សាលាឧទ្ធរណ៍បដិសេធសំណើសុំនៅក្រៅឃុំបណ្តោះអាសន្នរបស់សកម្មជនអង្គការមាតាធម្មជាតិទាំងបីនាក់
ចេញផ្សាយ ថ្ងៃទី២១ ខែកញ្ញា ឆ្នាំ២០១៥
នៅព្រឹកនេះ សកម្មជនបីនាក់នៃអង្គការ មាតាធម្មជាតិ ត្រូវបានតុលាការបដិសេធសំណើសុំនៅក្រៅឃុំបណ្តោះអាសន្នរង់ចាំសវនាការជាថ្មីម្តងទៀត បន្ទាប់ពីបានបើកសវនាការលើសំណើនេះនៅសាលាឧទ្ធរណ៍រាជធានីភ្នំពេញ។
អ្នកទាំងបីរួមមាន៖ លោក ទ្រី សុវិគា អាយុ ២៣ឆ្នាំ លោក សាន់ ម៉ាឡា អាយុ ២៣ឆ្នាំ និងលោក ស៊ីម សំណាង អាយុ ២៨ឆ្នាំ ត្រូវបានចាប់ខ្លួនកាលពីថ្ងៃទី១៧ ខែសីហា នៅអំឡុងពេលមានយុទ្ធនាការជាបន្តបន្ទាប់ដើម្បីបញ្ឈប់ការបូមខ្សាច់ដែលត្រូវបានអះអាងថាបូមដោយខុសច្បាប់នៅក្នុងខេត្តកោះកុង។ អ្នកទាំងនោះ ត្រូវបានចោទប្រកាន់តាមមាត្រា ៤២៤ នៃក្រមព្រហ្មទណ្ឌ ពីបទល្មើសគម្រាមកំហែង ថានឹងធ្វើឲ្យខូចខាតដោយភ្ជាប់នឹងបញ្ជាអ្វីមួយ ហើយបច្ចុប្បន្ននេះ អ្នកទាំងនោះកំពុងត្រូវបានឃុំខ្លួនក្នុងពន្ធនាគារខេត្តកោះកុង។
សេចក្តីសម្រេចបដិសេធសំណើនៅក្រៅឃុំនេះ ត្រូវបានធ្វើឡើងក្រោយពេលមានការតវ៉ាជាបន្តបន្ទាប់ក្នុងរយៈពេលជាងមួយខែនេះ នៅមុខតុលាការខេត្តកោះកុង ដោយអំពាវនាវសុំឲ្យដោះលែងអ្នកទាំងនោះ ក៏ដូចជាសុំឲ្យមានដំណោះស្រាយចំពោះជម្លោះដីធ្លីផ្សេងទៀតនៅខេត្តកោះកុងផងដែរ។ សកម្មជនទាំងបីនាក់ ត្រូវបានតុលាការខេត្តកោះកុងបដិសេធសំណើនៅក្រៅឃុំម្តងហើយ កាលពីថ្ងៃទី៣១ ខែសីហា។
- ឯកសារទាក់ទង
- ចំណងជើង & មូលបទ
- សិទ្ធិដីធ្លី មាតាធម្មជាតិ
