សហជីពអំពាវនាវឲ្យដោះលែងសមាជិកសហជីពពីរនាក់ដែលជាប់ឃុំ
ចេញផ្សាយ ថ្ងៃទី២៣ ខែកុម្ភៈ ឆ្នាំ២០១៦
នាព្រឹកនេះ សកម្មជនសហជីពជាង ២០០នាក់ បានប្រមូលផ្តុំគ្នានៅមុខពន្ធនាគារ ម១ ក្នុងរាជធានីភ្នំពេញ ដើម្បីអំពាវនាវសុំឲ្យមានការដោះលែងបុរសពីរនាក់ គឺលោក ណន វណ្ណា ជាអ្នកបើកបររថយន្តក្រុងក្រុមហ៊ុនកាពីតូលនិងជាសមាជិកសហព័ន្ធសហជីពកម្មករវិស័យដឹកជញ្ជូនកម្ពុជា (CTWF) និងលោក រស់ ស៊ីផៃ ជាបុគ្គលិកនៃសមាគមសេដ្ឋកិច្ក្រៅប្រព័ន្ធកម្ពុជា (CIWA)។ អ្នកទាំងពីរកំពុងជាប់ឃុំឃាំងតាំងពីថ្ងៃទី៦ ខែកុម្ភៈ និងត្រូវបានចោទប្រកាន់ពីបទហិង្សាដោយចេតនាដោយមានស្ថានទម្ងន់ទោស រារាំងមន្ត្រីរាជការសាធារណៈ និងរារាំងចរាចរណ៍សាធារណៈ។
លោក អាត ធន់ អ្នកដឹកនាំសហជីព ក៏បានចូលរួមជាមួយអ្នកគាំទ្រដទៃទៀតនាថ្ងៃនេះផងដែរ។ លោក អាត ធន់ រួមជាមួយនឹងអ្នកដឹកនាំសហជីពបីនាក់ផ្សេងទៀត រួមមាន លោក គង់ អាទិត្យ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា (C.CAWDU) លោក អៀង គីមហុង សហភាពការងារកម្ពុជា (CLC) និងលោក សុខ ឈុនអឿង សមាគមសេដ្ឋកិច្ចក្រៅប្រព័ន្ធកម្ពុជា (CIWA) ក៏ត្រូវបានចោទប្រកាន់ពីបទល្មើសដូចគ្នានេះផងដែរ ប៉ុន្តែមិនទាន់មានការចាប់ខ្លួននោះទេ។
លោក វណ្ណា និងស៊ីផៃ ត្រូវបានចាប់ខ្លួនដោយនគរបាលបង្ក្រាបបាតុកម្ម កាលពីថ្ងៃទី៦ ខែកុម្ភៈ អំឡុងពេលមានអំពើហិង្សាលើអតីតអ្នកបើកបររថយន្តក្រុងកាពីតូល នៅពេលដែលអ្នកទាំងនោះតវ៉ាជាមួយនឹងសមាជិកសមាគមសេដ្ឋកិច្ចក្រៅប្រព័ន្ធកម្ពុជា (CIWA)។ អ្នកទាំងពីរ ដែលត្រូវបានគេឃុំខ្លួន បានរងរបួសអំឡុងពេលតវ៉ា។
- ឯកសារទាក់ទង
- ចំណងជើង & មូលបទ
- តុលាការ និងនីតិរដ្ឋ សិទិ្ធបញ្ចេញមតិ និងចូលរួម សិទ្ធិការងារ
