត ។
សង្គមស៊ីវិល៖ ថ្ងៃទី៨ ខែកុម្ភៈ មន្រ្តីជាន់ខ្ពស់របស់អង្គការលីកាដូ លោក អំ សំអាត និងសកម្មជនដីធ្លីលោក ច័ន្ទ ពុទ្ធិស័ក្ដ ត្រូវបានកោះហៅជាជនសង្ស័យ ក្រោយពីអ្នកទាំងពីរបានចូលរួមដើរក្បួនមូយដោយអហិង្សាក្នុងរាជធានីភ្នំពេញក្នុងខែតុលា ឆ្នាំ២០១៦ ហើយអ្នកទាំងពីរត្រូវបានវាយដំពីសំណាក់កងសន្តិសុខរបស់សាលាខណ្ឌដូនពេញ ។
បញ្ចេញមតិ៖ ថ្ងៃទី១៧ ខែកុម្ភៈ អ្នកវិភាគផ្នែកនយោបាយ លោក គឹម សុខ ត្រូវបានចាប់ខ្លួន និងចោទប្រកាន់ពីបទញុះញង់ និងបរិហាកេរ្តិ៍ បន្ទាប់ពីសម្តេចនាយករដ្ឋមន្រ្តី បានដាក់ពាក្យបណ្តឹងប្រឆាំងនឹងអ្នកវិភាគនោះ ទាក់ទងនឹងការអត្ថាធិប្បាយរបស់លោកពាក់ព័ន្ធនឹងឃាតកម្មលោកបណ្ឌិត កែម ឡី ។ ក្រោយមកលោក គឹម សុខ ត្រូវបានតុលាការផ្តន្ទាទោសជាប់ពន្ធនាគារចំនួន ១៨ខែ ។
នយោបាយ៖ ថ្ងៃទី២០ ខែកុម្ភៈ កិច្ចប្រជុំរដ្ឋសភាដែលមានគណបក្សតែមួយ (សមាជិករបស់គណបក្ស សង្គ្រោះជាតិបានធ្វើពហិការមិនចូលប្រជុំ) បានអនុម័តវិសោធនកម្មច្បាប់ស្តីពីគណបក្សនយោបាយ ដោយអនុញ្ញាតឱ្យមានការរំលាយគណបក្សនយោបាយនោះ តាមសំណើរបស់អាជ្ញាធររាជរដ្ឋាភិបាល ប្រសិនបើថ្នាក់ដឹកនាំរបស់គណបក្សនោះ ត្រូវបានផ្តន្ទាទោសពីបទព្រហ្មទណ្ឌ ។ ការធ្វើវិសោធនកម្មនោះ ត្រូវបានរិះគន់យ៉ាងខ្លាំងពីសំណាក់គណបក្សជំទាស់ ក្រុមអ្នកការពារសិទ្ធិមនុស្ស និងសហគមន៍ជាតិ និងអន្តរជាតិ ថាជាការរំលោភបំពានដល់លទ្ធិប្រជាធិបតេយ្យ ។ អតីតប្រធានរបស់គណបក្សសង្គ្រោះជាតិ លោក សម រង្ស៊ី បានលាលែងពីតំណែងមួយសប្តាហ៍មុន ដើម្បីបញ្ជៀសពីការរំលាយបក្ស ក្រោយពេលដែលវិសោធនកម្មច្បាប់ចូលជាធរមាន ដែលផ្ទេរការដឹកនាំបក្សទៅឱ្យលោក កឹម សុខា ។
ដីធ្លី៖ ថ្ងៃទី២៣ ខែកុម្ភៈ អ្នកស្រី ទេព វន្នី ត្រូវបានផ្តន្ទាទោសពីបទហិង្សាដោយចេតនាដោយមានស្ថានទម្ងន់ទោស ទាក់ទងនឹងការតវ៉ាដោយអហិង្សាទាមទារឱ្យដោះលែងសកម្មជនដីធ្លីបឹងកក់កាលពីឆ្នាំ២០១៣ ។ ការផ្តន្ទាទោសឱ្យជាប់ពន្ធនាគារបន្ថែមចំនួន ៣០ខែ និងពិន័យជាប្រាក់ ១៤លានរៀលនេះ ត្រូវបានធ្វើឡើង ស្របពេលដែលអ្នកស្រី ទេព វន្នី កំពុងជាប់ក្នុងពន្ធនាគារស្រាប់ ។
ផ្សេងៗ៖ ថ្ងៃទី២៣ ខែមីនា សាលាដំបូងរាជធានីភ្នំពេញ បាន ផ្តន្ទាទោសលោក អឿត អាង ហៅ “ជួប សម្លាប់” ពីបទឃាតកម្មគិតទុកជាមុនទៅលើអ្នកវិភាគនយោបាយ លោកបណ្ឌិត កែម ឡី ។ ការខ្វះខាតតម្លាភាព នីតិវិធីសវនាការមិនគ្រប់គ្រាន់ ការខកខានក្នុងការស៊ើបអង្កេតឱ្យបានម៉ត់ចត់ ការរួមផ្សំគំនិត និងស្ថានភាពនៃការចាប់ខ្លួន ត្រូវបានរិះគន់ពីសំណាក់មេធាវី អ្នកការពារសិទ្ធិមនុស្ស និងសហគមន៍ជាតិនិងអន្តរជាតិ ។ ការស្នើសុំឱ្យមានការស៊ើបអង្កេតដោយឯករាជ្យលើករណីឃាតកម្មលោក កែម ឡី ដោយយកគំរូតាមការអនុវត្តរបស់អន្តរជាតិ មិនត្រូវបានបង្កើតឡើងដោយរាជរដ្ឋាភិបាលនោះឡើយ ។
សង្គមស៊ីវិល៖ នៅខែមេសា អាជ្ញាធរបានចាប់ផ្តើមរឹតបន្តឹងដំណើរការទទួលបានការថែទាំសុខភាពលើមន្ត្រី និងអតីតមន្រ្តីរបស់សមាគម អាដហុក ចំនួន ៣នាក់ក្នុងចំណោម ៥នាក់ ដែលជាប់ឃុំក្នុងពន្ធនាគារ ។ អ្នកទាំងបីនាក់បានប្រឈមនឹងស្ថានភាពជម្ងឺយ៉ាងធ្ងន់ធ្ងរ មុនពេលដែលអ្នកទាំងនោះទទួលបានការព្យាបាលឡើងវិញនៅចុងខែមិថុនា ។
នយោបាយ៖ ការបោះឆ្នោតក្រុមប្រឹក្សាឃុំសង្កាត់បានធ្វើឡើងនៅថ្ងៃទី០៤ ខែមិថុនា ។ គណបក្សសង្គ្រោះជាតិបានឈ្នះសម្លេង ៤៣% នៃចំនួនអ្នកបោះឆ្នោតសរុប ដែលជាមូលហេតុធ្វើឱ្យគណបក្សនេះទទួលបានតួនាទីជាក្រុមប្រឹក្សាឃុំសង្កាត់ច្រើនជាង ៥.០០០កន្លែង ហើយនេះជាការចូលរួមលើកទីមួយរបស់គណបក្សសង្គ្រោះជាតិក្នុងព្រឹត្តិការណ៍បោះឆ្នោតថ្នាក់ឃុំសង្កាត់ ។
នយោបាយ៖ ថ្ងៃទី១០ ខែកក្កដា រដ្ឋសភាជាតិបានអនុម័តលើវិសោធនកម្មច្បាប់ស្តីពីគណបក្សនយោបាយជាលើកទីពីរ ដែលអនុញ្ញាតឱ្យរំលាយគណបក្សនយោបាយណាដែល “គំាំទ្រ ឬរៀបចំផែនការ ឬរួមគំនិតជាមួយបុគ្គលផ្សេងទៀតក្នុងការបង្កើតសកម្មភាពប្រឆាំងទៅនឹងផលប្រយោជន៍ព្រះរាជាណាចក្រកម្ពុជា” ។ ច្បាប់នេះបានហាមឃាត់ការប្រើប្រាស់ “សម្លេង រូបភាព ឯកសារជាលាយលក្ខណ៍អក្សរ ឬសកម្មភាពរបស់អ្នកដែលត្រូវបានផ្តន្ទាទោសពីបទព្រហ្មទណ្ឌ...សម្រាប់ផលប្រយោជន៍របស់គណបក្ស” ។ ច្បាប់នេះត្រូវបានគេឃើញថាមានគោលដៅសំខាន់លើគណបក្សសង្គ្រោះជាតិ ដែលបង្កើតឡើងដោយលោក កឹម សុខា និងលោក សម រង្ស៊ី ហើយក្រោយមកម្នាក់ក្នុងចំណោមអ្នកទាំងពីរ កំពុងប្រឈមនឹងការផ្តន្ទាទោសជាច្រើន ។
បញ្ចេញមតិ៖ នៅចុងខែសីហា រាជរដ្ឋាភិបាលបានបង្គាប់ឱ្យបិទស្ថានីយវិទ្យុចំនួន ៣២ នៅតាមបណ្តាខេត្តទាំង២០ ដែលការបិទនេះមានគោលដៅលើវិទ្យុណាដែលផ្សាយព័ត៌មានឯករាជ្យជាភាសាខ្មែរ ពិសេសគឺវិទ្យុអាស៊ីសេរី(RFA) វិទ្យុសម្លេងសហរដ្ឋអាមេរិក(VoA) និងវិទ្យុសម្លេងប្រជាធិបតេយ្យ(VoD) ហើយការហាមឃាត់នេះក៏រួមបញ្ចូលទាំងការផ្សាយរបស់វិទ្យុដទៃទៀតដែលផ្សាយសម្លេងបន្តពីវិទ្យុដែលបានហាមឃាត់នោះផងដែរ ។ ការបិទដ៏ធំធេងមួយនេះបានជះឥទ្ធិពលយ៉ាងខ្លាំងដល់តំបន់មួយចំនួនដែលពឹងផ្អែកលើវិទ្យុជាប្រភពចម្បងក្នុងការទទួលបានព័ត៌មាន ។
បញ្ចេញមតិ៖ នៅថ្ងៃទី២៨ ខែសីហា អ្នកកាសែតដឹខេមប៊ូឌាដេលី ២នាក់ លោក អុន ភាព និងលោក Zsombor Peter ត្រូវបានប្រកាន់ពីបទញុះញង់ តាមរយៈបណ្តឹងរបស់ព្រះរាជអាជ្ញាអមសាលាដំបូងខេត្តរតនគិរី ទាក់ទងទៅនឹងការរាយការណ៍ព័ត៌មាននៅខណៈពេលខិតជិតមកដល់នៃការបោះឆ្នោតក្រុមប្រឹក្សាឃុំសង្កាត់កាលពីឆ្នាំ២០១៧ ។
នយោបាយ៖ នៅថ្ងៃទី៣ ខែកញ្ញា មន្ត្រីនគបាលជាច្រើននាក់ បានធ្វើការវាយឆ្មក់ទៅលើគេហដ្ឋានរបស់ប្រធានគណបក្សសង្គ្រោះជាតិ លោក កឹម សុខា និងបានចាប់ខ្លួនលោក ដោយចោទប្រកាន់ពីអំពើក្បត់ជាតិ ។ លោកត្រូវបានបញ្ជូនទៅពន្ធនាគារដើម្បីរងចាំសវនាការ ក្នុងបទចោទដែលអាចមានលទ្ធភាពក្នុងការជាប់ពន្ធនាគាររហូតទៅដល់៣០ឆ្នាំ ។ ភស្តុតាងតែមួយគត់ដែលបង្ហាញដោយរាជរដ្ឋាភិបាល គឺការថ្លែងសុន្ទរកថារបស់លោក ដែលត្រូវបានធ្វើឡើងនៅប្រទេសអូស្ត្រាលីកាលពីឆ្នាំ២០១៣ ដោយលោកបានលើកឡើងថាលោកធ្លាប់ទទួលបានការគាំទ្រពីសហរដ្ឋអាមេរិក ។ មេបញ្ជាការយោធាទាំងអស់ទូទាំងប្រទេសបានចេញនូវសេចក្តីថ្លែងការណ៍របស់ខ្លួនគាំទ្រនឹងចាប់ខ្លួននេះ ហើយអង្គភាពអង្គរក្សសម្តេចនាយករដ្ឋមន្ត្រីបានប្រកាសថា មានរថក្រោះរាប់រយបានត្រៀមរួចរាល់ជាស្រេចក្នុងការទប់ទល់នឹងសកម្មភាពទាំងឡាយដែលតវ៉ាប្រឆាំងនឹងការចាប់ខ្លួននេះ ។
បញ្ចេញមតិ៖ នៅថ្ងៃទី០៤ ខែកញ្ញា កាសែតឯករាជ្យមួយ ឈ្មោះឌឹខេមបូឌាដេលី (Cambodia Daily) ត្រូវបិទដោយបង្ខំ ក្រោយពេលដែលទទួលបង្ខំឲ្យបង់ពន្ធរដ្ឋចំនួន ៦,៣លាន ដុល្លាសហរដ្ឋអាមេរិក ។ បន្ទាប់មកបណ្តឹងព្រហ្មទណ្ឌចំពោះការគេចពន្ធ និងបរិហាកេរ្តិ៍ ត្រូវបានធ្វើឡើងប្រឆាំងនឹងម្ចាស់ កាសែត ដែលកំពុងរស់នៅបរទេស និងអ្នកគ្រប់គ្រងទូទៅដែលនៅក្នុងស្រុក ដោយហាមមិនឱ្យចាកចេញពីប្រទេសកម្ពុជា ។ កាសែតឌឹខេមបូឌាដេលី បានបោះពុម្ពផ្សាយតាំងពីឆ្នាំ១៩៩៣ ដែលជាសារព័ត៌មានឯករាជ្យមួយក្នុងចំណោមសារព័ត៌មានឯករាជ្យមួយចំនួនតូច ដោយតែងតែចេញផ្សាយព័ត៌មានរិះគន់រាជរដ្ឋាភិបាល និងរាយការណ៍ព័ត៌មានបែបស៊ើបអង្កេត ។
សង្គមស៊ីវិល៖ នៅថ្ងៃទី១១ ខែកញ្ញា យុវជន លោក ហ៊ុន វណ្ណៈ និងលោក ឌឹម គុណឌី ត្រូវបានចាប់ខ្លួនខណៈពេលដែលអ្នកទាំងពីរកំពុងថតសកម្មភាពនាវាធំៗចំនួនពីរ ដែលបានបោះយុថ្កានៅឆ្នេរសមុទ្រខេត្តកោះកុង ។ សកម្មជនបរិស្ថានទាំងពីរនាក់បានសង្ស័យថានាវាទាំងពីរបានបូមខ្សាច់ដោយខុសច្បាប់ដើម្បីនាំចេញទៅបរទេស ។ ការចាប់ខ្លួននេះត្រូវបានរាយការណ៍ថា បានផ្អែកទៅលើពាក្យបណ្តឹងរបស់ក្រុមហ៊ុនលោក លី យ៉ុងផាត់ ដែលជាអ្នកជំនួញម្នាក់ដ៏មានឥទ្ធិពលបំផុតនៅក្នុងប្រទេសកម្ពុជា និងជាសមាជិកព្រឹទ្ធសភាមកពីគណបក្សប្រជាជនកម្ពុជាផងដែរ ។ សកម្មជនបរិស្ថានទាំងពីរនាក់បានរងនូវការចោទប្រកាន់ពីបទញ៉ុះញ៉ង់ និងបទរំលោភលើទីកន្លែងកម្មសិទ្ធិឯកជន ហើយអ្នកទាំងពីរត្រូវបានបញ្ចូនទៅឃុំខ្លួននៅពន្ធនាគារខេត្តកោះកុង ។
នយោបាយ៖ នៅថ្ងៃទី០៦ ខែតុលា មេធាវីរបស់រាជរដ្ឋាភិបាលបានប្តឹងទាមទារឱ្យមានការរំលាយគណបក្សសង្គ្រោះជាតិ បន្ទាប់ពីមានការចាប់ខ្លួនលោក កឹម សុខា នៅខែកញ្ញា ។
នយោបាយ៖ នៅថ្ងៃទី១៦ ខែតុលា រដ្ឋសភាជាតិបានអនុម័តវិសោធនកម្មច្បាប់ស្តីពីគណបក្សនយោបាយ ដែលអាចអនុញ្ញាតឱ្យមានការបែងចែងជាថ្មីនូវអាសនៈនៃរដ្ឋសភារបស់គណបក្សដែលត្រូវបានរំលាយ ។ សមាជិកសភាមកពីគណបក្សសង្គ្រោះជាតិ បានធ្វើពហិកាមិនចូលរួមអង្គប្រជុំនេះទេ ។ ច្បាប់ដែលត្រូវបានវិសោធនកម្មហើយ បានបើកឲ្យយកអាសនៈរបស់គណបក្សសង្គ្រោះជាតិដែលជាប់ឆ្នោតត្រឹមត្រូវ ទៅបែងចែកឱ្យទៅសមាជិកគណបក្សកាន់អំណាច និងគណបក្សតូចៗផ្សេងទៀតដែលមិនទទួលបានសម្លេងឆ្នោតពីរាស្ត្រ ។ ការធ្វើវិសោធនកម្មផ្សេងទៀត ក៏អនុញ្ញាតឱ្យមានការបែងជាថ្មីចំពោះអាសនៈនៃសមាជិកក្រុមប្រឹក្សាឃុំសង្កាត់របស់គណបក្សសង្ក្រោះជាតិ ដែលបានឈ្នះឆ្នោតកាលពីខែមិថុនា ឆ្នាំ២០១៧ ។
នយោបាយ៖ នៅថ្ងៃទី២២ ខែតុលា សម្តេចនាយករដ្ឋមន្រ្តីបានលើកឡើងក្នុងសុន្ទរកថាសាធារណៈមួយថា លោកប្រាកដ ៩៩% ថាគណបក្សសង្គ្រោះជាតិនឹងត្រូវបានរំលាយមុនសវនាការកាត់ក្តីលោក កឹម សុខា ។ សម្តេចនាយករដ្ឋមន្រ្តីក៏បានធ្វើការសន្យាថា នឹងរក្សាតួនាទីសមាជិកក្រុមប្រឹក្សាឃុំសង្កាត់មកពីគណបក្សសង្គ្រោះជាតិជាង ៥០០០នាក់ ប្រសិនបើអ្នកទាំងនោះចុះចូលជីវភាពនយោបាយជាមួយគណបក្សប្រជាជនកម្ពុជា ។
សង្គមស៊ីវិល៖ នៅក្នុងខែតុលា ការបែកធ្លាយមួយបានបង្ហាញថានគរបាលជាតិបានចោទប្រកាន់សង្គមស៊ីវិល ក្រុមសហគមន៍ការពារសិទ្ធិដីធ្លីថា អ្នកទាំងនោះជាបណ្តាញនៃបដិវត្តន៍ពណ៌ ដែលមានស្នាក់ការកណ្តាលនៅស្ថានទូតអាមេរិក និងសហភាពអ៊ឺរ៉ុប ។ វគ្គបណ្តុះបណ្តាលត្រូវបានធ្វើឡើងដល់នគរបាល និងអាជ្ញាធរ ដើម្បីតាមឃ្លាំមើលសង្គមស៊ីវិល ក្រុមសហគមន៍ការពារសិទ្ធិដីធ្លី ទាំងនោះ ។
នយោបាយ៖ នៅថ្ងៃទី១៦ ខែវិច្ឆិកា តុលាការកំពូល ដែលមានប្រធានមួយរូបជាសមាជិករបស់គណកម្មការកណ្តាលនៃគណបក្សប្រជាជនកម្ពុជា បានបើកសវនាការរំលាយគណបក្សសង្រ្គោះជាតិ បន្ទាប់ពីមានសំណើពីរាជរដ្ឋាភិបាល ។ សំណើនេះត្រូវបានធ្វើដោយប្រើប្រាស់ច្បាប់ស្តីពីគណបក្សនយោបាយដែលទើបតែត្រូវបានធ្វើវិសោធនកម្មថ្មីៗកាលពីខែកុម្ភៈ ។ មេធាវីតំណាងរាជរដ្ឋាភិបាល បានចោទប្រកាន់ដោយគ្មានភស្តុតាងថា គណបក្សសង្គ្រោះជាតិ អង្គការជាតិ និងអន្តរជាតិ មានការពាក់ព័ន្ធក្នុងការប៉ុនប៉ងចូលរួមជាមួយសហរដ្ឋអាមេរិក ដើម្បីធ្វើបដិវត្តន៍ពណ៌ផ្តួលរំលំរាជរដ្ឋាភិបាល ។ រាជរដ្ឋាភិបាលបានដៅឈ្មោះអង្គការមជ្ឈមណ្ឌលសិទ្ធិមនុស្សកម្ពុជា (CCHR) និងគណៈកម្មាធិការដើម្បីការបោះឆ្នោតដោយសេរីនិងយុត្តិធម៌ (COMFREL) ថាជា “អ្នកសមគំនិត” ក្នុងការប៉ុនប៉ងធ្វើបដិវត្តន៍ពណ៌នេះ ។
