អ្នកដើរហែក្បួនធម្មយាត្រា-សិទិ្ធយាត្រាបន្តដំណើរនៅទូទាំងប្រទេសដើម្បីប្រារព្ធទិវាសិទិ្ធមនុស្សអន្តរជាតិ នៅថ្ងៃទី៣
ចេញផ្សាយ ថ្ងៃទី៧ ខែធ្នូ ឆ្នាំ២០១៤
នៅព្រឹកព្រលឹមថ្ងៃនេះ អ្នកដើរហែក្បួនធម្មយាត្រា-សិទិ្ធយាត្រាតាមបណ្តោយផ្លូវជាតិលេខ ១ ២ ៣ ៤ ៥ និង៦ បានបន្តធ្វើដំណើរឆ្ពោះមកកាន់រាជធានីភ្នំពេញ ដើម្បីប្រារព្ធទិវាសិទិ្ធមនុស្សអន្តរជាតិនាថ្ងៃទី១០ ខែធ្នូ។
អ្នកដើរហែក្បួននៅផ្លូវជាតិលេខ ២ ជាថ្មីម្តងទៀត បានជួបឧបសគ្គមួយចំនួន ជាពិសេសការទទួលបានការអនុញ្ញាតចូលស្នាក់នៅមួយយប់នៅក្នុងវត្ត។ អ្នកដើរហែក្បួនប្រមាណ ១៣០នាក់ រួមមានព្រះសង្ឃ ២២អង្គ មិនត្រូវបានអនុញ្ញាតឲ្យចូលក្នុងវត្ត នាងខ្មៅ រហូតដល់ម៉ោង ៧យប់ បន្ទាប់ពីចរចារអស់រយៈពេលយ៉ាងយូរ។
នៅតាមផ្លូវជាតិលេខ ៣ ព្រះសង្ឃចំនួន ៣៩អង្គ និងអ្នកដើរហែក្បួនប្រមាណ ២០នាក់ មិនត្រូវបានអនុញ្ញាតឲ្យចូលក្នុងវត្ត ប្រាសាទស្រះកែវ ដោយព្រះចៅអធិការវត្តឡើយ។ បន្ទាប់ពីចរចាមិនបានជោគជ័យជាមួយព្រះចៅអធិការ អ្នកដើរក្បួនបានបន្តដំណើរទៅវត្តអង្គមេត្រី ប៉ុន្តែនៅតែមិនត្រូវបានអនុញ្ញាតឲ្យចូល។ អ្នកដើរហែក្បួនចុងក្រោយបានចូលទៅវត្ត អង្គរុង នៅខេត្តតាកែវ ដើម្បីសម្រាកមួយយប់។
ក្បួនធម្មយាត្រា-សិទិ្ធយាត្រាតាមផ្លូវជាតិដទៃទៀត បានបន្តដំណើរដូចសព្វដងនាថ្ងៃនេះ ដោយមិនមានបញ្ហាអ្វីធំដុំឡើយ។ នៅផ្លូវជាតិលេខ ៥ អ្នកភូមិមួយចំនួននៅក្នុងខេត្តកំពង់ឆ្នាំង បានប្រគេនម្ហូបអាហារ និងទឹក ដល់ព្រះសង្ឃដែលហែក្បួន នៅខណៈដែលផ្លូវជាតិលេខ ១ អ្នកភូមិបានធ្វើម្ហូបអាហារដល់អ្នកដើរហែក្បួន ហើយអ្នកដើរហែក្បួនទាំងនោះក៏ទទួលការជួបសួរសុខទុក្ខដោយសមាជិកតំណាងរាស្ត្រគណបក្សសង្គ្រោះជាតិ លោក រៀល ខេមរិន្ទ និងម្ចាស់វិទ្យុឯករាជ្យសំបុកឃ្មុំ លោក ម៉ម សូណង់ដូ។
- ឯកសារទាក់ទង
- ចំណងជើង & មូលបទ
- សិទិ្ធបញ្ចេញមតិ និងចូលរួម
