សាលាឧទ្ធរណ៍និងតុលាការកំពូលប្រកាសសាលដីកាក្នុងពេលតែមួយប្រឆាំងនឹងអនុប្រធានគណបក្សជំទាស់
ចេញផ្សាយ ថ្ងៃទី៤ ខែវិច្ឆិកា ឆ្នាំ២០១៦នាព្រឹកនេះ សាលាឧទ្ធរណ៍បានសម្រេចតម្កល់សាលក្រមរបស់សាលាដំបូងរាជធានីភ្នំពេញ ដែលបានផ្ដន្ទាទោសអនុប្រធានគណបក្សជំទាស់ឯកឧត្តម កឹម សុខា ពាក់ព័ន្ធនឹងការបដិសេធចូលខ្លួនបំភ្លឺក្នុងនាមជាសាក្សី បន្ទាប់ពីចៅក្រមបដិសេធចោលអំណះអំណាងទាំងឡាយដែលបានលើកឡើងដោយក្រុមមេធាវីការពារក្ដី។
លោក សេង ស៊ីវុត្ថា ចៅក្រមនៃសាលាឧទ្ធរណ៍ក៏បានសម្រេចតម្កល់ការផ្ដន្ទាទោសនៃសាលាដំបូងរាជធានីភ្នំពេញ ដែលបានជំនុំជម្រះកាលពីខែកញ្ញា ដោយបានផ្ដន្ទាទោសឲ្យឯកឧត្តម កឹម សុខា ជាប់ពន្ធនាគាររយៈពេល ៥ខែនិងពិន័យជាប្រាក់ចំនួន ៨សែនរៀល (ប្រហែល២០០ដុល្លារសហរដ្ឋអាមេរិក)។ អនុប្រធានគណបក្សជំទាស់នៅសល់ឱកាសមួយទៀតដើម្បីប្ដឹងជំទាស់នឹងការផ្ដន្ទាទោសនេះ ទៅតុលាការកំពូល ហើយប្រសិនបើការផ្ដន្ទាទោសនៅតែត្រូវបានតម្កល់ទុក ការផ្ដន្ទាទោសរបស់ឯកឧត្តមនឹងចូលជាធរមាន។
ក្នុងពេលជាមួយគ្នានៃសវនាការព្រឹកនេះ តុលាការកំពូលបានប្រកាសសាលដីកាជំទាស់ទៅនឹងអំណះអំណាងរបស់មេធាវីការពារ ដែលបានប្ដឹងជំទាស់នឹងសេចក្ដីសម្រេចដំបូងរបស់ចៅក្រមស៊ើបសួរនៃសាលាដំបូងរាជធានីភ្នំពេញ ដែលសម្រេចឲ្យនាំខ្លួនឯកឧត្តម កឹម សុខា មកចូលរួមសវនាការ។ ការប្ដឹងជំទាស់នេះត្រូវបានធ្វើឡើងដោយសំអាងថាឯកឧត្តម កឹម សុខា នៅមានអភ័យឯកសិទ្ធិសភានៅឡើយ។
- ឯកសារទាក់ទង
- ចំណងជើង & មូលបទ
- តុលាការ និងនីតិរដ្ឋ កឹម សុខា