បញ្ចេញមតិ៖ នៅថ្ងៃទី ១៨ ខែវិច្ឆិកា អ្នកកាសែតនៃវិទ្យុអាស៊ីសេរីពីរនាក់ គឺលោក យាង សុធារិន និងលោក អ៊ួន ឈិន ត្រូវបានចាប់ខ្លួន និងចោទប្រកាន់ពីបទចារកម្ម ហើយត្រូវបានឃុំខ្លួនបណ្តោះអាសន្ន ។
នយោបាយ៖ នៅថ្ងៃទី២៧ ខែវិច្ឆិកា អាសនៈចំនួន៤៤ នៃរដ្ឋសភាជាតិរបស់គណបក្សសង្គ្រោះជាតិ ត្រូវបានធ្វើការបែងចែកជាថ្មីទៅឱ្យគណបក្សប្រជាជនកម្ពុជា និងគណបក្សតូចៗផ្សេងទៀតដែលមិនទទួលបានសំឡេងគាំទ្រពីប្រជាពលរដ្ឋ ។ ការបែងចែកនេះ ត្រូវបានធ្វើដោយយោងទៅលើវិសោធកម្មច្បាប់ស្តីពីគណបក្សនយោបាយដោយរដ្ឋសភាជាតិកាលពីខែកញ្ញា ។
បង្ហាញតាមប្រធានបទ៖ ដីធ្លី នយោបាយ ការងារ សង្គមស៊ីវិល បញ្ចេញមតិ
ការងារ៖ នៅថ្ងៃទី ៦ ខែកុម្ភៈ មានមនុស្ស ១៤នាក់ ត្រូវបានរងរបួសដោយសាអំពើហឹង្សាយ៉ាងធ្ងន់ធ្ងរ បន្ទាប់ពីអ្នកបើកបររថយន្តក្រុងដែលកំពុងតវ៉ា និងអ្នកគាំទ្ររបស់អ្នកទាំងនោះ ប្រហែលជា ៥០ នាក់ ត្រូវបានគេវាយដំ នៅពេលដែលពួកគេកំពុងធ្វើបាតុកម្មនៅក្បែរក្រុមហ៊ុនរថយន្តក្រុងកាពីតូល ក្នុងរាជធានីភ្នំពេញ ។ មានបុរសពាក់មួកសុវត្ថិភាពដែលប្រដាប់ដោយដំបងដែក ញញួរ និង ដំបងឈើ បានវាយធ្វើបាបទៅលើក្រុមបាតុករ និង កម្មករជាច្រើននាក់ ខណៈពេលនោះនគរបាលដែលបង្រ្កាបបាតុកម្ម និងមន្រ្តីនគរបាលផ្សេងៗទៀតដែលបានព្យាយាមបញ្ឈប់ការប្រើអំពើហឹង្សាមួយចំនួនក៏បានចូលរួមក្នុងការវាយដំនោះផងដែរ ។ ជនរងគ្រោះ ២ នាក់ ដែលបានតវ៉ានៅពេលនោះ ត្រូវបានចាប់ខ្លួន និងឃុំខ្លួនក្នុងពន្ធនាគាររយៈពេលជិត ពីរ ខែ ។ មិនមានសមាជិកនៃក្រុមដែលបានវាយដំលើអ្នកតវ៉ានៅពេលនោះ ត្រូវបានចាប់ខ្លួនឡើយ ។ នៅថ្ងៃដដែលនោះមេដឹកនាំសហជីពចំនួន ៤ នាក់ ត្រូវបានចោទប្រកាន់ពីបទប្រើអំពើហឹង្សា ទោះបីជាមានតែម្នាក់ក្នុងចំនោមអ្នកទាំង ៤ មានវត្តមាននៅក្នុងព្រឹត្តិការណ៍នោះក៏ដោយ ។
នយោបាយ៖ កាលពីថ្ងៃទី ១០ ខែមីនា រដ្ឋមន្រ្តីប្រតិភូអមនាយករដ្ឋមន្រ្តី លោក សោម សឿន បានប្តឹងលោក សម រង្ស៊ី អតីតប្រធានគណបក្សសង្គ្រោះជាតិ ពីបទបរិហារកេរ្តិ៍ ពាក់ព័ន្ធនឹងការបង្ហោះលើគេហទំព័រហ្វេសប៊ុករបស់លោក ដោយលោកបានចោទប្រកាន់ទៅលោក សឿន ថាបានណែនាំឲ្យសមាជិកគណបក្សប្រជាជនកម្ពុជា ជំរុញចំនួននៃ “អ្នកចូលចិត្ត” នៅលើគេហទំព័រហ្វេសប៊ុករបស់សម្តេចនាយករដ្ឋមន្ត្រី ដោយប្រើប្រាស់គណនីហ្វេសប៊ុកក្លែងក្លាយជាច្រើន ។
នយោបាយ៖ នៅថ្ងៃទី ២២ ខែមីនា មានសេចក្តីរាយការណ៍ថាលោក ហោ ណាំហុង រដ្ឋមន្រ្តីក្រសួងការបរទេសកម្ពុជា បានដាក់ពាក្យបណ្តឹងនៅប្រទេសបារាំងប្រឆាំងនឹងលោក សម រង្ស៊ី ដែលជាអតីតប្រធានគណបក្សសង្គ្រោះជាតិ ជុំវិញការបង្ហោះនៅលើគេហទំព័រហ្វេសប៊ុករបស់លោក សម រង្ស៊ី ដែលចោទប្រកាន់លោក ហោ ណាំហុង ថាជាប្រធានគុកមួយក្នុងរបបខ្មែរក្រហមនៅចុងទសវត្ស ១៩៧០ ។
នយោបាយ៖ នៅថ្ងៃទី ១១ ខែមេសា មានសមាជិកសភាតំណាងរាស្ត្រមកពីគណបក្សសង្គ្រោះជាតិលោក អ៊ុំ សំអាន ត្រូវបាននគរបាលខេត្តសៀមរាប ចាប់ខ្លួននៅពេលយប់ ពាក់ព័ន្ធនឹងបទអត្ថាធិប្បាយរបស់លោក ដែលលោកបានលើកឡើងកាលពីឆ្នាំ ២០១៥ ទាក់ទងនឹងជម្លោះលើការបោះបង្គោលព្រំដែនរវាងកម្ពុជា និងវៀតណាម ។ លោកត្រូវបានតុលាការចោទប្រកាន់ពីបទញុះញង់ នៅថ្ងៃបន្ទាប់មកទៀត ។
នយោបាយ៖ នៅថ្ងៃទី ២៤ ខែមេសា អង្គភាពប្រឆាំងអំពើពុករលួយ (ACU) បានចាប់ខ្លួនលោកមេឃុំ ស៊ាង ចែត ដែលជាមេឃុំមកពីគណបក្សសង្គ្រោះជាតិ ដោយចោទពីបទសូកប៉ាន់សាក្សីទាក់ទងទៅនឹងពាក្យបណ្តឹងដែលចុះហត្ថលេខាដោយកញ្ញា ខុម ចាន់តារាទី ដែលត្រូវបានគេអះអាងថាជាស្រីកំណាន់របស់លោក កឹម សុខា ដែលជាមេដឹកនាំគណបក្សជំទាស់ ។ រឿងរ៉ាវនេះត្រូវបានលាតត្រដាងដោយប្រព័ន្ធផ្សព្វផ្សាយព័ត៌មានហ្វ្រេសញូ (Fresh news) ដែលគាំទ្រគណបក្សប្រជាជនកម្ពុជា ។ លោក ស៊ាង ចែត ត្រូវបានគេចោទប្រកាន់ថាបានផ្តល់ប្រាក់ចំនួន ៥០០ ដុល្លារដល់ក្រុមគ្រួសាររបស់ កញ្ញា ចាន់តារាទី ដែលធ្វើឡើងក្នុងនាមលោក កឹមសុខា ។
សង្គមស៊ីវិល៖ កាលពីថ្ងៃទី ២ ខែឧសភា បុគ្គលិកជាន់ខ្ពស់ចំនួន ៤ នាក់ នៃអង្គការសិទ្ធិមនុស្ស អាដហុក រួមមានលោក នី សុខា លោក យី សុខសាន្ត អ្នកស្រី លឹម មុន្នី និងលោក ណៃ វង់ដា ត្រូវបានតុលាការចោទប្រកាន់ពីបទសូកប៉ាន់សាក្សី និងត្រូវបានបញ្ជូនខ្លួនទៅកាន់ពន្ធនាគារក្នុងរាជធានីភ្នំពេញ ។ អតីតបុគ្គលិករបស់អង្គការអាដហុក លោក នី ចរិយា ដែលទើបនឹងទទួលបានតំណែងជាអគ្គលេខាធិការរងនៃគណៈកម្មាធិការជាតិរៀបចំការបោះឆ្នោត ត្រូវបានចាប់ និងបញ្ជូនខ្លួនទៅពន្ធនាគារផងដែរ បន្ទាប់ពីតុលាការបានចោទប្រកាន់ពីបទសមគំនិតសូកប៉ាន់សាក្សី ។ ការចោទប្រកាន់នេះ ក៏ត្រូវបានតុលាការប្តឹងទៅលើលោក សឺន សាលី ដែលជាបុគ្គលិកនៃការិយាល័យឧត្តមស្នងការសិទ្ធិមនុស្សរបស់អង្គការសហប្រជាជាតិ (UNOHCHR) ផងដែរ ។ ទាំងបុគ្គលិកបច្ចុប្បន្ន និងអតីត របស់សមាគមអាដហុកទាំង ៥ នាក់ ត្រូវបានអង្គភាពប្រឆាំងអំពើពុករលួយកោះហៅ និងសាកសួរអស់រយៈពេល ប្រាំ ថ្ងៃ ទាក់ទងនឹងពាក្យបណ្តឹងដែលចុះហត្ថលេខាដោយកញ្ញា ខុម ចាន់តារាទី ដែលអាជ្ញាធរបានចោទប្រកាន់ថាមានទំនាក់ទំនងជាមួយនឹងលោក កឹម សុខា ដែលជាមេដឹកនាំគណបក្សប្រឆាំង ។ លោក សឺន សាលី នៅមានអភ័យឯកសិទ្ធិការទូតក្នុងនាមជាបុគ្គលិកអង្គការសហប្រជាជាតិ ប៉ុន្តែអង្គភាពប្រឆាំងអំពើពុករលួយ និងសម្តេចនាយករដ្ឋមន្រ្តី បែរជាអះអាងថាលោក សឺន សាលី មិនមានអភ័យឯកសិទិ្ធសម្រាប់ការពារពីការចោទប្រកាន់នោះទេ ។
សង្គមស៊ីវិល៖ នៅថ្ងៃទី ៩ ខែឧសភា កម្មករ និងសកម្មជនសិទ្ធិមនុស្សចំនួនប្រាំបីនាក់ ត្រូវបានអាជ្ញាធរឃុំខ្លួនក្នុងអំឡុងយុទ្ធនាការដំបូងនៃ “ថ្ងៃច័ន្ទពណ៌ខ្មៅ” ដើម្បីតវ៉ានឹងការចាប់ខ្លួនបុគ្គលិកសមាគមអាដហុកទាំង ៥នាក់ ។ ប្រាំមួយនាក់ក្នុងចំណោមប្រាំបីនាក់ ត្រូវបានចាប់ខ្លួននៅពេលដែលអ្នកទាំងនោះ បានធ្វើដំណើរទៅកាន់កន្លែងប្រមូលផ្តុំនៅខាងក្រៅពន្ធនាគារ ជាកន្លែងឃុំខ្លួនបុគ្គលិកអាដហុកទាំង ៥នាក់នោះ ។ អ្នកដែលត្រូវបានចាប់ខ្លួន រួមមាននាយកអង្គការលីកាដូ នាយកប្រតិបត្តិសមាគមធាងត្នោត និងតំណាងសហគមន៍បឹងកក់ និងបុរីកីឡា។ ក្រោយមកនគរបាល បានឃាត់ខ្លួន និងសាកសួរបុគ្គលិកបរទេសចំនួន ពីរនាក់ទៀត មកពីអង្គការលីកាដូ ទាក់ទងនឹងការតវ៉ានេះ ។
សង្គមស៊ីវិល៖ នៅថ្ងៃទី ១៨ ខែឧសភា រាជរដ្ឋាភិបាលបានគំរាមអង្គការលីកាដូ ថានឹងប្រើប្រាស់ច្បាប់ស្តីពីសមាគមនិងអង្គការមិនមែនរដ្ឋាភិបាលដែលទើបនឹងអនុម័តរួចថ្មីៗ មកលើអង្គការ លីកាដូ ។ អាជ្ញាធរបានចោទប្រកាន់អង្គការលីកាដូថាបានរំលោភលើកថាខណ្ឌ “អព្យាក្រឹតភាពនយោបាយ” នៅក្នុងច្បាប់ ដែលមានការចែងអត្ថន័យមិនច្បាស់លាស់ បន្ទាប់ពីអង្គការ លីកាដូ បានផ្សព្វផ្សាយបញ្ជីឈ្មោះអ្នកទោសនយោបាយនៅលើគេហទំព័ររបស់អង្គការ ។
នយោបាយ៖ នៅថ្ងៃទី២៦ ខែឧសភា អាជ្ញាធរបានព្យាយាមចាប់ខ្លួនប្រធានគណបក្សជំទាស់ លោក កឹម សុខា បន្ទាប់ពីលោកមិនព្រមចូលខ្លួនទៅឆ្លើយបំភ្លឺតាមដីកាដែលបានកោះហៅលើបទចោទរួមគ្នាជាមួយកញ្ញា ខុម ចាន់ដារ៉ាទី ។ លោក កឹម សុខា បានចំណាយពេលភាគច្រើនក្នុងឆ្នាំ ២០១៦ រស់នៅក្នុងទីស្នាក់ការកណ្តាលគណបក្សសង្គ្រោះជាតិ ដើម្បីជៀសផុតពីការចាប់ខ្លួននោះ ។
នយោបាយ៖ នៅថ្ងៃទី៣០ ខែឧសភា គណបក្សជំទាស់បានដាក់ញត្តិមួយស្នើទៅព្រះមហាក្សត្រក្នុងការបន្ធូរបន្ថយនូវវិបត្តិនយោបាយ ហើយក្នុងនោះមានអ្នកគាំទ្រប្រមាណ ១៧០.០០០នាក់ បានផ្តិតមេដៃគាំទ្រ ដែលអ្នកទាំងនោះក្លាយជាគោលដៅនៃការស៊ើបអង្កេត ។ យ៉ាងតិចណាស់មានសកម្មជន ១៨នាក់ដែលបានផ្តិតមេដៃនោះ ត្រូវបានអាជ្ញាធរឃុំខ្លួនអស់មួយរយៈនៅខែឧសភា និងខែមិថុនា ។ នគរបាលជាច្រើនរយនាក់ប្រដាប់ដោយឧស្ម័នបង្ហូរទឹកភ្នែកបានធ្វើសកម្មភាពបិទផ្លូវធំៗមួយចំនួននៅក្នុងរាជធានីភ្នំពេញ នៅថ្ងៃដែលគណបក្សជំទាស់បានព្យាយាមដាក់ញត្តិនោះស្នើទៅព្រះមហាក្សត្រ ។
សង្គមស៊ីវិល៖ នៅថ្ងៃទី១០ ខែកក្កដា លោកបណ្ឌិត កែម ឡី ត្រូវបានបាញ់សម្លាប់នៅស្ថានីយ៍ប្រេងឥន្ធនៈ កាល់តិច មួយនៅកណ្តាលទីក្រុងភ្នំពេញ ។ ជាអ្នកវិភាគនយោបាយ និងជាសហស្ថាបនិកក្នុងគណបក្សនយោបាយមួយ លោកត្រូវបានគេធ្វើឃាតទាំងកណ្តាលថ្ងៃ ។ ជាញឹកញាប់ លោកបណ្ឌិត កែម ឡី បានធ្វើការរិះគន់ទៅលើរាជរដ្ឋាភិបាលតាមរយៈប្រព័ន្ធផ្សព្វផ្សាយវិទ្យុ និងបណ្តាញសង្គមលើអ៊ិនធើណេត ។ ជនសង្ស័យ ដែលត្រូវបានចាប់ខ្លួន ប្រាប់ថាខ្លួនមានឈ្មោះ “ជួប សម្លាប់” ។ ជនសង្ស័យនេះបានសារភាពថាខ្លួនជាអ្នកសម្លាប់លោកបណ្ឌិត ប៉ុន្តែដោយឆ្លងកាត់ការស៊ើបអង្កេត និងការជំនុំជម្រះកន្លងមក គឺហាក់មិនបានធ្វើឡើងឱ្យគ្រប់ជ្រុងជ្រោយឡើយ ហើយត្រូវបានរងនូវការរិះគន់យ៉ាងខ្លាំងខ្លាពីបណ្តាអង្គការសង្គមស៊ីវិលជាតិ និងអន្តរជាតិជាច្រើន ។
ដីធ្លី៖ នៅថ្ងៃទី១៧ ខែសីហា សកម្មជនបឹងកក់២រូប អ្នកស្រី ទេព វន្នី និងអ្នកស្រី បូវ សុភា ត្រូវបានចោទប្រកាន់ និងបញ្ជូនទៅឃុំខ្លួនក្នុងពន្ធនាគារដោយសារសកម្មភាពរបស់អ្នកទាំងពីរទាក់ទងទៅនឹង “យុទ្ធនាការថ្ងៃច័ន្ទពណ៌ខ្មៅ” ជាការតវ៉ាស្នើសុំឲ្យដោះលែងអ្នកការពារសិទ្ធិមនុស្សដែលជាប់នៅក្នុងពន្ធនាគារទាំង ៥នាក់ ។ អ្នកទាំងពីរត្រូវបានចាប់ខ្លួនកាលពីថ្ងៃទី ១៥ ខែសីហា នៅកំឡុងពេលការតវ៉ាដោយអហិង្សា និងប្រើប្រាស់ភ្លើងទៀន ។
សង្គមស៊ីវិល៖ នៅថ្ងៃទី២២ ខែសីហា បុគ្គលិកអង្គការសមធម៌កម្ពុជាចំនួន ៣នាក់ ត្រូវបានផ្តន្ទាទោសក្រោមបទបរិហាកេរ្តិ៍ ដែលមិនសមហេតុផលមួយ ទាក់ទងនឹងការងារឯកជននៃការវាយតម្លៃផ្ទៃក្នុងទៅលើអតីតបុគ្គលិករបស់អង្គការនេះ ។ សំណុំរឿងនេះត្រូវបានពន្យារពេលបន្ទាប់ពីមេធាវីការពារក្តី បានចង្អុលបង្ហាញថាចៅក្រមជំនុំជម្រះ និងចៅក្រមស៊ើបសួរគឺជាចៅក្រមតែមួយក្នុងរឿងក្តីនេះ ដែលជាការផ្ទុយនឹងច្បាប់កម្ពុជា ។
នយោបាយ៖ នៅថ្ងៃទី១ ខែកញ្ញា កងយុទ្ធពលខេមរភូមិន្ទ បានប្រើឧទ្ធម្ភាគចក្រហោះទៅវិញទៅមកម្តងហើយម្តងទៀត នៅលើទីស្នាក់ការកណ្តាលគណបក្សសង្គ្រោះជាតិ ជាកន្លែងដែលលោក កឹម សុខា ស្នាក់នៅ ខណៈដែលទូកល្បឿនលឿនយោធាដែលប្រដាប់កាំភ្លើងយន្ត និងទាហានមកពីកងអង្គរក្សសម្តេចនាយករដ្ឋមន្ត្រី បានឡោមព័ទ្ធពីក្រោយទីស្នាក់ការនោះផងដែរ ។ ជាច្រើនសប្តាហ៍ក្រោយមក ការបង្ហាញកងកម្លាំងប្រដាប់អាវុធនៅតែបន្តមាន នៅមុខអគារទីស្នាក់ការកណ្តាលគណបក្សសង្គ្រោះជាតិនារាជធានីភ្នំពេញ ។ ការបង្ហាញកងកម្លាំង ត្រូវបានធ្វើឡើង ក្រោយពេលមានសេចក្តីថ្លែងការណ៍របស់នាយឧត្តមសេនីយ៍ ដែលជាមេទ័ពនៃកងយុទ្ធពលខេមរភូមិន្ទ លោក គន់ គីម ដែលបានប្រកាសថាកងកម្លាំងប្រដាប់អាវុធរបស់លោក បានត្រៀមខ្លួនជាស្រេចក្នុងការចាប់ខ្លួនមេដឹកនាំគណបក្សជំទាស់រូបនេះ បើទោះបីជាត្រូវកើតមានការប៉ះទង្គិចគ្នាដោយហិង្សាបង្ហូរឈាមយ៉ាងណាក៏ដោយ ។
នយោបាយ៖ នៅថ្ងៃទី៩ ខែកញ្ញា មេដឹកនាំបក្សជំទាស់ លោក កឹម សុខា ត្រូវបានកាត់ទោស និងផ្តន្ទាទោសដោយកំបាំងមុខក្រោមបទចោទ “បដិសេធមិនបង្ហាញខ្លួនក្នុងនាមជាសាក្សី” បន្ទាប់ពីក្រុមអ្នកច្បាប់របស់លោក បានអះអាងថាលោកមានអភ័យឯកសិទ្ធិសភា ដើម្បីជៀសវាងការជំនុំជម្រះមិនត្រឹមត្រូវនេះ ។ ទោះយ៉ាងណា លោក ត្រូវបានតុលាការផ្តន្ទាទោសឲ្យជាប់ពន្ធនាគារអស់រយៈពេល ៥ខែ ។
សង្គមស៊ីវិល៖នៅថ្ងៃទី២២ ខែកញ្ញា លោក នី ចរិយា អតីតបុគ្គលិកសមាគមអាដហុក (ADHOC) និងជាសមាជិកនៃគណកម្មាធិការជាតិរៀបចំការបោះឆ្នោត ត្រូវបានសាលាដំបូងរាជធានីភ្នំពេញសម្រេចផ្តន្ទាទោសក្រោមបទចោទបរិហារកេរ្តិ៍ជាសាធារណៈ បរិហារបង្កាច់កេរ្តិ៍ និងពីបទផ្សព្វផ្សាយនូវការអត្ថាធិប្បាយ ដើម្បីធ្វើសម្ពាធលើយុត្តាធិការ ។ សំណុំរឿងនេះជាប់ពាក់ព័ន្ធនឹងសេចក្តីថ្លែងការណ៍របស់លោកដោយបានធ្វើឡើងកាលពីឆ្នាំ២០១៥ ក្នុងនាមបុគ្គលិកសមាគមអាដហុកនៅក្នុងសន្និសីទសារព័ត៌មានមួយ ដែលលោកបានទទូចឱ្យមានការស៊ើបអង្កេតលើភាពមិនប្រក្រតី និងអំពាវនាវឱ្យដោះលែងជនរងគ្រោះ ២រូបនៃជម្លោះដីធ្លីមួយ ។ នេះ គឺជាការប្រើប្រាស់លើកដំបូងនៃបទប្បញ្ញត្តិក្នុងក្រមព្រហ្មទណ្ឌថ្មីដើម្បីចោទប្រកាន់ទៅលើអ្នកដែលធ្វើការរិះគន់ទៅលើប្រព័ន្ធយុត្តាធិការ ។
សង្គមស៊ីវិល/ដីធ្លី៖ នៅថ្ងៃទី១០ ខែតុលា សកម្មជនដីធ្លីម្នាក់ លោក ច័ន្ទ ពុទ្ធិស័ក និងអ្នកគ្រប់គ្រងកម្មវិធីផ្នែកឃ្លាំមើលសិទ្ធិមនុស្សរបស់អង្គការលីកាដូ លោក អំ សំអាត ត្រូវបានវាយដំដោយសន្តិសុខខណ្ឌដូនពេញនៅអំឡុងពេលចូលរួមការដង្ហែក្បួនដោយអហិង្សា ដើម្បីប្រារព្ធទិវាអន្តរជាតិលំនៅឋាននៅក្រុងភ្នំពេញ ។ អ្នកទាំងពីរបានរងការវាយដំត្រង់ក្បាល ក ខ្នង និងទ្រូង។ ព្រឹត្តិការណ៍នោះ ត្រូវបានធ្វើឡើងដើម្បីអំពាវនាវឱ្យបញ្ឈប់នូវការរំលោភយកដី និងស្នើសុំឱ្យអាជ្ញាធរគោរពសិទ្ធិដីធ្លី និងលំនៅដ្ឋាន ។
នយោបាយ៖ នៅថ្ងៃទី១៣ ១៤ និង១៥ ខែវិច្ឆិកា នៅអំឡុងថ្ងៃឈប់សម្រាកនាឱកាសបុណ្យអុំទូក អកអំបុក និងសំពះព្រះខែ អាជ្ញាធរកម្ពុជាបានធ្វើការយាយី រារាំង និងបញ្ឈប់ទៅលើសកម្មភាពចុះឈ្មោះបោះឆ្នោត សកម្មភាពអប់រំ និងផ្សព្វផ្សាយដែលត្រូវបានធ្វើឡើងដោយយុវជនស្ម័គ្រចិត្តនៅភ្នំពេញ និងតាមបណ្តាខេត្ត ។ ក្នុងចំណោមនោះមានយុវជនមួយចំនួនត្រូវបានឃុំខ្លួនមួយរយៈពេលខ្លី ជុំវិញការធ្វើយុទ្ធនាការនេះ ។
បង្ហាញតាមប្រធានបទ៖ ដីធ្លី នយោបាយ ការងារ សង្គមស៊ីវិល បញ្ចេញមតិ
សង្គមស៊ីវិល៖ នៅថ្ងៃទី២៣ ខែកុម្ភៈ មន្ត្រីអាជ្ញាធរកម្ពុជាបានបដិសេធក្នុងការបន្តទិដ្ឋាការដល់សកម្មជនបរិស្ថាន លោក Alejandro Gonzalez-Davidson ដែលជាសមាជិកនៃអង្គការមាតាធម្មជាតិ ដែលកំពុងព្យាយាមបញ្ឈប់ការអភិវឌ្ឍទៅលើទំនប់វារីអគ្គិសនីនៅជ្រលងអារ៉ែងនៃខេត្តកោះកុង ។ លោក Gonzalez-Davidson ត្រូវបានបណ្តេញចេញពីកម្ពុជា ឲ្យទៅប្រទេសថៃបន្ទាប់ពីលោកត្រូវបានអាជ្ញាធរចាប់ខ្លួន និងបង្ខំឲ្យចូលក្នុងរថយន្ត បន្ទាប់ពីសម្តេចនាយករដ្ឋមន្ត្រី បានព្រមានក្នុងសេចក្តីថ្លែងការណ៍ជាសាធារណៈមួយ ។
សង្គមស៊ីវិល៖ នៅថ្ងៃទី១៩ ខែមីនា រដ្ឋសភាកម្ពុជាបានធ្វើវិសោធនកម្មច្បាប់ស្តីពីការបោះឆ្នោតជ្រើសតាំងតំណាងរាស្ត្រ ដើម្បីធ្វើការពិន័យ និងហាមឃាត់ដល់អង្គការមិនមែនរដ្ឋាភិបាលមួយចំនួន ដែលរិះគន់ដល់គណបក្សនយោបាយ នៅមុនពេល២១ថ្ងៃ នៃយុទ្ធនាការនៃការបោះឆ្នោត ។
សង្គមស៊ីវិល៖ នៅថ្ងៃទី២៩ ខែមេសា លោក សុខ ផល អគ្គនាយកនៃនាយកដ្ឋានអន្តោប្រវេសន៍ បានគម្រាមថានឹងចាត់វិធានការណ៍ទៅលើឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន (UNOHCHR) ដោយចោទប្រកាន់ថាស្ថាប័ននេះបានឃុបឃិតជាមួយជនភៀសខ្លួន ដែលជាជនជាតិម៉ុងតាញ៉ា ដែលលោកបានហៅថាជា “ជនជាតិវៀតណាមខុសច្បាប់” ។ លោកបានអះអាងថា “ច្បាប់កម្ពុជាបាន ចែងហើយថា ជនណាដែលបានឃុបឃិតជាមួយជនអន្តោប្រវេសន៍ខុសច្បាប់នឹងត្រូវមានទោស ។ នៅត្រឹមថ្ងៃទី១ ខែឧសភា ឆ្នាំ២០១៥ រាជរដ្ឋាភិបាលបានបណ្តេញអ្នកស្វែងរកសិទ្ធិជ្រកកោនជាជនជាតិវៀតណាមចំនួន ៥៤ នាក់ ដែលភាគច្រើន គឺជាសមាជិកក្រុមជនជាតិដើមភាគតិច ដែលត្រូវបានគេចាត់ថាជាបណ្តុំធំមួយនៃក្រុមជនជាតិម៉ុងតាញ៉ា ដែលបានប្រឈមនឹងការធ្វើទុកបុកម្នេញពីអាជ្ញាធរវៀតណាម ។
នយោបាយ៖ នៅថ្ងៃទី២១ ខែកក្កដា មន្ត្រី និងអ្នកគាំទ្រគណបក្សសង្គ្រោះជាតិចំនួន ១១នាក់ ត្រូវបានផ្តន្ទាទោសឱ្យជាប់ចោទទាក់ទងនឹងការបះបោរ និងត្រូវបានផ្តន្ទាទោសដាក់ពន្ធនាគារចន្លោះពី ៧ទៅ២០ឆ្នាំ ។ ក្នុងចំណោមមេធាវីដែលការពារក្តីទាំង ៩រូប មានមេធាវីតែម្នាក់គត់ ដែលមានវត្តមាននាពេលសវនាការ ហើយបានធ្វើការស្នើសុំពន្យារពេលសវនាការ ប៉ុន្តែត្រូវបានតុលាការបដិសេធ ។ នគរបាលបានព្យាយាមចូលទៅក្នុងបន្ទប់សវនាការ នៅពេលដែលតុលាការថយចូលទៅបន្ទប់ពិចារណា ។ មន្ត្រីនិងអ្នកគាំទ្រទាំង ១១នាក់នោះ ត្រូវបានចាប់ខ្លួន ដោយសារការតវ៉ាដែលបានធ្វើអោយកើតមាននូវអំពើហិង្សានៅថ្ងៃទី១៥ ខែកក្កដា ឆ្នាំ២០១៤ នៅទីលានប្រជាធិបតេយ្យ ។ មិនមានដើមបណ្តឹងឡើយក្នុងរឿងក្តីនេះ ដែលអាចបញ្ជាក់ថាអ្នកទាំង ១១នាក់នោះ មានចេតនាក្នុងការធ្វើឲ្យកើតមាននូវអំពើហិង្សានៅក្នុងព្រឹត្តិការណ៍នោះ ។
ការងារ៖ នៅថ្ងៃទី៨ ខែសីហា លោក ឈូក បណ្ឌិត បានចូលខ្លួនទៅសារភាពចំពោះមុខសមត្ថកិច្ច បន្ទាប់ពីសម្តេចនាយករដ្ឋមន្ត្រី បានបង្គាប់ឲ្យចាប់ខ្លួន ។ គួររំលឹកថាកាលពីឆ្នាំ ២០១២ លោកបណ្ឌិត បានបាញ់ទៅលើក្រុមកម្មករតវ៉ា ដែលបានធ្វើឱ្យមានមនុស្សចំនួន ៣នាក់ រងរបួស ហើយគាត់ត្រូវបានតុលាការផ្តន្ទាទោសឲ្យជាប់ពន្ធនាគារនៅឆ្នាំ ២០១៣ ។ លោកត្រូវបានអាជ្ញាធរបញ្ជូនទៅមណ្ឌលអប់រំកែប្រែទី១ (ម១) នៅខែធ្នូ ប៉ុន្តែក្រោយមកនៅចុងឆ្នាំនោះ គាត់ក៏ត្រូវបានបញ្ជូនទៅមន្ទីរពេទ្យមិត្តភាពខ្មែរ-សូវៀតដើម្បីទទួលការព្យាបាលជម្ងឺ ។
សង្គមស៊ីវិល៖ ច្បាប់ស្តីពីសមាគមនិងអង្គការមិនមែនរដ្ឋាភិបាល បានចូលជាធរមាននៅថ្ងៃទី១២ ខែសីហា ។ សម្ព័ន្ធអង្គការសង្គមស៊ីវិលជាតិ និងអន្តរជាតិជាច្រើនបានរូមគ្នាជំទាស់នឹងច្បាប់មួយនេះអស់ពេលយូរឆ្នាំមកហើយ ដោយបានរកឃើញថាច្បាប់នេះមានការរឹតត្បិតហួសហេតុ និងមានភាពផ្ទុយពីរដ្ឋធម្មនុញ្ញ និងច្បាប់អន្តរជាតិផ្សេងទៀត ។ ច្បាប់ស្តីពីសមាគមនិងអង្គការមិនមែនរដ្ឋាភិបាលនេះបានបញ្ញត្តិឱ្យមានលក្ខខណ្ឌតម្រូវយ៉ាងតឹងរឹង និងចោទប្រកាន់ពីបទល្មើសព្រហ្មទណ្ឌ ប្រសិនបើក្រុមអង្គការឬសមាគមណាមួយមិនចុះបញ្ជីទៅតាមបញ្ញត្តិនៃច្បាប់ ។ ក្រោយមកច្បាប់នេះ ក៏ត្រូវបានគេប្រើប្រាស់ក្នុងការបញ្ឈប់នូវសកម្មភាពការពារសិទ្ធិមនុស្សរបស់អង្គការមិនមែនរដ្ឋាភិបាលដោយគ្មានមូលដ្ឋានត្រឹមត្រូវ ។
នយោបាយ៖ នៅថ្ងៃទី១៥ ខែសីហា នគរបាលបានចាប់ខ្លួនលោក ហុង សុខហួរ សមាជិកព្រឹទ្ធសភាគណបក្សសមរង្ស៊ី ក្នុងរយៈពេល១ថ្ងៃ បន្ទាប់ពីសម្តេចនាយករដ្ឋមន្ត្រី បង្គាប់ឱ្យមានចាប់ខ្លួនលោកជាបន្ទាន់ ។ លោកត្រូវបានអាជ្ញាធរចាប់ខ្លួនពាក់ព័ន្ធនឹងវីឌីអូមួយ ដែលលោកបានបង្ហោះតាមរយៈបណ្តាញសង្គមហ្វេសបុក ដែលបង្ហាញនូវឯកសារមួយចំនួនទាក់ទងនឹងប្រវត្តិព្រំដែនកម្ពុជា-វៀតណាម ។ ដីកាចាប់ខ្លួន ត្រូវបានចេញ និងបង្គាប់ឲ្យចាប់ខ្លួនសមាជិកយុវជនគណបក្សសង្គ្រោះជាតិ ៣នាក់ ផ្សេងទៀត ដែលជាប់ពាក់ព័ន្ធនឹងវីឌីអូនោះដែរ ។ ២ថ្ងៃបន្ទាប់ពីនោះ សមាជិកព្រឹទ្ធសភាគណបក្សប្រជាជនបានបោះឆ្នោតជាឯកច្ឆ័ន្ធ ដើម្បីដកអភ័យឯកសិទ្ធិរបស់លោក ។
សង្គមស៊ីវិល៖ នៅថ្ងៃទី១៧ ខែសីហា សកម្មជននៃអង្គការមាតាធម្មជាតិ ៣នាក់ ត្រូវបានចាប់ខ្លួនជុំវិញសកម្មភាពរបស់អ្នកទាំងនោះ ក្នុងការធ្វើយុទ្ធនាការបញ្ឈប់ការបូបខ្សាច់ចេញពីទន្លេ និងបណ្តាមាត់ពាមផ្សេងទៀតនៅជុំវិញខេត្តកោះកុង ហើយក្រោយមកអ្នកទាំង ៣នាក់ ត្រូវបានបញ្ជូនទៅឃុំខ្លួនបណ្តោះអាសន្ននៅពន្ធនាគារ ។
សង្គមស៊ីវិល៖ នៅថ្ងៃទី២ ខែកញ្ញា ក្រុមអ្នកតវ៉ាចំនួន ១៧នាក់ ដែលរួមមានសមាជិកសហគមន៍ បុគ្គលិកអង្គការមិនមែនរដ្ឋាភិបាល និងបុគ្គលិកសារព័ត៌មាន ត្រូវបានឃាត់ខ្លួននៅក្នុងស្នងការដ្ឋាននគរបាលខេត្តកោះកុង បន្ទាប់ពីមានការជួបជុំគ្នា ដើម្បីទាមទាររកនូវដំណោះស្រាយជម្លោះដីធ្លីរាំរ៉ៃមួយ ។ សហគមន៍ជីខក្រោម ដែលជាប់ពាក់ព័ន្ធនឹងវិវាទដីធ្លីជាមួយឧកញ្ញា ហេង ហ៊ុយ ។ សមាជិកសហគមន៍ចំនួន ៩នាក់ត្រូវបានកោះហៅជុំវិញការដឹកនាំឲ្យមានការជួបជុំគ្នាតវ៉ានៅមុខតុលាការខេត្ត ដើម្បីគាំទ្រសមាជិកសហគមន៍ជាច្រើនដែលជាប់ឃុំនោះ ។ អ្នកទាំងនោះ ត្រូវបានឃាត់ខ្លួនអស់រយៈពេលជិត៨ម៉ោង ។
ផ្សេងៗ៖ នៅខែតុលា មនុស្សពីរនាក់ ដែលត្រូវបានគេឃុំខ្លួនដោយខុសច្បាប់នៅមណ្ឌលព្រៃស្ពឺ បានស្លាប់បាត់បង់ជីវិត ។ បុរសម្នាក់ត្រូវបានសង្ស័យថាស្លាប់ដោយសារលង់ទឹក ចំណែកឯស្ត្រីម្នាក់ទៀតបានស្លាប់ ប៉ុន្តែត្រូវបានគេយកសពទៅបូជានៅមុនពេលរកឃើញពីមូលហេតុដែលបណ្តាលឲ្យស្លាប់ ។ មណ្ឌលនេះធ្លាប់មានប្រវត្តិទាក់ទងនឹងការរំលោភសិទ្ធិមនុស្សជាច្រើន និងការមិនយកចិត្តទុកដាក់ទៅលើអ្នកជាប់ក្នុងមណ្ឌលនោះ ។
នយោបាយ៖ នៅថ្ងៃទី០៧ ខែតុលា លោក វ៉ែន វ៉ន សមាជិកក្រុមប្រឹក្សាឃុំនៃគណបក្សប្រជាជន កម្ពុជាត្រូវបានចាប់ខ្លួន និងចោទប្រកាន់បទល្មើសដែលទាក់ទងនឹងភាពសកម្មរបស់លោក ក្នុងការជំទាស់ការសាងសង់ទំនប់វារីអគ្គីសនីនៅតំបន់អារ៉ែង ក្រោយមកលោក វ៉ន ត្រូវបានបញ្ជូនទៅឃុំខ្លួននៅពន្ធនាគារខេត្តកោះកុង ។
នយោបាយ៖ នៅថ្ងៃទី២៦ ខែតុលា សមាជិកសភាតំណាងរាស្ត្រនៃគណបក្សសង្រ្គោះជាតិ ២នាក់ គឺលោក គង់ សភា និង លោក ញាយ ចំរើន ត្រូវបានទាញទំលាក់ពីរថយន្តនៅមុខអគាររដ្ឋសភាជាតិ និងត្រូវបានវាយដំយ៉ាងធ្ងន់ធ្ងរ ពីសំណាក់អ្នកតវ៉ាដែលគាំទ្រគណបក្សប្រជាជនកម្ពុជា ដែលបានប្រមូលផ្តុំធ្វើការតវ៉ាឲ្យមានការដកតួនាទីឯកឧត្តម កឹម សុខា ពីតួនាទីអនុប្រធានរដ្ឋសភាជាតិ ។ បន្ទាប់មកបុរសចំនួន ៣នាក់ ដែលត្រូវបានគេដឹងជាកងអង្គរក្សរបស់សម្ដេចនាយករដ្ឋមន្ត្រី ត្រូវបានផ្តន្ទាទោសដាក់ពន្ធនាគារ ៤ឆ្នាំ តែព្យូរទោសបីឆ្នាំ ពីបទវាយដំ មានន័យថាបុរសទាំងបីនាក់ត្រូវបានជាប់ពន្ធនាគារតែ ១ឆ្នាំប៉ុណ្ណោះ ។ នៅពេលដែលអង្គរក្សទាំងបីនាក់ត្រូវបានដោះលែងពីពន្ធនាគារ តួនាទីរបស់អ្នកទាំង ៣ក៏ត្រូវបានតម្ដើងស័ក្ត ។
នយោបាយ៖ នៅថ្ងៃទី១៣ ខែវិច្ឆិកា សាលាដំបូងរាជធានីភ្នំពេញ បានចេញដីកាបង្គាប់ឱ្យចាប់ខ្លួន ឯកឧត្តម សម រង្ស៊ី ប្រធានគណបក្សសង្គ្រោះជាតិ ដោយផ្តើមចេញពីសំណុំរឿងបទចោទប្រកាន់ពីការបរិហាកេរ្តិ៍ និងញុះញង់ឲ្យមានចលាចលដល់សង្គមកាលពីឆ្នាំ២០១១ ដែលមានសាលក្រមស្ថាពរនៅឆ្នាំ ២០១៣ ។ ការចេញដីកាបង្គាប់ឲ្យចាប់ខ្លួននេះត្រូវបានធ្វើឡើងមួយថ្ងៃបន្ទាប់ពីលោកនាយករដ្ឋមន្ត្រី គម្រាមពីវិធានការផ្លូវច្បាប់ចំពោះការបញ្ចេញមតិរបស់ឯកឧត្តម ដែលបានចោទជាសំណួរថាតើ គណបក្សប្រជាជនកម្ពុជាមានការប្តេជ្ញាចិត្តពិតប្រាកដក្នុងការរៀបចំការបោះឆ្នោតដែរឬទេ ។ ឯកឧត្តម សម រង្ស៊ី ក៏បាននិរទេសខ្លួនដោយខ្លួនឯងទៅបរទេស គេចពីការចាប់ខ្លួន ។
ផ្សេងៗ៖ នៅថ្ងៃទី៣០ ខែវិច្ជិកា រដ្ឋសភាជាតិបានអនុម័តច្បាប់ស្តីពីទូរគមនាគមន៍ ដែលបានផ្តល់អំណាចដ៏ទូលំទូលាយដល់រាជរដ្ឋាភិបាល ក្នុងការគ្រប់គ្រងការបង្ហោះតាមអ៊ីនធើណេត និងអ្នកផ្តល់សេវាអ៊ីនធើណេតជាដើម ។
សង្គមស៊ីវិល៖ នៅថ្ងៃទី០៦ ខែធ្នូ អង្គការលីកាដូ បានផ្អាកការប្រារព្ធទិវាសិទ្ធិមនុស្សអន្តរជាតិក្នុងពន្ធនាគារចំនួន ១៨កន្លែង ដោយសារមានការរឹតបន្តឹងពីអគ្គនាយកដ្ឋានពន្ធនាគារ ។ ជាលើកទីមួយក្នុងរយៈពេល ២០ឆ្នាំ ដែលអង្គការលីកាដូ ត្រូវបានអាជ្ញាធរហាមឃាត់ដោយមិនឱ្យប្រារព្ធពិធី និងការចែកកញ្ចប់ជំនួយមនុស្សធម៌ដល់អ្នកទោស នៅទិវាសិទ្ធិមនុស្សអន្តរជាតិ ។
បង្ហាញតាមប្រធានបទ៖ ដីធ្លី នយោបាយ ការងារ សង្គមស៊ីវិល បញ្ចេញមតិ
សង្គមស៊ីវិល៖ នៅថ្ងៃទី២ ខែមករា អង្គភាពយោធាពិសេសលេខ ៩១១ បានបាញ់បង្រ្កាបដោយហិង្សាទៅលើកម្មករដែលតវ៉ា និងមេដឹកនាំសហជីព ។ គេជឿជាក់ថាមានមន្ត្រីអង្គការសង្គមស៊ីវិល និងមេដឹកនាំសហជីព ចំនួនដប់នាក់ ត្រូវបានអាជ្ញាធរឃាត់ខ្លួននៅក្នុងមូលដ្ឋានអង្គភាពយោធាពិសេសលេខ ៩១១ ហើយមនុស្សមួយចំនួន ត្រូវបានគេវាយដំយ៉ាងដំណំ អំឡុងពេលចាប់ខ្លួនអ្នកទាំងនោះទៀតផង ។
ការងារ៖ នៅថ្ងៃទី៣ ខែមករា ឆ្នាំ២០១៤ ពលរដ្ឋស៊ីវិល ៤នាក់ ត្រូវបានបាញ់សម្លាប់ និង២១នាក់ផ្សេងទៀតបានរងរបួសនៅក្បែរតំបន់ឧស្សាហកម្មកាណាឌីយ៉ានៅបណ្តោយមហាវិថីវេងស្រេង ។ ពលរដ្ឋស៊ីវិលជាច្រើននាក់ទៀត ត្រួវបានចាប់ខ្លួន និងវាយដំដោយកងរាជអាវុធហត្ថ ដើម្បីជាការបង្រ្កាបទៅលើការធ្វើបាតុកម្ម ហើយកម្មករដែលតវ៉ាជាច្រើនផ្សេងទៀត រងរបួសដោយការបាញ់ឧស្ម័នបង្ហូរទឹកភ្នែក គ្រាប់រំសេវ និងគ្រាប់បែកដោយដៃ ។ យុវជនម្នាក់ឈ្មោះ ឃឹម សុផាត អាយុ ១៥ឆ្នាំ បានបាត់ខ្លួន និងមិនទទួលបានដំណឹងថានៅទីណាមកដល់បច្ចុប្បន្ន ។
នយោបាយ៖ នៅថ្ងៃទី៤ ខែមករា នគរបាល និងកងរាជអាវុធហត្ថជាច្រើននាក់ បានធ្វើការបិទផ្លូវនៅជុំវិញទីលានប្រជាធិបតេយ្យ ហើយបានចូលទៅបណ្តេញក្រុមអ្នកតវ៉ារបស់គណបក្សសង្គ្រោះជាតិចេញពីទីលាននោះ ដែលក្នុងចំណោមអ្នកតវ៉ាមានព្រះសង្ឃ និងស្ត្រីដែលមានកូនតូចមកជាមួយផងដែរ ។ ក្រុមមនុស្សស៊ីឈ្នួលដែលមានចងក្រណាត់ដៃពណ៌ក្រហម បានប្រើប្រាស់នូវដំបងដែក ដើម្បីវាយដំ និងបំភិតបំភ័យទៅលើក្រុមអ្នកតវ៉ាដែលកំពុងនៅក្នុងទីលាន ដែលគ្មានអាវុធ ។
បញ្ចេញមតិ៖ នៅថ្ងៃទី៦ ខែមីនា អ្នកកាសែត ២នាក់នៅខេត្តបន្ទាយមានជ័យត្រូវបានចោទប្រកាន់ពីបទបរិហាកេរ្តិ៍ជាសាធារណៈ ដោយមន្ត្រីយោធាម្នាក់នៃកងពលតូចលេខ ៧០ បន្ទាប់ពីមានការរាយការណ៍ថាមន្ត្រីយោធានេះមានជាប់ពាក់ព័ន្ធនឹងការរំលោភយកដី ។
បញ្ចេញមតិ៖ នៅថ្ងៃទី១០ ខែមីនា អ្នកកាសែត ៣នាក់ ត្រូវបានបញ្ឈប់ពីការងារក្នុងរយៈពេល ៥នាទី បន្ទាប់ពីមានការថតរូបមន្ត្រីកងរាជអាវុធហត្ថដឹកឈើប្រណិតនៅក្នុងខេត្តក្រចេះ ។
សង្គមស៊ីវិល៖ នៅថ្ងៃទី៨ ខែមេសា អង្គការពន្លកខ្មែរ ត្រូវបានគម្រាមឱ្យបិទការិយាល័យ ដោយលិខិតមួយរបស់ក្រសួងមហាផ្ទៃ ចេញដោយអភិបាលខេត្តព្រះវិហារ ។ ក្រោយមកបុគ្គលិកម្នាក់នៃអង្គការនេះ ត្រូវបានកោះហៅឲ្យចូលខ្លួនទៅបំភ្លឺនៅស្នងការដ្ឋាននគរបាលខេត្ត ជាមួយនឹងសមាជិកសហគមន៍ ២នាក់ ផ្សេងទៀត ។
បញ្ចេញមតិ៖ នៅថ្ងៃទី២ ខែឧសភា មន្ត្រីអាជ្ញាធរបានវាយដំទៅលើអ្នកកាសែតវិទ្យុសម្លេងប្រជាធិបតេយ្យ VOD ម្នាក់ឈ្មោះ ឡាយ សាមាន នៅកំឡុងពេលលោកកំពុងថតរូបមន្ត្រីអាជ្ញាធរជាច្រើន កំពុងប្រើហិង្សាទៅលើព្រះសង្ឃនៅទីលានប្រជាធិបតេយ្យ ។ ការវាយដំ និងការប្រើហិង្សាដ៏ឃោរឃៅ ដែលប្រព្រឹត្តឡើងដោយកងកម្លាំងសន្តិសុខប្រមាណ ១០នាក់នេះ បានធ្វើឲ្យ លោកសាមាន រងរបួសត្រង់ថ្ពាល់ ភ្នែក និងមាត់ ។
ការងារ៖ នៅថ្ងៃទី២៣ ខែឧសភា សកម្មជនសហជីពចំនួន ៨នាក់ ត្រូវបានចាប់ខ្លួន អំឡុងដែលអ្នកទាំងនោះតវ៉ាឱ្យមានការធ្វើឲ្យប្រសើរឡើងនូវលក្ខខណ្ឌការងារ ។ នៅ២ថ្ងៃបន្ទាប់ពីនោះ ពួកគាត់ត្រូវបានចោទប្រកាន់ពីបទព្រហ្មទណ្ឌជាច្រើនករណី រួមមានការញុះញង់ និងការគម្រាមគំហែងថានឹងបង្កអោយមានការខូចខាត ។
សង្គមស៊ីវិល៖ នៅថ្ងៃទី២៥ ខែឧសភា សកម្មជនបរិស្ថានម្នាក់មកពីបណ្តាញសហគមន៍ព្រៃឡង់ ត្រូវបានចាក់ដោយកងអង្គភាពស្រាវជ្រាវយោធាម្នាក់នៅខេត្តកំពង់ធំ បន្ទាប់ពីសកម្មជនម្នាក់នេះបានបង្ហាញឲ្យដឹងថា មន្ត្រីយោធាម្នាក់នោះ ពាក់ព័ន្ធនឹងការកាប់ឈើដោយខុសច្បាប់កាលពីឆ្នាំមុន ។
សង្គមស៊ីវិល៖ នៅថ្ងៃទី៣០ ខែឧសភា សាលាដំបូងរាជធានីភ្នំពេញបានចេញសាលក្រមផ្តន្ទាទោសហើយសម្រេចព្យួរទោស បុរសចំនួន ២៣ នាក់ និងអនីតិជន ២នាក់ទៀត ដែលត្រូវបានចាប់ខ្លួននៅអំឡុងពេលនៃការតវ៉ាដែលធ្វើឡើងក្នុងខែវិច្ឆិកា ឆ្នាំ២០១៣ និងខែមករា ឆ្នាំ២០១៤ ។ ការផ្តន្ទាទោសនេះរួមមានទាំងការពិន័យជាប្រាក់យ៉ាងច្រើន ហើយនីតិវិធីជំនុំជម្រះរឿងក្តីនេះ មានភាពមិនប្រក្រតីជាច្រើន និងមានការថ្កោលទោសពីសាធារណជនជាតិ និងអន្តរជាតិយ៉ាងខ្លាំងខ្លា ។
នយោបាយ៖ នៅថ្ងៃទី១៥ ខែកក្កដា ព្រឹត្តិការណ៍មួយដែលរៀបចំដោយតំណាងរាស្ត្រមកពីគណបក្សសង្រ្គោះជាតិ និងអ្នកគាំទ្រប្រមាណ ៣០០នាក់ នៅក្បែររបាំងបិទទីលានប្រជាធិបតេយ្យ បានក្លាយជាការប្រើប្រាស់អំពើហិង្សាយ៉ាងសាហាវ ។ ដំបូងឡើយកងកម្លាំងសមត្ថកិច្ចបានព្យាយាមចូលទៅបំបែកការធ្វើបាតុកម្មដោយអហិង្សានោះ ហើយក៏ចាប់ផ្តើមវាយដំទៅលើក្រុមបាតុករដោយការប្រើដំបង ។ ក្រុមបាតុករបានដណ្តើមយកដំបងទាំងនោះ ហើយបានចាប់ផ្តើមវាយបកទៅលើសមត្ថកិច្ចវិញ ។ យ៉ាងតិចណាស់មានសមត្ថកិច្ចចំនួន ១០នាក់ និងអ្នកតវ៉ាចំនួន ៦នាក់បានរងរបួសដោយសារការប្រើប្រាស់ហិង្សាក្នុងពេលនោះ ហើយសមាជិកគណបក្សសង្គ្រោះជាតិ ៤នាក់ផ្សេងទៀត ត្រូវបានចាប់ខ្លួន ។ ក្រោយមកទៀតមានសមាជិកនៃគណបក្សសង្គ្រោះជាតិចំនួន ៨នាក់ ត្រូវបានចោទប្រកាន់ទាក់ទងនឹងនឹងព្រឹត្តិការណ៍នោះ ។
ដីធ្លី៖ នៅថ្ងៃទី២៨ ខែកក្កដា កសិករវ័យក្មេងអាយុ ១៩ឆ្នាំម្នាក់ ឈ្មោះ ទ្រី ចម្រើន ត្រូវបានបាញ់សម្លាប់ដោយទាហាននៃកងយោធពលខេមរភូមិន្ទម្នាក់ បន្ទាប់ពីទាហានយោធាម្នាក់នោះបានអះអាងថាប្រជាពលរដ្ឋនឹងមិនត្រូវបានអនុញ្ញាតឲ្យបង្កបង្កើនផលតទៀតនោះទេនៅតំបន់នោះដោយសារតែដីនោះជាកម្មសិទ្ធិរបស់មន្ត្រីជាន់ខ្ពស់ម្នាក់ ។
ដីធ្លី៖ នៅថ្ងៃទី២៨ ខែកក្កដា កងសន្តិសុខខណ្ឌដូនពេញ បានវាយទៅលើស្ត្រីជាសកម្មជនបឹងកក់ និងសកម្មជនសហគមន៍បូរីកីឡាចំនួន២នាក់ ឲ្យសន្លប់មិនដឹងខ្លួន នៅពេលដែលនគរបាលដទៃទៀតបានឈរមើលព្រឹត្តិការណ៍នោះនៅភ្នំពេញ ។
ដីធ្លី៖ នៅថ្ងៃទី១២ ខែសីហា អាជ្ញាធររដ្ឋបានធ្វើការបំបែកដោយហិង្សាទៅលើពលរដ្ឋប្រមាណ ៥០នាក់ មកពីសហគមន៍ឡពាង នៅខេត្តកំពង់ឆ្នាំង ហើយចាប់ខ្លួនមនុស្ស ៣នាក់ ដែលម្នាក់ក្នុងចំណោមនោះជាស្វាមីរបស់អ្នកតំណាងសហគមន៍ អ្នកស្រី អ៊ុំ សុភី ផងដែរ ។ យ៉ាងតិចណាស់មានពលរដ្ឋ ៨នាក់ ដែលបានរងរបួស ។
សង្គមស៊ីវិល៖ នៅថ្ងៃទី១០ ខែកញ្ញា មន្ត្រីផ្នែកស្រាវជ្រាវ ២រូប មកពីអង្គការសមធម៌កម្ពុជា ត្រូវបានឃុំខ្លួនមួយយប់ ដោយនគរបាលអន្តោប្រវេសន៍ ខេត្តឧត្តរមានជ័យ នៅពេលដែលអ្នកទាំងនោះកំពុងធ្វើការស៊ើបអង្កេតពីបញ្ហារំលោភដីធ្លី ។ បុគ្គលិកទាំងនោះ ត្រូវបានចាប់ខ្លួន ដោយគ្មានដីកា និងមូលហេតុច្បាស់លាស់ ហើយត្រូវបានសួរចម្លើយអំពីសកម្មភាពនៃការស្រាវជ្រាវរបស់ពួកគេទៀតផង ។ នៅខណៈពេលនោះ គឺបុគ្គលិកទាំងនោះកំពុងធ្វើការស៊ើបអង្កេត ទាក់ទងនឹងការរំលោភបំពានដែលជាប់ទាក់ទងនឹងក្រុមហ៊ុនថៃផលិតស្ករសខ្នាតធំមួយឈ្មោះ Mitr Phol ។
ការងារ៖ នៅថ្ងៃទី១៦ ខែកញ្ញា តំណាងសហជីព ២រូប ត្រូវបានចាប់ និងឃុំខ្លួននៅខេត្តព្រៃវែង បន្ទាប់ពីអ្នកទាំងនោះ បានដឹកនាំការតវ៉ានៅមុខរោងចក្រ ដើម្បីទាមទារឲ្យមានលក្ខណ្ឌការងារល្អប្រសើរជាងមុន ។
នយោបាយ៖ ចាប់តាំងពីថ្ងៃទី២៩ ខែកញ្ញា រហូតដល់ខែវិច្ឆិកា សមាជិកគណបក្សសង្គ្រោះជាតិចំនួន ១៩នាក់ ព្រះសង្ឃ និងសកម្មជនសិទ្ធិដីធ្លីដ៏សកម្ម ត្រូវបានចាប់ខ្លួននិងដាក់ទោសពន្ធនាគារយ៉ាងធ្ងន់ធ្ងរ ។ ក្នុងចំណោមអ្នកដែលត្រូវបានចាប់ខ្លួនទាំង ១៩នាក់នោះ មាន១៦នាក់ ត្រូវបានចាប់ខ្លួននៅថ្ងៃទី១០ និង១៣ ខែសីហា ហើយ១១នាក់ក្នុងចំណោម ១៦នាក់នោះ ត្រូវបានចោទប្រកាន់ និងផ្តន្ទាទោសភ្លាមៗត្រឹមតែមួយថ្ងៃបន្ទាប់ការចាប់ខ្លួននោះ ។ គួរបញ្ជាក់ថា អ្នកទាំង១៩នាក់នោះស្ថិតនៅក្នុងពន្ធនាគាររហូតដល់ចុងឆ្នាំ២០១៤ ។
សង្គមស៊ីវិល៖ នៅថ្ងៃទី១១ ខែតុលា នគរបាលនៅខេត្តឧត្តរមានជ័យបានវាយទៅលើបុគ្គលិកម្នាក់របស់អង្គការសមធម៌កម្ពុជា បន្ទាប់ពីបុគ្កលិកនោះបដិសេធដោយមិនឲ្យនគរបាលនោះឆែកឆេររថយន្តរបស់ពួកគេដោយគ្មានដីកាត្រឹមត្រូវ ។ បន្ទាប់ពីមានការប្រើហិង្សា និងការឆែកឆេរដោយខុសច្បាប់នេះ នគរបាលបានរឹបអូសយករថយន្ត និងលុបរូបនៅក្នុងកាមេរ៉ារបស់ពួកគេចោល ។
ដីធ្លី៖ នៅថ្ងៃទី១០ ខែវិច្ឆិកា អ្នកការពារសិទ្ធិមនុស្សបឹងកក់ចំនួន ១០នាក់ ត្រូវបានចាប់ខ្លួន និងផ្តន្ទាទោសអោយជាប់ពន្ធនាគាររយៈពេល ១ឆ្នាំ នៅក្នុងនីតិវិធីច្បាប់មួយ ដែលពោរពេញដោយភាពមិនប្រក្រតី ពាក់ព័ន្ធនឹងការតវ៉ាដីធ្លីចំនួន ២ ។
ផ្សេងៗ៖ នៅថ្ងៃទី២៦ ខែវិច្ឆិកា យុវជនម្នាក់បានរកឃើញថា បានស្លាប់បាត់បង់ជីវិត បន្ទាប់ពីមានការឃុំខ្លួនដោយមិនត្រឹមត្រូវ និងមិនមានផ្តល់នូវការព្យាបាលអ្វីសោះ នៅក្នុងមណ្ឌលព្រៃស្ពឺ ដែលមានទីតាំងស្ថិតនៅក្រៅរាជធានីភ្នំពេញ ។ លោកត្រូវបានគេយកពីតាមចិញ្ចើមផ្លូវ ហើយយកទៅដាក់នៅមណ្ឌលនោះ ជាកន្លែងដែលមិនមានការផ្តល់ការព្យាបាលអ្វីទាល់តែសោះ ទោះបីជាមានសញ្ញាណជាក់ស្តែងពីស្ថានភាពជម្ងឺក៏ដោយ ។ លោកទទួលមរណភាព នៅថ្ងៃទី២៦ ខែវិច្ឆិកា ហើយភ្លាមៗនោះត្រូវបានគេយកទៅបូជា ។
បង្ហាញតាមប្រធានបទ៖ ដីធ្លី នយោបាយ ការងារ សង្គមស៊ីវិល បញ្ចេញមតិ
នយោបាយ៖ នៅខែកុម្ភៈ ឆ្នាំ២០១៣ មានប្រជាពលរដ្ឋប្រមាណ ៥០០នាក់ នៅក្នុងខេត្តកំពង់ឆ្នាំង ត្រូវបានគម្រាមគំហែងថានឹងលុបឈ្មោះរបស់អ្នកទាំងនោះ ចេញពីបញ្ជីឈ្មោះបោះឆ្នោត ប្រសិនបើពួកគាត់ចូលរួមវេទិការសាធារណៈជាមួយនឹងប្រធានគណបក្សសង្គ្រោះជាតិ ឯកឧត្តម កឹម សុខា ។ ប្រជាពលរដ្ឋទាំងនោះ ត្រូវបានអាជ្ញាធរក្នុងតំបន់ជាច្រើននាក់ បង្ខំអោយផ្តិតមេដៃលើឯកសារដែលពួកគេមិនបានយល់អ្វីទាល់តែសោះ ដែលជាការចុះហត្ថលេខាថានឹងបោះឆ្នោតអោយគណបក្សប្រជាជនកម្ពុជា ។
នយោបាយ៖ នៅខែមីនា ឆ្នាំ២០១៣ សម្តេចនាយករដ្ឋមន្ត្រីបានថ្លែងជាសាធារណៈថា ប្រសិនបើគណបក្សប្រជាជនកម្ពុជាចាញ់ឆ្នោត នោះកម្ពុជានឹងបាត់បង់ទាំងគម្រោងអភិវឌ្ឍន៍ធំៗ “រាប់ពាន់គម្រោង” និងកម្មវិធីផ្តល់បណ្ណកម្មសិទ្ធិដីធ្លីថែមទៀតផង ។ សម្តេចនាយករដ្ឋមន្ត្រីក៏បានគម្រាមថានឹងមានហិង្សានិងសង្រ្គាមស៊ីវិលកើតឡើង ប្រសិនបើគណបក្សសង្គ្រោះជាតិឈ្នះឆ្នោត ។
ដីធ្លី៖ នៅថ្ងៃទី១៣ ខែមីនា ក្រុមអ្នកតវ៉ាសហគមន៍បឹងកក់ ត្រូវបានវាយដំយ៉ាងព្រៃផ្សៃដោយនគរបាល បន្ទាប់ពីពួកគាត់ធ្វើការជួបជុំគ្នានៅសួនច្បារសាធារណៈក្បែរគេហដ្ឋានសម្តេចនាយករដ្ឋមន្ត្រី ដើម្បីតវ៉ាស្នើសុំឱ្យដោះលែងសកម្មជនបឹងកក់ អ្នកស្រី យ៉ោម បុប្ផា ។ យ៉ាងតិចណាស់មានមនុស្ស ៥នាក់ បានរងរបួស ក្នុងនោះមានលោក លួស សុខន ដែលត្រូវជាស្វាមី អ្នកស្រី យ៉ោម បុប្ផា ផងដែរ ។
បញ្ចេញមតិ៖ នៅថ្ងៃទី១៥ ខែមីនា សាលាឧទ្ធរណ៍បានបង្គាប់ឲ្យដោះលែង លោក ម៉ម សូណង់ដូ ម្ចាស់ស្ថានីយ៍វិទ្យុសំបុកឃ្មុំ និងសហចុងចោទផ្សេងទៀត ពីពន្ធនាគារ ។ លោក សូណង់ដូ បានជាប់ពន្ធនាគារកាលពីខែកក្កដា ឆ្នាំ២០១២ ដោយចោទប្រកាន់ពីបទដឹកនាំចលនាមួយដែលហៅថា « ចលនាអបគមន៍» នៅខេត្តក្រចេះ ។ នៅខែតុលា ឆ្នាំ២០១២ គាត់ត្រូវបានផ្តន្ទាទោសអោយជាប់ពន្ធនាគាររយៈពេល ២០ឆ្នាំ ។ សាលាឧទ្ធរណ៍បានផ្លាស់ប្តួរបទចោទរបស់លោកសូណង់ដូ ទៅជាបទឧក្រិដ្ឋទាក់ទងនឹងការកាប់ឈើខុសច្បាប់ ដោយបន្ថយទោសមកត្រឹម ៥ឆ្នាំ និងព្យួរទោសដែលនៅសល់ទាំងអស់ ។ លោក សូណង់ដូ បានអនុវត្តទោសជាប់ពន្ធនាគារចំនួន ៨ខែ គិតត្រឹមថ្ងៃលោក ត្រូវបានតុលាការដោះលែង ។
ដីធ្លី៖ នៅថ្ងៃទី៣០ ខែមីនា សមាជិកសហគមន៍បឹងកក់បានធ្វើការជួបជុំគ្នានៅមុខសាលារាជធានី ដើម្បីធ្វើការតវ៉ាសុំឲ្យដោះលែង អ្នកស្រី យ៉ោម បុប្ផា និងឱ្យមានការដោះស្រាយចំពោះជម្លោះដីធ្លីរបស់សហគមន៍អ្នកទាំងនោះ ។ ក្រុមបាតុករមួយចំនួនបានរួមគ្នាធ្វើការបិទផ្លូវព្រះមុនីវង្ស ។ អាជ្ញាធរបានឆ្លើយតបដោយការប្រើប្រាស់រថយន្តពន្លត់អគ្គីភ័យចំនួន ៣ គ្រឿង បាញ់ទឹក ដើម្បីបំបែកក្រុមបាតុករ ។
ដីធ្លី៖ នៅថ្ងៃទី៣០ ខែឧសភា ញាតិមួយត្រូវបានដាក់ទៅគណកម្មការសិទ្ធិមនុស្សថៃ ដោយដើមបណ្តឹងចំនួន ៦០២នាក់ អំពីការរំលោភសិទ្ធិមនុស្សធ្ងន់ធ្ងរជាច្រើន ពាក់ព័ន្ធនឹងដីសម្បទានដាំដំណាំអំពៅ ដែលកាន់កាប់ដោយក្រុមហ៊ុនស្ករសថៃ មួយឈ្មោះ Mitr Phol Sugar Corporation ។ ក្រុមហ៊ុននេះ បានទទួលនូវដីសម្បទានសេដ្ឋកិច្ចធំៗចំនួន ៣ កន្លែង សម្រាប់ដាំអំពៅ ធ្វើជាឧស្សាហកម្មផលិតស្ករស ដែលមានទីតាំងនៅស្រុកសំរោង និងស្រុកចុងកាល ខេត្តឧត្តរមានជ័យ ។ អំពើរំលោភសិទិ្ធមនុស្ស ដែលកើតមានដូចជា ការរឹបអូសយកដីពីពលរដ្ឋមូលដ្ឋាន និងការបំផ្លិចបំផ្លាញផ្ទះសម្បែងពលររដ្ឋ សម្លាប់សត្វពាហនៈ បង្កអគ្គិភ័យ លួចផលដំណាំ ការវាយដំ គម្រាមគំហែង ការបំភិតបំភ័យ និងចាប់ខ្លួនពលរដ្ឋក្នុងតំបន់ ។
នយោបាយ៖ នៅថ្ងៃទី៥ ខែមិថុនា គណកម្មាធិការអចិន្ត្រៃយ៍នៃរដ្ឋសភា ដែលមានសមាសភាពទាំងអស់មកពីគណបក្សប្រជាជន បានបណ្តេញតំណាងរាស្ត្រគណបក្សជំទាស់ ២៩ រូប ចេញពីអង្គនីតិបញ្ញត្តិ ក្រោមហេតុផលថាពួកគេបានប្តូរគណបក្ស ។ គណបក្សជំទាស់ពីរ បានរួមបញ្ចូលគ្នាជាផ្លូវការកាលពីដើមឆ្នាំក្នុងការបង្កើតគណបក្សសង្គ្រោះជាតិ ។
នយោបាយ៖ នៅខែមិថុនា ឆ្នាំ២០១៣ យុទ្ធនាការមួយដែលគាំទ្រដោយអាជ្ញាធររដ្ឋ បានចោទប្រកាន់ឯកឧត្តម កឹម សុខា អនុប្រធានគណបក្សសង្រ្គោះជាតិ បានប្រព្រឹត្តអំពើផិតក្បត់ រួមភេទជាមួយអនីតិជន មិនផ្តល់អាហារកិច្ចដល់កូនរបស់ស្រីកំណាន់ និងបដិសេធចំពោះបទឧក្រិដ្ឋរបស់ខ្មែរក្រហម ។ យុទ្ធនាការបង្ខូចកេរ្តិ៍ឈ្មោះនេះ មានគោលបំណងធ្វើឲ្យមានឥទ្ធិពលលើទស្សនៈរបស់មហាជន ដោយមានការចាក់ផ្សាយម្តងហើយម្តងទៀតតាមបណ្តាស្ថានីយ៍ទូរទស្សន៍ទូទាំងប្រទេសដែលស្ថិតក្រោមការគ្រប់គ្រងរបស់គណបក្សកាន់អំណាច ។
ការងារ៖ ខែមិថុនា ឆ្នាំ២០១៣ សវនាការ ត្រូវបានបើកលើសំណុំរឿង លោក ឈូក បណ្ឌិត ចៅហ្វាយក្រុងបាវិតនៃខេត្តស្វាយរៀង ។ នៅខែកុម្ភៈ ឆ្នាំ២០១២ កម្មកររោងចក្ររាប់ពាន់នាក់ បានធ្វើបាតុកម្មទ្រង់ទ្រាយធំ ដើម្បីទាមទារដំឡើងប្រាក់ឈ្នួលនៅរោងចក្រមួយចំនួនដែលមានទីតាំងនៅក្រុងបាវិត ។ លោក បណ្ឌិត បានទៅដល់កន្លែងបាតុកម្មនៅថ្ងៃទី២០ ខែកុម្ភៈ ហើយបានទាញកាំភ្លើង រួចបាញ់ទៅលើក្រុមបាតុករ ដែលបណ្តាលអោយមានអ្នករងរបួសចំនួន ៣នាក់ ។ ចៅក្រមជំនុំជម្រះ បានចេញសាលក្រមសម្រេចផ្តន្ទាទោសលោក បណ្ឌិត ដាក់ពន្ធនាគាររយៈពេល ១៨ខែ ពីបទបង្ករបួសស្នាមដោយអចេតនា ។ ប៉ុន្តែទោះជាយ៉ាងណា ក្រោយពីតុលាការផ្តន្ទាទោសពន្ធនាគារ ភាគច្រើនលោក បណ្ឌិត សម្រាកព្យាបាលក្នុងមន្ទីរពេទ្យមិត្តភាពខ្មែរ-សូវៀត ។
ដីធ្លី៖ នៅថ្ងៃទី១១ ខែមិថុនា សម្តេចនាយករដ្ឋមន្ត្រីបានផ្អាកយុទ្ធនាការវាស់វែង និងផ្តល់បណ្ណកម្មសិទ្ធិដីធ្លី ដែលបានចាប់ផ្តើមឡើងនៅឆ្នាំ២០១២ ។ ការអនុវត្តយុទ្ធនាការនេះ ត្រូវបានឡើង ពោរពេញដោយភាពលាក់បាំង ហើយការត្រួតពិនិត្យដោយឯករាជ្យលើការអនុវត្តនេះ ក៏ត្រូវបានហាមឃាត់យ៉ាងតឹងរឹង ។ កម្មវិធីនេះទទួលជំនួយឯកជនពីសម្តេចនាយករដ្ឋមន្ត្រី និងក្រុមមនុស្សដែលជិតស្និតនឹងសម្តេចដទៃទៀត ។ បើទោះជាមានការអះអាងថាកម្មវិធីនេះ បានផ្តល់បណ្ណកម្មសិទ្ធិដីធ្លីទៅឱ្យពលរដ្ឋប្រមាណ ៤៧០.០០០ គ្រួសារ ដែលគ្របដណ្តប់លើផ្ទៃដីចំនួន ១,៨ លានហិកតា ក៏ដោយ ក៏កម្មវិធីនេះនៅតែមិនបានគ្របដណ្តប់លើតំបន់ជាច្រើន ដែលមានទំនាស់ដីធ្លីខ្លាំងក្លា ដែលជាដីសម្បទានសេដ្ឋកិច្ចធំៗ រំលោភលើដីរបស់អ្នកកាន់កាប់ពីមុន ។
បញ្ចេញមតិ៖ នៅថ្ងៃទី២៨ ខែមិថុនា រាជរដ្ឋាភិបាល បានហាមឃាត់ការផ្សាយបន្តពីវិទ្យុជាភាសាខ្មែរដែលផលិតដោយបរទេស ។ មជ្ឈមណ្ឌលព័ត៌មានស្ត្រីកម្ពុជា FM 102 និងវិទ្យុសំបុកឃ្មុំ FM 105 ត្រូវបានបង្ខំឲ្យបញ្ឈប់ការចាក់ផ្សព្វផ្សាយបន្តនូវសម្លេងវិទ្យុអាស៊ីសេរី RFA និងវិទ្យុសម្លេងសហរដ្ឋអាមេរិក VOA ។ ខណៈដែលអាជ្ញាធរបានលុបចោលការហាមឃាត់នេះវិញនូវថ្ងៃបន្ទាប់ បទបញ្ជាដោយឡែកមួយនៅតែរក្សាដដែល ។ គ្រប់ប្រព័ន្ធផ្សព្វផ្សាយទាំងអស់ ត្រូវបានហាមឃាត់ ដោយមិនឲ្យផ្សព្វផ្សាយរបាយការណ៍បរទេស ដែលទាក់ទងនឹងការស្ទង់មតិ និងលទ្ធផលនៃការបោះឆ្នោត ៥ថ្ងៃ មុនថ្ងៃបោះឆ្នោត។
នយោបាយ៖ នៅខែកក្កដា ឆ្នាំ២០១៣ ក្រោយពីមាតុភូមិនិវត្តន៍មកប្រទេសកម្ពុជាវិញរបស់ឯកឧត្តម សម រង្ស៊ី មានខ្មាញ់កាំភ្លើង បានបាញ់គ្រាប់កាំភ្លើងចូលទីស្នាក់ការកណ្តាលគណបក្សសង្គ្រោះជាតិ ដែលបណ្តាលឲ្យបែកកញ្ចក់បង្អួច និងប៉ះទង្គិចដល់អ្នកគាំទ្រចំនួន ១០នាក់ នៅខាងក្នុងទីស្នាក់ការ ។
នយោបាយ៖ ប្រធានគណបក្សសង្គ្រោះជាតិ ឯកឧត្តម សម រង្ស៊ី និងអនុប្រធានគណបក្សសង្គ្រោះជាតិ ឯកឧត្តម កឹម សុខា បាននិយាយដោយការខ្វែងគ្នាអំពីជនជាតិវៀតណាមដែលរស់នៅកម្ពុជា និងព្រមានអំពីការគម្រាមកំហែងពីជនជាតិវៀតណាមដល់ប្រទេសកម្ពុជា ។ វោហារសាស្ត្ររើសអើងពូជសាសន៍ បានបន្តពេញមួយឆ្នាំ ។
នយោបាយ៖ នៅថ្ងៃទី២៨ ខែកក្កដា ការបោះឆ្នោតថ្នាក់ជាតិត្រូវបានសាធារណជនជាតិ និងអន្តរជាតិ កត់សម្គាល់ថាឃើញថាមានភាពមិនប្រក្រតីជាច្រើន នៅតាមការិយាល័យបោះឆ្នោតនានាទូទាំងប្រទេស ។ ភាពមិនប្រក្រតីទាំងនេះរួមមាន ភាពមិនប្រក្រតីនៃបញ្ជីឈ្មោះបោះឆ្នោត ការបាត់ឈ្មោះអ្នកបោះឆ្នោត ការបដិសេធសិទ្ធិបោះឆ្នោតរបស់ពលរដ្ឋមួយចំនួន ។ ក៏មានផងដែរការអំពើបន្លំសន្លឹកឆ្នោត ការបំភិតបំភ័យ ឬការយាយីនៅតាមការិយាល័យបោះឆ្នោតនានា ។ លទ្ធផលបានបង្ហាញថា គណបក្សប្រជាជនកម្ពុជាបានឈ្នះតែបន្តិចប៉ុណ្ណោះ ប៉ុន្តែគណបក្សសង្គ្រោះជាតិបានបដិសេធលទ្ធផលនេះ ។
នយោបាយ៖ នៅថ្ងៃទី១៥ ខែកញ្ញា លោក ម៉ៅ សុខចាន់ អាយុ ២៩ឆ្នាំ ត្រូវបានគេបាញ់ចំក្បាល និងបានស្លាប់ភ្លាមៗនៅក្នុងព្រឹត្តិការណ៍បាតុកម្មមហាជនជាច្រើនថ្ងៃ ដែលដឹកនាំដោយគណបក្សសង្គ្រោះជាតិ ដើម្បីអំពាវនាវអោយមានការរាប់សន្លឹកឆ្នោតឡើងវិញ ឬបោះឆ្នោតឡើងវិញ ។ ភាពតានតឹងបានកើនឡើងកាន់តែខ្លាំងឡើងនាពេលរសៀល នៅពេលដែលចរាចរណ៍មានភាពច្របូកច្របល់ដោយសារតែការបិទផ្លូវក្បែរស្ពានអាកាសព្រះមុន្នីវង្ស ដោយកងរាជអាវុធហត្ថ បានបាញ់ឧស្ម័នបង្ហូរទឹកភ្នែក និងគ្រាប់កាំភ្លើងពិតទៅលើក្រុមពលរដ្ឋ ។ ក្នុងនោះព្រឹត្តិការណ៍នោះ មានបុរសចំនួន ៩នាក់បានរងរបួសយ៉ាងធ្ងន់ធ្ងរ និងត្រូវបានបញ្ជូនទៅមន្ទីរពេទ្យ ។ មនុស្ស ៨នាក់ បានរងរបួសដោយសារគ្រាប់កាំភ្លើង ។ យុវជនជាច្រើននាក់រាប់បញ្ចូលទាំងក្មេងជំទង់ ក៏ត្រូវបានវាយធ្វើបាបដោយសមត្ថកិច្ចផងដែរ ។ អ្នកឈរមើលព្រឹត្តិការណ៍ចំនួន ៦នាក់ ដែលរួមមានក្មេងជនជាតិវៀតណាមម្នាក់ ដែលត្រូវបានចាប់ខ្លួន និងផ្តន្ទាទោសពន្ធនាគារ ។
ការជួបជុំ៖ នៅថ្ងៃទី២០ ខែកញ្ញា កងកម្លាំងសន្តិសុខជាច្រើនរយនាក់ ដែលភាគច្រើនជាកងរាជអាវុធហត្ថ បានបំបែកការប្រមូលផ្តុំគ្នារបស់ព្រះសង្ឃ និងអ្នកគាំទ្រគណបក្សសង្គ្រោះជាតិជាច្រើនអង្គ/នាក់ នៅក្បែររម្យណីយ៍ដ្ឋានវត្តភ្នំ ។
ដីធ្លី៖ នៅថ្ងៃទី២២ ខែកញ្ញា អាជ្ញាធរជាច្រើន ដែលរួមមាននគរបាល និងកងរាជអាវុធហត្ថ បានប្រើប្រាស់កាំភ្លើង និងដំបងឆក់ ដើម្បីបំបែកការជួបជុំអុជទៀនដោយអហិង្សានៅរម្យណីយ៍ដ្ឋានវត្តភ្នំ ដោយសកម្មជនដីធ្លីតំបន់បឹងកក់។ ក្រុមពលរដ្ឋបឹងកក់ ដែលមានទាំងស្ត្រី និងកុមារ បានអំពាវនាវសុំឲ្យមានការដោះលែងសកម្មជនដែលកំពុងជាប់ឃុំ អ្នកស្រី យ៉ោម បុប្ឆា។ ចាប់ពីម៉ោង ១០ និង ៣០ នាទី យប់ កងសន្តិសុខមានសំលៀកបំពាក់ស៊ីវិល និងឯកសណ្ឋាន ជាច្រើននាក់ បានចាប់ផ្តើមវាយដំសកម្មជនដីធ្លី អ្នកឃ្លាំមើលការរំលោភសិទិ្ធមនុស្ស និងអ្នកកាសែត នៅពេលប្រមូលផ្តុំគ្នានោះ ។ យ៉ាងតិចណាស់ មានអ្នកតំណាងសហគមន៍ចំនួន ១០នាក់ បានរងរបួស អ្នកឃ្លាំមើលការរំលោភសិទិ្ធមនុស្សម្នាក់រងរបួសដើមទ្រូងដោយត្រូវគ្រាប់ជំពាមកៅស៊ូ ហើយអ្នកកាសែតជាច្រើននាក់ផ្សេងទៀតរងរបួសដោយដំបងឆក់ ។
ការងារ៖ នៅថ្ងៃទី១២ ខែវិច្ឆិកា កម្មករប្រមាណ ៦០០ នាក់ បានធ្វើបាតុកម្ម ដោយព្យាយាមដើរក្បួនទៅកាន់គេហដ្ឋានសម្តេចនាយករដ្ឋមន្ត្រី ដោយស្នើសុំឲ្យមានការឆ្លើយតបពីរាជរដ្ឋាភិបាល។ កម្មករទាំងនោះ បានធ្វើការតវ៉ាអស់រយៈពេលបីខែមកហើយ ដើម្បីឲ្យមានការឆ្លើយតបចំពោះការទាមទាររបស់ពួកគេ។ ការដើរក្បួនរបស់កម្មករទាំងនោះ ត្រូវបានរារាំងដោយរបាំងជាច្រើន និងនគរបាលបង្ក្រាបបាតុកម្ម ដែលត្រូវបានដាក់ពង្រាយនៅស្ពានស្ទឹងមានជ័យ។ នគរបាល បានបាញ់ទឹក ឧស្ម័នបង្ហូរទឹកភ្នែក និងគ្រាប់កាំភ្លើងពិត ទៅលើក្រុមពលរដ្ឋ។ រហូតមកដល់ពេលរសៀល អ្នកលក់ដូរតាមផ្លូវម្នាក់ បានស្លាប់ដោយសារគ្រាប់កាំភ្លើង មនុស្ស ៩នាក់ រងរបួសដោយគ្រាប់កាំភ្លើង ហើយមនុស្សជាង ៣០នាក់ ផ្សេងទៀត ត្រូវបានចាប់ខ្លួន ។
បង្ហាញតាមប្រធានបទ៖ ដីធ្លី នយោបាយ ការងារ សង្គមស៊ីវិល បញ្ចេញមតិ
ដីធ្លី៖ នៅថ្ងៃទី ០៣ ខែមករា កងកម្លាំងសន្តិសុខចម្រុះជាង ១០០នាក់ បានប្រើប្រាស់ឧស្ម័នបង្ហូរទឹកភ្នែក និង បាញ់គ្រាប់កាំភ្លើង ទៅលើអ្នកភូមិនៃសហគមន៍បុរីកីឡា ។ នៅក្នុងពេលនោះដែរ កម្មកររបស់ក្រុមហ៊ុនផានអ៊ីម៉ិចជាច្រើននាក់បានវាយកំទេច និង បំផ្លិចបំផ្លាញលំនៅឋានរបស់ពលរដ្ឋចំនួន៣០០គ្រួសារ ដែលធ្វើឲ្យពលរដ្ឋទាំងនោះមិនអាចយករបស់របររបស់អ្នកទាំងនោះចេញ ទាន់ពេលវេលានោះទេ ។ នៅក្នុងហេតុការណ៍នោះដែរ សមាជិកសហគមន៍ចំនួន ០៨នាក់ត្រូវបានចាប់ខ្លួន ។
ដីធ្លី៖ នៅថ្ងៃទី ០៣ ខែមករា មន្រ្តីកងរាជអាវុធហត្ថម្នាក់ ដែលដើរតួជាសន្តិសុខឯកជន បានបាញ់ទៅលើអ្នកភូមិជនជាតិភាគតិចជាច្រើននាក់ នៅខេត្តរតនគិរី ជុំវិញជម្លោះដីធ្លីដ៍រាំរៃមួយ រវាងអ្នកភូមិ មកពីភូមិកាណាត់ធំ និង ក្រុមហ៊ុនកៅស៊ូ ហេង ប្រាឌ័រ (Heng Brother Robber Company) ។
ដីធ្លី៖ នៅថ្ងៃទី ១១ ខែមករា អ្នកភូមិក្នុងសហគមន៍បូរីកីឡាចំនួន ៣០នាក់ ក្នុងនោះមានស្រ្តី ២៤នាក់ និង កុមារ ៦នាក់ ត្រូវបានចាប់ខ្លួនដោយមិនមានការចោទប្រកាន់ នៅមុខសាលារាជធានីភ្នំពេញ ហើយត្រូវបានបញ្ចូនទៅមជ្ឈមណ្ឌលសង្គមកិច្ច ព្រៃស្ពឺ ។
ដីធ្លី៖ នៅថ្ងៃទី ១៨ ខែមករា មន្ត្រីយោធា ដែលដើរតួជាអ្នកសន្តិសុខឲ្យក្រុមហ៊ុនធីធីវ៉ាយ (TTY Co.Ltd) បានបាញ់ប្រហារ ទៅលើប្រជាពលរដ្ឋមួយក្រុម ដែលបានប្រមូលផ្តុំគ្នាដើម្បីការពារដីស្រែចំការរបស់ពួកគេ ពីការឈូសឆាយនៅក្នុងស្រុក ស្នួល ខេត្តក្រចេះ ។ ប្រជាពលរដ្ឋ៤នាក់ បានរងរបួសដោយសារគ្រាប់កាំភ្លើង នៅពេលដែលអ្នកទាំងនោះ ព្យាយាមបញ្ឈប់គ្រឿងចក្រក្រុមហ៊ុនពីការបំផ្លាញចំការដំឡូងមីរបស់អ្នកទាំងនោះ ។
សង្គមស៊ីវិល៖ នៅថ្ងៃទី ២០ ខែកុម្ភៈ បុគ្គលិក អាដហុក (ADHOC) ម្នាក់ ត្រូវបានតុលាការកោះហៅពីបទ បរិហារបង្កាច់កេរ្តិ៍ បន្ទាប់ពី អាដហុក(ADHOC) បានអន្តរាគមន៍ក្នុងករណីនារីបំរើការម្នាក់ត្រូវបានរំលោភបំពានផ្លូវភេទ និង ធ្វើបាបដោយ លោក អ៊ុំ សុជាតិ ដែលជា ប្រធានមជ្ឈមណ្ឌលកំចាត់មីនកម្ពុជា ។ ការចោទប្រកាន់នេះក្រោយមកត្រូវបានទម្លាក់ចោលវិញ។
ការងារ៖ នៅថ្ងៃទី ២០ ខែមករា អភិបាលស្រុកម្នាក់នៅខេត្តស្វាយរៀង បានបាញ់ប្រហារ នៅក្នុងព្រឹត្តិការណ៍បាតុកម្មរបស់កម្មករជាង ១.០០០នាក់ ក្នុងខេត្តស្វាយរៀង ។ កម្មការិនីវ័យក្មេងចំនួន ៣នាក់ បានរងរបួស ។ ខ្មាន់កាំភ្លើងត្រូវបានបណ្ដោយឱ្យរត់គេចខ្លួនពីកន្លែងកើតហេតុនោះ បើទោះបីជាមានវត្តមានកម្លាំងកងរាជអាវុធហត្ថនៅនឹងកន្លែងកើតហេតុក៏ដោយ ។ ទោះបីជាមានការទទួលស្គាល់ថាបានប្រើប្រាស់អាវុធក៏ដោយ ក៏ខ្មាន់កាំភ្លើងគឺ លោក ឈូក បណ្ឌិត ត្រូវបានចោទប្រកាន់ពីបទ “បង្ករបួសស្នាមដោយអចេតនា” និងមិនត្រូវបានជាប់ឃុំខ្លួនឡើយ ហើយត្រូវបានលើកលែងបទចោទប្រកាន់នេះ ក្នុងខែ ធ្នូ ឆ្នាំដដែល ។
សង្គមស៊ីវិល៖ នៅក្នុងថ្ងៃទី ២៦ ខែមេសា សកម្មជនបរិស្ថាន និងជាប្រធាននៃអង្គការការពារធនធានធម្មជាតិ លោកឈុត វុទ្ធី ត្រូវបានបាញ់សម្លាប់ ក្នុងខណៈពេល លោកស៊ើបអង្កេតការកាប់ព្រៃឈើខុសច្បាប់នៅក្នុងតំបន់ជួរភ្នំក្រវ៉ាញ ជាមួយនឹងអ្នកកាសែតពីររូបមកពី កាសែតឌឹខេមបូឌា ដេលី ។ មន្ត្រីកងរាជអាវុធហត្ថម្នាក់ ក៏ត្រូវបានបាញ់សម្លាប់នៅក្នុងហេតុការណ៍នោះដែរ ។ អាជ្ញាធរ ទាំងនោះ បានផ្តល់ការពន្យល់ខុសៗគ្នាចំនួន បួន រួមទាំងការពន្យល់ថាការស្លាប់ គឺដោយសារការបាញ់ខ្លួនឯងរបស់កងរាជអាវុធហត្ថ ចំនួនពីរដង ដោយកាំភ្លើង AK 47 របស់លោក ដែលធ្វើឲ្យការស៊ើបអង្កេតលើករណីឃាតកម្មលោក ឈុត វុទ្ធី មានភាពខ្វះចន្លោះយ៉ាងខ្លាំង ។
ដីធ្លី៖ នៅក្នុងថ្ងៃទី ២៧ មេសា រាជរដ្ឋាភិបាល បានធ្វើការផ្អាកជាបណ្តោះអាសន្ន នូវការផ្តល់ដីសម្បទានថ្មីៗ ។ ប៉ុន្តែនៅខែមិថុនា អង្គការលីកាដូ បានចងក្រងឯកសារ ពីការផ្តល់ដីសម្បទានថ្មីៗ យ៉ាងតិចមាន ១២កន្លែង ដែលសរុបមានជាង ៨០.០០០ ហិកតា ។ នេះ ជាភាពខ្វះចន្លោះមួយរបស់បទបញ្ជារបស់រាជរដ្ឋាភិបាល ដែលធ្វើឲ្យក្រុមហ៊ុន “ដែលបានទទួលបានការអនុញ្ញាតរួច” អាចបន្តឈូសឆាយដីសម្បទានរបស់ខ្លួន ។ នេះ គឺជាភាពចន្លោះប្រហោងយ៉ាងធំ ដែលធ្វើឲ្យបទបញ្ជានោះ គ្មានប្រសិទិ្ធភាព ។
ដីធ្លី៖ នៅក្នុងថ្ងៃទី ១៦ ខែឧសភា កុមារីអាយុ១៤ឆ្នាំម្នាក់ ត្រូវបានបាញ់សម្លាប់នៅក្នុងខេត្តក្រចេះ បន្ទាប់ពីកងកម្លាំងប្រដាប់អាវុធរាប់រយនាក់ ចូលទៅក្នុងភូមិរបស់នាង ។ ប្រជាពលរដ្ឋពីរនាក់ផ្សេងទៀត ក៏បានទទួលរងរបួសផងដែរ ។ ក្រោយមក អាជ្ញាធរ បានចោទប្រកាន់អ្នកភូមិទាំងនោះថា ប៉ុនប៉ងធ្វើអបគមន៍ ក្នុងប្រទេស ។ ការលើកឡើងនេះ គឺមិនមានភស្តុតាងច្បាស់លាស់នោះទេ ។ អ្នកភូមិនៅទីនោះ មានជម្លោះដីធ្លី ដែលគេដឹងលឺគ្រប់ៗគ្នាថា ជាមួយក្រុមហ៊ុនកសិកម្មឧស្សាហកម្ម កាសូទីម (Casotim) ។
ដីធ្លី៖ នៅថ្ងៃទី២២ ខែឧសភា សកម្មជនបឹងកក់ ១៣នាក់ ត្រូវបានចាប់ខ្លួន បន្ទាប់ពីធ្វើការតវ៉ាដោយអហិង្សា លើករណីជម្លោះដីធ្លី ដែលឈានទៅដល់ការបណ្តេញប្រជាពលរដ្ឋចំនួនជាង ៣.៥០០ គ្រួសារ ។ ការចាប់ខ្លួនអ្នកទាំងនោះ កើតឡើងនៅពេលដែលអ្នកចូលរួមបានចាប់ផ្ដើមច្រៀងចម្រៀង ខណៈពេលដែលបានធ្វើតវ៉ាដោយអហិង្សា ។ សវនាការមួយ លើករណីស្ត្រីទាំង ១៣នាក់ ត្រូវបានធ្វើឡើងរយៈពេល ២ថ្ងៃ ក្រោយថ្ងៃចាប់ខ្លួនអ្នកទាំងនោះ ។ តុលាការ បានផ្តន្ទាទោសអ្នកទាំងនោះ ពីបទ “កាន់កាប់ដីធ្លីដោយខុសច្បាប់” និង “រារាំងអាជ្ញាធរសាធារណៈ ដោយមានស្ថានទម្ងន់ទោស” ហើយដាក់ ពន្ធនាគារចំនួន ពីរឆ្នាំកន្លះ ។ មេធាវីការពារសកម្មជនទាំងនោះ បានស្នើសុំពន្យាពេលនីតិវិធី យកឯកសារពាក់ព័ន្ធនឹងការចោទប្រកាន់និងភស្តុតាង និងកោះហៅសាក្សី ប៉ុន្តែសំណើទាំងនេះត្រូវបានបដិសេធ ។
ដីធ្លី៖ នៅថ្ងៃទី ២៤ ខែឧសភា ព្រះតេជគុណ លួន សុវ៉ាត ត្រូវបានឡោមព័ទ្ធដោយមន្ត្រីស៊ីវិល និងសាសនា ហើយបង្ខំព្រះអង្គឲ្យនិមន្តចូលក្នុងរថយន្ត ។ ព្រះតេជគុណ ត្រូវបានគេដឹកទៅកាន់វត្តមួយ បន្ទាប់ពីព្រះអង្គបាននិមន្តចូលរួមការប្រមូលផ្ដុំនៅខាងមុខសាលាដំបូងរាជធានីភ្នំពេញ ដើម្បីគាំទ្រសកម្មជនបឹងកក់ទាំង១៣នាក់ ដែលត្រូវបានចាប់ខ្លួន ។ ព្រះអង្គត្រូវ បានគេគម្រាមកំហែងនឹងអាចចាប់ព្រះអង្គផ្សឹក ហើយចោទប្រកាន់បទព្រហ្មទណ្ឌ ប្រសិនបើព្រះអង្គមិនបញ្ឈប់ធ្វើការទាក់ទាញមតិ គាំទ្រជួយជនរងគ្រោះ ដែលត្រូវបានគេរំលោភសិទិ្ធមនុស្ស ។
ដីធ្លី៖ នៅថ្ងៃទី២៦ ខែឧសភា ដីចំការ និងផ្ទះចំនួន ៦០ ហិកតា ជាកម្មសិទិ្ធរបស់ពលរដ្ឋចំនួន ១៥ គ្រួសារ រស់នៅក្នុងសង្កាត់លេខ ១ ខេត្តព្រះសីហនុ ត្រូវបានបំផ្លាញដោយកងកម្លាំងប្រដាប់អាវុធ ដែលដឹកនាំដោយព្រះរាជអាជ្ញាអមសាលាដំបូងខេត្តព្រះសីហនុ ។ ដីនេះ គឺបម្រុងទុកសម្រាប់ការសាងសង់ពន្ធនាគារថ្មី ។ អ្នកភូមិដែលត្រូវបានគេបណ្តេញចេញ មិនបានទទួលសំណងអ្វីទេ ហើយអ្នកភូមិ យ៉ាងតិចម្នាក់ រងរបួសធ្ងន់ធ្ងរអំឡុងពេលប្រតិបត្តិការរបស់អាជ្ញាធរ ។
ការបញ្ជេញមតិ៖ ថ្ងៃទី១៥ ខែកក្កដា លោក ម៉ម សូណង់ដូ ដែលជាម្ចាស់ និង ជាប្រធាននៃវិទ្យុសំបុកឃ្មុំ ដែលជាវិទ្យុឯករាជ្យមួយក្នុងចំនោមវិទ្យុឯករាជ្យមួយចំនួនតូចនៅប្រទេសកម្ពុជា ត្រូវបានចាប់ខ្លួន និង ចោទប្រកាន់ពីបទល្មើសជាច្រើន រួមមានការចូលរួមនៅក្នុងចលនាអបគមន៍ ។ មុនពេលការចាប់ខ្លួនលោក វិទ្យុសំបុកឃ្មុំបានផ្សាយអំពី “ពាក្យបណ្តឹង” ដែលត្រូវបានដាក់ទៅតុលាការព្រហ្មទណ្ឌអន្តរជាតិ ដោយចោទប្រកាន់មន្ត្រីរាជរដ្ឋាភិបាលកម្ពុជាមួយចំនួនពីបទឧក្រិដ្ឋកម្មប្រឆាំងនឹងមនុស្សជាតិ ដែលទាក់ទងនឹងការផ្លាស់ទីដោយបង្ខំ និងការបណ្តេញពលរដ្ឋចេញពីលំនៅដ្ឋាន ។ ម្ភៃបួនម៉ោងក្រោយមក បន្ទាប់ពីវិទ្យុសំបុកឃ្មុំបានផ្សាយតាមរលក ធាតុអាកាស ជាលើកដំបូងពីព័ត៌មាននេះ សម្តេចនាយករដ្ឋមន្ត្រី ហ៊ុន សែន បានអំពាវនាវជាសាធារណៈឱ្យមានការចាប់ខ្លួនលោក នៅក្នុងអំឡុងពេលថ្លែងសុន្ទរកថា ដែលបានផ្សាយទូទាំងប្រទេស ។ ក្រោយមក លោក សូណង់ដូ ត្រូវបានចោទប្រកាន់ និងផ្តន្ទាទោសពន្ធនាគារចំនួន ២០ ឆ្នាំ ។
ដីធ្លី៖ ថ្ងៃទី ០១ ខែកក្កដា នគរបាលអន្តរាគមន៍ប្រឆាំងបាតុកម្ម ត្រូវបានដាក់ពង្រាយ ដើម្បីការពារមិនឲ្យពលរដ្ឋបឹងកក់ និងអ្នកដទៃទៀតអាចចូលក្នុងសាលាឧទ្ធរណ៍ នៅពេលដែលតុលាការ កំពុងបើកសវនាកាលើសំណុំរឿងសកម្មជនបឹងកក់ទាំង ១៣ នាក់ ។ មន្ត្រីនគរបាល បានប្រើអំពើហិង្សា ដែលបណ្តាលឲ្យរបួសពលរដ្ឋចំនួន ៥នាក់ និងកុមារចំនួន ៧នាក់ ដែលត្រូវទទួលការព្យាបាល ។ ក្នុងចំណោមជនរងគ្រោះអស់ មានស្ត្រីម្នាក់ (ជាប្អូនស្រីរបស់អ្នកតំណាងម្នាក់ដែលត្រូវបានជាប់ក្នុងពន្ធនាគារ) បានរលូតកូន បន្ទាប់ពីត្រូវបានមន្ត្រីនគរបាលទាត់ចំពោះ ។
ការងារ៖ ថ្ងៃទី១១ ខែកក្កដា អំឡុងពេលកិច្ចប្រជុំកំពូលអាស៊ាននៅក្នុងខែកក្កដា អាជ្ញាធរបានធ្វើការវាយដំយ៉ាងធ្ងន់ធ្ងរ ទៅលើអ្នកដឹកនាំសហជីព លោក រ៉ុង បញ្ញា នៅពេលមានការតវ៉ារបស់កម្មកររោងចក្រដោយអហិង្សានៅក្នុងសួនច្បារសាធារណៈ ដើម្បីទាមទារដំឡើងប្រាក់ឈ្នួលប្រចាំថ្ងៃ ។ លោក ចូលរួមគាំទ្រ កម្មករមកពីរោងចក្រកាត់ដេរ តៃយ៉ាង (Tai Yang) ដែលជាក្រុមហ៊ុនផ្គត់ផ្គង់សំលៀកបំពាក់ទៅក្រុមហ៊ុនសំលៀកបំពាក់អន្តជាតិដ៏ធំៗក្នុងចំណោមរោងចក្រផ្សេងៗទៀតដូចជា Levi Strauss, Gap និង OldNavy ។
ដីធ្លី៖ ថ្ងៃទី០៤ និង ០៥ ខែកញ្ញា អ្នកស្រីយ៉ោម បុប្ផានិងអ្នកស្រី ទឹម សាក់មុន្នី ដែលជាសកម្មជនបឹងកក់ត្រូវបានចាប់ខ្លួន និងឃុំខ្លួនបណ្តោះអាសន្នរង់ចាំបើកសវនាការ ហើយមិនមានភស្តុតាងណាមួយដើម្បីគាំទ្រការចោទប្រកាន់នោះទេ ។
ការបញ្ចេញមតិ៖ ថ្ងៃទី១៥ ខែកញ្ញា សាកសពអ្នកសារព័ត៌មានផ្នែកបរិស្ថាន លោកហង្ស សេរីឧត្តម ត្រូវបានប្រទះឃើញនៅខេត្តរតនគិរី ។ លោក សិរីឧត្តម គឺជាអ្នកយកព័ត៌មានរបស់កាសែតក្នុងស្រុកមួយ ដែលធ្វើការរាយការណ៍ព័ត៌មានពាក់ព័ន្ធក្នុងរឿងកាប់ឈើខុសច្បាប់ ។
ដីធ្លី៖ នៅថ្ងៃទី១៥ ខែវិច្ឆិកា ប្រជាពលរដ្ឋចំនួន ៨នាក់ នៅភូមិថ្មគោល ដែលស្ថិតនៅក្បែរអាកាសយានដ្ឋានអន្តរជាតិភ្នំពេញ ត្រូវបានចាប់ និងឃុំខ្លួនអស់រយៈពេល ១២ម៉ោង បន្ទាប់ពីអ្នកទាំងនោះបានសរសេរអក្ស “SOS” នៅលើដំបូលផ្ទះរបស់អ្នកទាំងនោះ ជិតនឹងរូបប្រធានាធិបតីសហរដ្ឋអាមេរិក លោក បារ៉ាក់ អូបាម៉ា ដែលលោកនឹងមកដល់រាជធានីភ្នំពេញក្នុងសបា្តហ៍បន្ទាប់ សម្រាប់កិច្ចប្រជុំកំពូលអាស៊ាន ។ ពលរដ្ឋជាង ១៦៥ គ្រួសារ ក្នុងសហគមន៍នោះ បានទទួលនូវសេចក្តីជូនដំណឹងពីការបណ្តេញចេញនៅក្នុងខែកក្កដា ទោះបីជាអ្នកទាំងនោះមានសិទិ្ធស្របច្បាប់លើដីធ្លីទាំងនោះក៏ដោយ ។
ការងារ៖ នៅថ្ងៃទី២៦ ខែធ្នូ លោក ប៊ន សំណាង និង សុក សំអឿន (បុរសពីរនាក់ ដែលត្រូវបានចោទ ប្រកាន់ពីបទឃាតកម្មលើមេដឹកនាំសហជីព លោក ជា វិជ្ជា កាលពីឆ្នាំ ២០០៤) ត្រូវបានចាប់ខ្លួន និងឃុំខ្លួនម្តងទៀត បន្ទាប់ពីតុលាការសាលាឧទ្ធរណ៍ បានបើកសវនាការជាលើកទី២ លើករណីរបស់អ្នកទាំងពីរ ។ អ្នកទាំងពីរ ដែលត្រូវបានគេដឹងលឺជាទូទៅថា ជាឃាតករសប្បនិម្មិត ត្រូវបានដោះលែងម្តង កាលពីខែធ្នូ ឆ្នាំ ២០០៨ ដោយតុលាការកំពូលដ៏ក្លាហាន ដែលបានសម្រេច ឲ្យធ្វើការស្រាវជ្រាវបន្ថែមទៅលើការសម្លាប់នោះ នៅពេលដែលភស្តុតាងជាច្រើនបង្ហាញអំពីភាពមិនមានពិរុទ្ធរបស់អ្នកទាំងពីរ ។ ដោយមិនមានបង្ហាញនូវភស្តុតាងថ្មីអំពីពិរុទ្ធភាព (កំហុស) របស់អ្នកទាំងពីរ អំឡុងពេលសវនាការលើកទី២ នៅខែវិចិ្ឆកា ឆ្នាំ២០១២ សាលាឧទ្ធរណ៍បានបង្គាប់ឲ្យឃុំខ្លួនអ្នកទាំងពីរក្នុងពន្ធនាគារដោយបន្តទទួលទោស ពីការកាត់ទោសពីមុនរបស់អ្នកទាំងពីររយៈពេល ២០ឆ្នាំ ។
បង្ហាញតាមប្រធានបទ៖ ដីធ្លី នយោបាយ ការងារ សង្គមស៊ីវិល បញ្ចេញមតិ
ដីធ្លី៖ នៅថ្ងៃទី២៥ ខែមករា ប្រជាពលរដ្ឋប្រមាណ ៣០នាក់ ក្នុងខេត្តកំពង់ស្ពឺ ត្រូវបានកងកម្លាំងសមត្ថកិច្ចជម្រុះប្រមាណ ៨០នាក់ ធ្វើឱ្យរងរបួស នៅអំឡុងពេលបាតុកម្មមួយ ដែលត្រូវបានធ្វើឡើងដើម្បីការពារដីធ្លីចំនួន ៩៥០ហិកតា ដែលត្រូវបានគម្រាមគំហែងដោយក្រុមហ៊ុន The Master International Cooperation Group។
ដីធ្លី៖ នៅថ្ងៃទី២៥ ខែមករា តំណាងសហគមន៍មួយរូប លោក រាជ សីម៉ា និងបុគ្គលិកអង្គការអាដហុក លោក ស៊ុម ចាន់គា ត្រូវបានតុលាការសម្រេចថា មានពិរុទ្ធភាពលើបទល្មើស បរិហាកេរ្តិ៍ជាសាធារណៈ ដោយយោងតាមបណ្តឹងរបស់ក្រុមហ៊ុនKDC International Co។ ក្រុមហ៊ុនKDC International Co នេះ ជាប់ពាក់ព័ន្ធទៅនឹងជម្លោះដីធ្លីជាមួយប្រជាពលរដ្ឋនៅខេត្តកំពង់ឆ្នាំង។ ក្រុមហ៊ុននេះជាក្រុមហ៊ុនរបស់អ្នកស្រី ជា ខេង ដែលត្រូវជាភរិយាលោកអតីតរដ្ឋមន្ត្រីក្រសួងឧស្សាហកម្ម រ៉ែ និងថាមពល។
ដីធ្លី៖ នៅថ្ងៃទី២៦ ខែមករា អ្នកភូមិពីរនាក់ នៅខេត្តព្រះសីហនុ ត្រូវបានតុលាការកោះហៅ ដើម្បីប្រឈមនឹងការចោទប្រកាន់ពីបទប្រើប្រាស់លិខិតក្លែង។ អ្នកភូមិទាំងពីរនាក់នេះ ជាតំណាងឲ្យពលរដ្ឋចំនួន ៤២គ្រួសារ ក្នុងការការពារដីធ្លីសហគមន៍របស់អ្នកទាំងនោះ ពីការរំលោភយកដោយក្រុមហ៊ុន ម៉ុង ឬទ្ធី។
ដីធ្លី៖ នៅថ្ងៃទី២៥ ខែកុម្ភៈ អ្នកភូមិប្រមាណ ៣៥នាក់ ក្នុងខេត្តកំពង់ស្ពឺ ត្រូវបានវាយដំ និងរងរបួសយ៉ាងធ្ងន់ធ្ងរដោយសារកងកម្លាំងសមត្ថកិច្ចចម្រុះ រួមនិងក្រុមទាហានមកពីភូមិភាគ៣។ ពលរដ្ឋទាំងនោះត្រូវបានវាយដំ នៅអំឡុងពេលដែលអ្នកទាំងនោះតវ៉ាជំទាស់នឹងការប្រើប្រាស់គ្រឿងចក្រឈូសឆាយដីរបស់ពួកគេ។
ការងារ៖ នៅថ្ងៃទី២៥ ខែកុម្ភៈ មេដឹកនាំសហជីពឈ្មោះ ប៉ែន ផល្លា និងកម្មករសំណង់ចំនួន៧១នាក់ផ្សេងទៀត ត្រូវបានបញ្ឈប់ពីការងារ បន្ទាប់ពីអ្នកទាំងនោះបានរៀបចំបង្កើតសហជីព។ កម្មករទាំងនោះ ជាកម្មករជួយសាងសង់បណ្តាញផ្លូវដែកនៅកម្ពុជា ដែលជាគម្រោងមួយទទួលជំនួយមួយផ្នែកពីធនាគារអភិវឌ្ឈន៍អាស៊ី។
ដីធ្លី៖ នៅថ្ងៃទី២៨ ខែកុម្ភៈ តំណាងសហគមន៍បឹងកក់ចំនួន ៣នាក់ ត្រូវបានចាប់ខ្លួននៅភ្នំពេញ អំឡុងពេលដែលអ្នកទាំងនោះកំពុងធ្វើបាតុកម្មតវ៉ាជំទាស់នឹងគម្រោងសាងសង់ផ្លូវកាត់សហគមន៍ ដែលនឹងត្រូវកំទេចផ្ទះពលរដ្ឋក្នុងសហគមន៍របស់អ្នកទាំងនោះ ចំនួន១៩ខ្នង។
ដីធ្លី៖ នៅថ្ងៃទី១៤ ខែមីនា តំណាងសហគមន៍ឈ្មោះ ព្រាប ណារិន ត្រូវបានចាប់ខ្លួនដោយកងរាជអាវុធហត្ថចំនួន១៥នាក់ និងមន្ត្រីបរិស្ថាន ដែលដឹកនាំដោយតំណាងក្រុមហ៊ុន Union Development Group Company Ltd ។ ការចាប់ខ្លួន ត្រូវបានធ្វើឡើងបន្ទាប់ពី ណារិន បានដឹកនាំការតវ៉ាមួយរបស់ពលរដ្ឋ ៣០គ្រួសារ ដែលរងគ្រោះដោយសារដីសម្បទានសេដ្ឋកិច្ចទំហំ ៣៦.០០០ ហិកតា របស់ក្រុមហ៊ុននេះ នៅក្នុងខេត្តកោះកុង។
ដីធ្លី៖ នៅថ្ងៃទី២៥ ខែមីនា តំណាងសហគមន៍បឹងកក់ អ្នកស្រី គង់ ចន្ថា បានរងការវាយដំ និងចាប់ខ្លួន បន្ទាប់ពីបានធ្វើការប្រមូលផ្តុំគ្នានៅក្រៅសាលារាជធានីភ្នំពេញ។
ដីធ្លី៖ នៅថ្ងៃទី២១ ខែមេសា ពលរដ្ឋបឹងកក់ចំនួន១១នាក់ ត្រូវបានចាប់ខ្លួន និងឃុំខ្លួនពេញមួយយប់ បន្ទាប់ពីការតវ៉ារបស់អ្នកទាំងនោះ ត្រូវបានបំបែកយ៉ាងហិង្សា ដោយកម្លាំងសមត្ថកិច្ច។ ស្ត្រីមានផ្ទៃពោះម្នាក់ បានបាត់បង់ទារកនៅក្នុងផ្ទៃបន្ទាប់ពីនាងត្រូវបាននគរបាលអូសចេញទៅ។
ដីធ្លី៖ នៅថ្ងៃទី៣០ ខែមេសា កងរាជអាវុធហត្ថ បានវាយដំដោយប្រើប្រាស់អាវុធ ទៅលើពលរដ្ឋចំនួន ៣នាក់ អំឡុងពេលនៃការតវ៉ារយៈពេល២ថ្ងៃ ជុំវិញជម្លោះដីធ្លីនៅខេត្តមណ្ឌលគិរី ដែលមានការជាប់ពាក់ព័ន្ធនឹងដីសម្បទានរបស់ក្រុមហ៊ុន ម៉ុង ឬទ្ធី ។
ការងារ៖ នៅថ្ងៃទី៨ ខែមីនា កម្មការរោងចក្រចំនួន ១០នាក់ បានរងរបួស ហើយមេដឹកនាំសហជីពម្នាក់ ឈ្មោះ ផេង ជូ ត្រូវបានឃុំខ្លួនមួយយប់ បន្ទាប់ពីមានការធ្វើបាតុកម្មដោយកម្មកររោងចក្រប្រមាណមួយពាន់នាក់ ដែលបាតុកម្មនោះត្រូវបានបំបែកយ៉ាងហិង្សា ដោយកងរាជអាវុធហត្ថ និងនគរបាលនៅរាជធានីភ្នំពេញ។
ដីធ្លី៖ នៅថ្ងៃទី២៦ ខែឧសភា អាជ្ញាធរមូលដ្ឋាន និងក្រុមទាហាននៅខេត្តកំពង់ស្ពឺ បានដុតផ្ទះប្រជាពលរដ្ឋចំនួន ១០ខ្នង ហើយបានវាយដំទៅលើតំណាងសហគមន៍ លោក ស៊ីម សុន ដោយប្រើកាំភ្លើង ហើយបានគម្រាមដល់អាយុជីវិតរបស់លោក ពាក់ព័ន្ធនឹងជម្លោះដីធ្លីជាមួយនឹងអាជ្ញាធរមូលដ្ឋាន។
ដីធ្លី៖ នៅថ្ងៃទី៩ ខែឧសភា លោក នេត សួង ដែលសកម្មជនអភិរក្សធនធានជលផល ត្រូវបានខ្មាន់កាំភ្លើងមិនស្គាល់មុខម្នាក់បាញ់សម្លាប់ពេលគាត់កំពុងស្តាប់វិទ្យុនៅផ្ទះ។
ដីធ្លី៖ នៅថ្ងៃទី៧ ខែកក្កដា តំណាងសហគមន៍បឹងកក់ ២រូប អ្នកស្រី ទេព វន្នី និង អ្នកស្រី នន សុខខេង ត្រូវបានចាប់ខ្លួន និងឃុំខ្លួនមួយយប់ បន្ទាប់ពីមានការប្រមូលផ្តុំពលរដ្ឋមួយក្រុមនៅក្បែរស្ថានទូតបារាំង។
សង្គមស៊ីវិល៖ នៅថ្ងៃទី១៦ ខែកក្កដា បុគ្គលិកសមាគមធាងត្នោត ២នាក់ ត្រូវបានឃុំខ្លួនអស់រយៈពេលជាច្រើនម៉ោង បន្ទាប់ពីអ្នកទាំងពីរ ត្រូវបានចាប់ខ្លួនដោយអង្គរក្សសម្តេច ជា ស៊ឹម។ ការចាប់ខ្លួន បានធ្វើឡើង នៅខណៈដែលអ្នកទាំងពីរកំពុងតែថតរូបនៅផ្ទះមួយចំនួន ដែលម្ចាស់ផ្ទះទទួលបានការជូនដំណឹងអំពីការបណ្តេញចេញ។ ផ្ទះទាំងនោះ នៅក្បែរគេហដ្ឋានរបស់មន្ត្រីជាន់ខ្ពស់គណបក្សប្រជាជន។
ការងារ៖ នៅថ្ងៃទី២៣ ខែកក្កដា មេដឹកនាំសហជីព ៤រូប ត្រូវបានចាប់ខ្លួនដោយនគរបាលក្រុងភ្នំពេញ នៅខណៈពេលដែលសកម្មជនទាំង៤កំពុងធ្វើការចែកខិតបណ្ណរបស់សហជីព អំពីតម្លៃខ្ពស់ក្នុងការរស់នៅ និងតម្រូវការប្រាក់ឈ្នួលខ្ពស់ជាងមុន។
សង្គមស៊ីវិល៖ នៅថ្ងៃទី២ ខែសីហា សមាគមធាងត្នោត ត្រូវបានបិទជាបណ្តោះអាសន្នដោយក្រសួងមហាផ្ទៃ ដោយគ្មានការពន្យល់ពីបញ្ហាផ្លូវច្បាប់ណាមួយឡើយ។
បញ្ចេញមតិ៖ នៅថ្ងៃទី៣ ខែសីហា ក្រសួងព័ត៌មានបានបញ្ជាអោយបិទកាសែតឯករាជ្យជាខេមរភាសាចំនួន២ គឺ កាសែតឈ្មោះកាសែតទឹក និងភ្លើង និងកាសែតពិភពលោក ដោយសារកាសែតទាំងពីរបានចេញផ្សាយអត្ថបទជាច្រើន ដែលរិះគន់ទៅលើគណបក្សកាន់អំណាច។
បញ្ចេញមតិ៖ នៅថ្ងៃទី៤ ខែសីហា បុរស៥នាក់ ត្រូវបានតុលាការសម្រេចផ្តន្ទាទោសពីបទ ញុះញុងឱ្យប្រព្រឹត្តបទឧក្រិដ្ឋជាអាទិ៍ បន្ទាប់ពីមានការចែកនូវខិត្តបណ្ណរិះគន់ការផ្តល់ដីសម្បទាន និងចោទប្រកាន់ដោយគ្មានភស្តុតាងទៅលើរាជរដ្ឋាភិបាលថាមានការទំនាក់ទំនងគ្នាយ៉ាងជិតស្និតជាមួយប្រទេសវៀតណាម។
ដីធ្លី៖ នៅថ្ងៃទី២៥ ខែសីហា កងរាជអាវុធហត្ថខេត្តព្រះសីហនុចំនួន ៤០នាក់ បានចាប់ខ្លួនតំណាងសហគមន៍ចំនួន ២រូប ដោយចោទប្រកាន់ពីបទប្រើប្រាស់ហិង្សាទៅលើអ្នកកាន់កាប់អចលនវត្ថុដោយសុចរិត។ ការចាប់ខ្លួននេះគឺពាក់ព័ន្ធទៅនឹងបញ្ហាជម្លោះដីធ្លីរវាងប្រជាពលរដ្ឋចំនួន ១៨៧គ្រួសារ ជាមួយនឹងឧកញ៉ា ជា សឿន។
ដីធ្លី៖ នៅថ្ងៃទី១៦ ខែកញ្ញា សកម្មជនបឹងកក់ លោក សួង សុភ័ណ្ឌ ត្រូវបានក្រុមកងនគរបាលអន្តរាគមន៍វាយយ៉ាងដំណំ និងសន្លប់បាត់បង់ស្មារតី។ ការវាយដំនេះ បានកើតឡើង បន្ទាប់ពីអាជ្ញាធរបានការពារគ្រឿងចក្រចំនួន ២គ្រឿង ដែលត្រូវបានបញ្ជូនមកសម្រាប់ធ្វើការឈូសឆាយផ្ទះរបស់ប្រជាពលរដ្ឋនៅតំបន់នោះ។
សង្គមស៊ីវិល៖ នៅថ្ងៃទី១៣ ខែតុលា បុគ្គលិកអង្គការអាដហុក ២នាក់ និងអ្នកកាសែតវិទ្យុអាស៊ីសេរីម្នាក់ ត្រូវបានតុលាការខេត្តរតនគិរីកោះហៅ ពាក់ព័ន្ធបទល្មើសញុះញង់ ទាក់ទងនឹងជម្លោះដីធ្លីរវាងក្រុមហ៊ុន DM Group និងពលរដ្ឋជនជាតិដើមភាគតិចចំនួន ១៣៦គ្រួសារ នៅក្នុងខេត្តរតនគិរី។
ដីធ្លី៖ នៅថ្ងៃទី២៤ ខែវិច្ឆិកា កងកម្លាំងសមត្ថកិច្ចចម្រុះ បានបាញ់ទៅលើមេឃ ដើម្បីគម្រាមគំហែងក្រុមបាតុករប្រមាណ១០០នាក់ ដែលបានធ្វើការជួបជុំតវ៉ានឹងការប្រគល់ដីចំនួន១៧៥ហិកតា ឲ្យទៅសមាគមមួយ ដែលតំណាងដោយវីរសេនីយន៍ឯកយោធាម្នាក់នៅខេត្តកំពង់ស្ពឺ។
ដីធ្លី៖ នៅថ្ងៃទី២៨ ខែវិច្ឆិកា សកម្មជនបឹងកក់ចំនួន ៤នាក់ ត្រូវបានចាប់ខ្លួនដោយកងកម្លាំងសន្តិសុខខណ្ឌដូនពេញ នៅខណៈពេលដែលអ្នកទាំងនោះកំពុងតវ៉ាប្រឆាំង។ អ្នកទាំងនោះ ត្រូវបានឃុំខ្លួនមួយយប់ ចំណែកឯពលរដ្ឋប្រមាណ ៥០នាក់ត្រូវបានវាយប្រហារដោយក្រុមប៉ូលីស។
ដីធ្លី៖ នៅថ្ងៃទី១៣ ខែធ្នូ សកម្មជនសហគមន៍ចំនួន ៣នាក់ នៅខេត្តបាត់ដំបង បានរងរបួស បន្ទាប់ពីមេបញ្ជាការរងយោធាម្នាក់ ដែលបានដើរតួនាទីជាសន្តិសុខឯកជនអោយក្រុមហ៊ុនមួយ បានបាញ់ទៅលើការប្រមូលផ្តុំរបស់ប្រជាពលរដ្ឋមួយក្រុម។ ប្រជាពលរដ្ឋទាំងនោះ បានស្នើសុំចូលរួមក្នុងការប្រជុំរវាងអាជ្ញាធរមូលដ្ឋាន និងក្រុមហ៊ុន លើរឿងជម្លោះដីធ្លីដ៏រ៉ាំរ៉ៃពាក់ព័ន្ធនឹងប្រជាពលរដ្ឋទាំងនោះ។
បង្ហាញតាមប្រធានបទ៖ ដីធ្លី នយោបាយ ការងារ សង្គមស៊ីវិល បញ្ចេញមតិ
ផ្សេងៗ៖ នៅក្នុងខែ មករា យ៉ាងតិចណាស់ មានករណីវាយប្រហារដោយទឹកអាស៊ីត ត្រូវបានរាយការណ៍។ ការវាយប្រហារទាំងនេះ ដែលបានកើតឡើងមិនសមាមាត្រទៅលើស្រ្តី អាចនឹងបន្តកើតមានឡើង នៅពេលដែលអ្នកអនុវត្តច្បាប់ និងតុលាការ មិនអាចទប់ស្កាត់ទៅលើការរីករាលដាលនេះ។ អង្គការឃ្លាំមើលសិទិ្ធមនុស្ស (Human Rights Watch) បានរាយការណ៍ថា យ៉ាងតិចមានជនរងគ្រោះដោយទឹកអាស៊ីតចំនួន ៣៦ នាក់ នៅក្នុងឆ្នាំ ២០១០។
នយោបាយ៖ នៅថ្ងៃទី ២៧ ខែមករា អ្នកដឹកនំាបក្សប្រឆាំង លោកសម រស្ស៊ី ត្រូវបានផ្ដន្ទាទោស ពីបទញុះញង់ឲ្យប្រកាន់ពូជសាសន៍ និងបំផ្លិចបំផ្លាញបង្គោលព្រំដែន។ លោកសម រស្ស៊ី ជាមួយនឹងមនុស្សពីរនាក់ផ្សេងទៀត ត្រូវបានកាត់ទោសដោយកំបាំងមុខ និងត្រូវបានផ្តន្ទាទោសអោយជាប់ពន្ធនាគាររយៈពេល២ឆ្នាំ និងពិន័យជាទឹកប្រាក់ចំនួន ៨ លានរៀល (២,០០០ ដុល្លារ)។
ផ្សេងៗ៖ នៅក្នុងថ្ងៃទី ២២ ខែកុម្ភៈ សម្តេចនាយករដ្ឋមន្រ្តី ហ៊ុន សែន បានចុះហត្ថលេខា លើអនុក្រឹត្យដោយធ្វើឲ្យស្របច្បាប់ នូវកិច្ចព្រមព្រៀងដែលមានយូរមកហើយ រវាងកងយោធពលខេមរភូមិន្ទជាមួយ និងវិស័យឯកជន ដែលវិស័យឯកជនអាចផ្ដល់ប្រាក់កាសដល់អង្គភាពយោធាជាក់លាក់ណាមួយ។ ក្រុមអ្នកការពារសិទ្ធិមនុស្ស បានកត់សម្គាល់នៅពេលនោះថា កងយោធាទាំងនោះមួយចំនួន ក៏បានជួយអន្តរាគមន៍ ដើម្បីការពារផលប្រយោជន៍ ក្រុមហ៊ុនឯកជនទាំងនោះមួយចំនួនផងដែរ ពាក់ព័ន្ធនឹងជម្លោះដីធ្លី។
ដីធ្លី៖ នៅថ្ងៃទី ០១ ខែ មីនា អ្នកភូមិចំនួន០៨ នាក់ ដែលមានជម្លោះដីធ្លីមួយ ជាមួយនឹងមន្ត្រីក្រសួងមហាផ្ទៃម្នាក់ ត្រូវបានចាប់ខ្លួន បន្ទាប់ពីត្រូវបានអាជ្ញាធររារាំង មិនអោយធ្វើការតវ៉ានៅមុខ គេហដ្ឋានសម្តេចនាយករដ្ឋមន្រ្តី ហ៊ុន សែន។ ម៉ាស៊ីនថតរបស់បុគ្គលិកអង្គការសិទ្ធិមនុស្ស លីកាដូ និងសមាគម អាដហុក ត្រូវបានរឹបអូស ហើយរូបថតនៃការតវ៉ានិងការចាប់ខ្លួនត្រូវបានលុបចោល។ អ្នកភូមិទាំង ៨ នាក់ ត្រូវបានបញ្ជូនខ្លួនទៅកាន់ពន្ធនាគារ ហើយក្រោយមកត្រូវបានដោះលែង បន្ទាប់ពីបានយល់ព្រមផ្តិតមេដៃ លើឯកសារដកពាក្យបណ្តឹងរបស់ពួកគេទាក់ទងនឹងបញ្ហាដីធ្លីនេះ។
ដីធ្លី៖ នៅដើមខែមីនា មន្ត្រីនគរបាលម្នាក់ បានបាញ់ទៅលើពលរដ្ឋមួយក្រុម ដែលមានសមាជិកជាង ៥០ គ្រួសារ ប្រមូលផ្តុំគ្នា ដើម្បីទាមទារដីចំការរបស់ពួកគេពីគណៈកម្មាធិការមួយ ដែលត្រូវបានបង្កើតឡើងដោយក្រុមហ៊ុនអភិវឌ្ឍន៍កៅស៊ូ តានបៀនកំពង់ធំ។ ក្រុមហ៊ុននេះ ទទួលបានដីសម្បទានសេដ្ឋកិច្ចជាង ៨.១០០ ហិកតានៅក្នុងឆ្នាំ ២០០៧។ ការសម្បទានដីធ្លី នេះ ធ្វើឲ្យពលរដ្ឋជាង ១.៣០០ គ្រួសារ រងការគម្រាមកំហែងពីការបណ្តេញចេញ។ ពលរដ្ឋចំនួន ៣នាក់ ត្រូវបានបញ្ជូនទៅកាន់មន្ទីរពេទ្យ ដោយសារការងារបួសធ្ងន់ធ្ងរពីគ្រាប់កាំភ្លើង។
ដីធ្លី៖ នៅថ្ងៃទី ១៧ ខែមីនា ទាហានជាង ៣០ នាក់ មកពីកងវរសេនាតូចលេខ ៣១៣ ត្រូវបានដាក់ពង្រាយ បន្ទាប់ពីអ្នកភូមិ ៣០០ នាក់មកពី ១០ ភូមិ ក្នុងខេត្តកំពង់ស្ពឺ បានជំទាស់ ចំពោះការផ្តល់ដីសម្បទាន ទៅឲ្យសមាជិកព្រឹទ្ធសភាគណបក្សកាន់អំណាច លោកលីយ៉ុងផាត់ ដែលក៏ជាអ្នកបានឧបត្ថម្ភជាផ្លូវការដល់កងវរសេនាតូច ៣១៣ នេះផងដែរ។ អ្នកភូមិពីរនាក់ លោកខឹម វុទ្ធី និង លោកយូ ថូ ត្រូវបានកោះហៅ និងក្រោយមកត្រូវបានចោទប្រកាន់ ពីបទញុះញង់ដោយឃុបឃិតគ្នារៀបចំអោយមានអគ្គីភ័យ និងឃុបឃិតគ្នាដើម្បីញុះញង់ឱ្យមានអំពើហិង្សា។ នៅថ្ងៃបន្ទាប់ អ្នកភូមិរាប់រយនាក់ បានធ្វើដំណើរទៅកាន់ទីរួមខេត្តកំពង់ស្ពឺ ដើម្បីបង្ហាញការគាំទ្រដល់អ្នកតំណាងទាំងពីរ ប៉ុន្តែយ៉ាងតិចណាស់មានពលរដ្ឋចំនួន ៣ នាក់ ត្រូវបានវាយដំដោយនគរបាលនិង ៧ នាក់ទៀតបានរងរបួសស្រាល។
ការងារ៖ នៅថ្ងៃទី ០១ ខែឧសភា រាជរដ្ឋាភិបាលកម្ពុជា បានរារាំងសហព័ន្ធសហជីពកម្ពុជា និង គណបក្សសម សង្ស៊ី ចំពោះការចាក់បញ្ចាំងខ្សែភាពយន្តឯកសារ ដែលមានចំណងជើងថា៖ “នរណាសម្លាប់លោក ជា វិជ្ជា?” នៅរាជធានីភ្នំពេញ។ ខ្សែភាពយន្តនេះ ធ្វើការស៊ើបអង្កេត ទៅលើករណីឃាតកម្មលោក ជា វិជ្ជា នៅឆ្នាំ ២០០៤ ដែលជាអតីតមេដឹកនាំសហជីពសេរីកម្មករនៃព្រះរាជាណាចក្រកម្ពុជា។ បើទោះបីជាមានការនិយាយពីដំបូងថា ពួកគេនឹងមិនមានការជំទាស់ក៏ដោយ ក៏ក្រោយមកមន្រ្តីរដ្ឋាភិបាលនៅទាមទារឲ្យមានការយល់ព្រមពី “ក្រសួងពាក់ព័ន្ធ” និងចោទប្រកាន់ថាខ្សែភាពយន្តនេះត្រូវបាននាំចូលដោយខុសច្បាប់ ហើយបានអះអាងថា ក្រសួងវប្បធម៌និងវិចិត្រសិល្បៈ ត្រូវតែយល់ព្រមគ្រប់ខ្សែភាពយន្តដែលដាក់បញ្ចាំងនៅក្នុងប្រទេស។
នយោបាយ៖ នៅថ្ងៃទី ០២ ខែមិថុនា តុលាការកំពូលបានសម្រេចដំកល់សាលដីការបស់សាលាឧទ្ធរណ៍លើបទល្មើសបរិហារកេរិ៍្តជាសាធារណៈ ប្រឆាំងនឹងលោកស្រី មូរ សុខហួរ ដែលអ្នកតំណាងរាស្ត្រមកពីគណបក្សបក្សប្រឆាំង។ សាលក្រម ត្រូវបានប្រកាស បន្ទាប់ពីសម្តេចនាយករដ្ឋមន្រ្តី ហ៊ុនសែន បានចោទប្រកាន់លោកស្រី មូរ សុខហួរ ពីបទបរិហារកេរ្តិ៍ បន្ទាប់ពីលោកស្រី បានធ្វើសន្និសិទកាសែតមួយ ដោយចោទប្រកាន់សម្តេចនាយករដ្ឋមន្រ្តីពីបទបរិហាកេរ្តិ៍។ សាលក្រមនេះ តម្រូវអោយ លោកស្រី បង់ប្រាក់ពិន័យចូលរដ្ឋចំនួន ៨,៥ លានរៀល (២.១២៥ ដុល្លារ) និង ៨ លានរៀល (២.០០០ ដុល្លារ) ទៀតជាសំណងដល់សម្តេចនាយករដ្ឋមន្រ្តី។
ការងារ៖ នៅថ្ងៃទី ២៧ ខែកក្កដា ស្ត្រី ៩នាក់ បានរងរបួស បន្ទាប់ពីកងកម្លាំងប្រដាប់អាវុធប្រឆាំងកុបកម្ម បានប្រើដំបងឆក់និងខែល ដើម្បីបំបែកការប្រមូលផ្តុំមួយរបស់កម្មករកាត់ដេរ ប្រមាណ ៣.០០០ នាក់ ដែលធ្វើកូដកម្ម។ ក្រុមកម្មករដែលធ្វើកូដកម្ម បានទាមទារអោយតំណាងសហជីពរបស់ពួកគេ ដែលត្រូវបានបញ្ឈប់ពីការងារ អោយទទួលបានការងារវិញដូចដើម។
ដីធ្លី៖ នៅថ្ងៃទី២៧ ខែកក្កដា ការជំនុំជម្រះ បានធ្វើឡើងទៅលើអ្នកដឹកនាំសហគមន៍ជីក្រែងចំនួន ៩ នាក់ ដែលត្រូវបានចោទប្រកាន់ពីបទប៉ុនប៉ងមនុស្សឃាត ទៅលើមន្រ្តីនគរបាល ដែលពាក់ព័ន្ធនឹង ជម្លោះដីធ្លីដែលបានកើតឡើងជាយូរមកហើយ។ ការចាប់ខ្លួន នេះបានកើតឡើងនៅ ខែមីនា ឆ្នាំ២០០៩ បន្ទាប់ពីកងរាជអាវុធហត្ថបានបាញ់ ទៅលើអ្នកភូមិជីក្រែងក្នុងវាលស្រែរបស់ពួកគេ ដែលបណ្តាលឱ្យមានមនុស្សចំនួនបីនាក់រងរបួស។ អ្នកកាសែត សង្គមស៊ីវិលដែលឃ្លាំមើលស្ថានភាព និងសមាជិកគ្រួសាររបស់ពលរដ្ឋទាំងនោះ ត្រូវបានរារាំងមិនឱ្យចូលរួមសវនាការនោះឡើយ ហើយអ្នកទាំងប្រាំបួននាក់ ត្រូវបានផ្តន្ទាទោសពីបទល្មើសផ្សេងទៅវិញ ដែលជាបទល្មើស “ជាសមាជិកក្រុមប្រដាប់អាវុធខុសច្បាប់” និងត្រូវបានសម្រេចដោយព្យួរទោសមួយផ្នែក ក្រោមការផ្តន្ទាទោសពន្ធនាគាររយៈពេល ៣ឆ្នាំ ក្នុងខែ សីហា ឆ្នាំ២០១០។
ដីធ្លី៖ នៅថ្ងៃទី០៩ ខែសីហា អាជ្ញាធរក្នុងខេត្តបាត់ដំបងបានចាប់ខ្លួន លោក ង៉ា ម៉ុក ជាអ្នកតវ៉ាដីធ្លីម្នាក់ ដែលបានធ្វើដំណើរមកទីក្រុងភ្នំពេញ ជាមួយសមាជិកសហគមន៍ដទៃទៀត ដើម្បីប្រមូលផ្តុំគ្នា នៅខាងមុខអគារទីស្តីការគណៈរដ្ឋមន្រ្តី។ គាត់ត្រូវបានចាប់ខ្លួនពីបទ ប្លន់ បន្ទាប់ពីបានវិលត្រឡប់ទៅ ស្រុកគាស់ក្រឡ ខេត្តបាត់ដំបង វិញ ហើយអ្នកភូមិម្នាក់ទៀតបានរាយការណ៍ថាមានកងកំលាំងយោធា និងកងកម្លាំងស៊ីវិល បានឡោមព័ទ្ធភូមិ ដើម្បីរារាំងអ្នកភូមិមិនអោយចាកចេញ ទៅធ្វើការតវ៉ាឡើយ។
ការងារ៖ នៅថ្ងៃទី ១៩ ខែសីហា កម្មករកាត់ដេរប្រហែល ១៦០នាក់ នៅភ្នំពេញ បានធ្វើបាតុកម្ម ដើម្បីទាមទារលក្ខខណ្ឌការងារប្រសើរជាងមុន។ ប្រហែលមួយសប្តាហ៍ក្រោយមក អាជ្ញាធរបានចាត់ទុកថា ការធ្វើកូដកម្មនេះគឺខុសច្បាប់ ហើយបានបង្គាប់ឱ្យនិយោជិកវិលត្រឡប់ទៅធ្វើការវិញ ហើយបានអនុញ្ញាតឱ្យរោងចក្របញ្ឈប់អ្នកដឹកនាំសហជីព។ មេដឹកនាំសហជីព ៣នាក់គឺ លោក លីន ពៅ លោក ហេង បូរ៉ា និងលោក នួន ចំណាន ត្រូវបានចោទប្រកាន់ពីបទញុះញង់និងបំផ្លាញទ្រព្យសម្បត្តិឯកជន។
សង្គមស៊ីវីល៖ នៅថ្ងៃទី៣០ ខែសីហា បុគ្គលិកអង្គការលីកាដូ លោក លៀង សុខជឿន ត្រូវបានឃុំខ្លួន នៅតុលាការខេត្តតាកែវ និងត្រូវបានចោទប្រកាន់ពីបទផ្សព្វផ្សាយព័ត៌មានមិនពិត តាមមាត្រា ៦២ នៃច្បាប់ព្រហ្មទណ្ឌអន្តរកាល UNTAC ដោយលោកបានចែកចាយខិត្តប័ណ្ណ ប្រឆាំងរាជរដ្ឋាភិបាល។ ក្រោយមក គាត់ត្រូវបានកាត់ទោសឱ្យជាប់ពន្ធនាគាររយៈពេល ២ ឆ្នាំ និងពិន័យជាប្រាក់ ៥០០ ដុល្លារ។
ការងារ៖ នៅថ្ងៃទី ១៣ ខែកញ្ញា កម្មករកាត់ដេរ រាប់ពាន់នាក់នៅទូទាំងប្រទេស បានធ្វើបាតុកម្ម ដើម្បីទាមទារដំឡើងប្រាក់ខែគោល គឹ៦១ ដុល្លារក្នុងមួយខែ។ បន្ទាប់ពីការចរចាជាច្រើនជាមួយអាជ្ញាធរ បាតុកម្មត្រូវបានបញ្ឈប់បន្ទាប់ពីត្រូវបានធ្វើឡើងរយៈពេល ៣ថ្ងៃ។ ទោះយ៉ាងណាក្នុងរយៈពេលពីរបីថ្ងៃក្រោយមក ម្ចាស់រោងចក្របានបញ្ឈប់អ្នកដឹកនាំសហជីពរាប់រយនាក់។ យ៉ាងតិចណាស់មានចៅក្រមកម្ពុជា ៦ រូបផ្សេងៗគ្នា បានចេញសេចក្តីបង្គាប់អនុញ្ញាត ឲ្យម្ចាស់រោងចក្រព្យួរការងារតំណាងសហជីពជិត ២០០ នាក់ និងយ៉ាងតិចណាស់មានរោងចក្រចំនួន១០ បានដាក់ពាក្យបណ្តឹងប្រឆាំងនឹងសហជីព ដោយទាមទារសំណងប្រមាណ ១៤ លានដុល្លារ។ បាតុកម្មលើកទីពីរត្រូវបានធ្វើឡើង ហើយនគរបាល បានប្រើកម្លាំងដើម្បីបង្ក្រាបបាតុកម្មទាំងនេះ។ កម្មករចំនួន ១២ នាក់ បានរងរបួសកាលពីថ្ងៃទី១៨ ខែកញ្ញា ដោយស្ត្រីម្នាក់ត្រូវបានបញ្ចូនទៅកាន់មន្ទីរពេទ្យ ហើយយ៉ាងតិចណាស់មានមេដឹកនាំកម្មករចំនួន ៣ នាក់ បានរាយការណ៍ថា បានទទួលការគំរាមកំហែងនិងការបំភិតបំភ័យ។
នយោបាយ៖ នៅថ្ងៃទី ២៣ ខែកញ្ញា មេដឹកនាំគណបក្សប្រឆាំង លោក សម រង្ស៊ី ត្រូវបានតុលាការកាត់ទោសកំបាំងមុខ ឲ្យជាប់ពន្ធនាគាររយៈពេល ១០ឆ្នាំ ពីបទក្លែងបន្លំឯកសារសាធារណៈ និងផ្សព្វផ្សាយព័ត៌មានមិនពិត ដោយសាលាដំបូងរាជធានីភ្នំពេញ។ ការផ្តន្ទាទោស ជាមួយនឹងប្រាក់ពិន័យ និងសំណងជាង ១២៥ លានរៀល (ច្រើនជាង ៣១.២៥០ដុល្លារ) គឺទាក់ទងទៅនឹងការចុះផ្សាយជាសាធារណៈរបស់ លោក សម រង្ស៊ី នូវផែនទីព្រំដែនកម្ពុជា - វៀតណាមដែលមានជម្លោះ។
ដីធ្លី៖ នៅថ្ងៃទី ២៨ ខែតុលា ឆ្នាំ ២០១០ អ្នកភូមិមួយចំនួន ត្រូវបានកងកម្លាំងប្រដាប់អាវុធប្រឆាំងកូដកម្ម និងមន្រ្តីនគរបាល វាយដំ បន្ទាប់ពីអ្នកទាំងនោះប្រមូលផ្តុំគ្នា នៅទីក្រុងភ្នំពេញ ដើម្បីចង់ជួបជាមួយ អគ្គលេខាធិការអង្គការសហប្រជាជាតិ លោក បាន គីមូន ទាក់ទងនឹងជម្លោះដីធ្លីរបស់ពួកគេនៅបឹងកក់។ ពលរដ្ឋចំនួន ៥០ នាក់ បានប្រមូលផ្តុំគ្នា ដើម្បីស្វែងរកអន្តរាគមន៍ពីថ្នាក់ដឹកនាំអង្គការសហប្រជាជាតិ ប៉ុន្តែត្រូវបានក្រុមមន្រ្តីនគរបាល បានធ្វើការបង្ក្រាប និងវាយដំ ជាមួយនឹងវិទ្យុទាក់ទង និងដំបងឆក់។ លោក សួង សុភ័ណ្ឌ ជាសកម្មជនបឹងកក់ ត្រូវបានចាប់ខ្លួន និងវាយដំយ៉ាងធ្ងន់ធ្ងរ ដែលបណ្តាលឱ្យរងរបួសក្បាលហូរឈាម។
ការបញ្ចេញមតិ៖ នៅថ្ងៃទី១៨ ខែធ្នូ លោក សេង គុណ្ណាកា ត្រូវបានចាប់ខ្លួននៅភ្នំពេញ បន្ទាប់ពីត្រូវបានចោទប្រកាន់ថាបានបោះពុម្ពឯកសារពីគេហទំព័រអ៊ីនធឺណេតមួយ មានអត្ថន័យរិះគន់រាជរដ្ឋាភិបាល ។ គាត់ត្រូវបានផ្តន្ទាទោសពីបទញុះញង់ឲ្យប្រព្រឹត្តបទឧក្រិដ្ឋ ដែលធ្វើឡើងក្រោយប៉ុន្មានថ្ងៃនៃការចាប់ខ្លួនរបស់លោក ហើយត្រូវបានផ្តន្ទាទោសដាក់ពន្ធនាគារចំនួន ៦ខែ និងពិន័យជាប្រាក់ ១ លានរៀល (២៥០ ដុល្លារ) ។