សាលាឧទ្ធរណ៍បើកសវនាការលើសកម្មជនដីធ្លីពាក់ព័ន្ធនឹងការតវ៉ា កាលពីឆ្នាំ២០១១
ចេញផ្សាយ ថ្ងៃទី១៥ ខែកុម្ភៈ ឆ្នាំ២០១៧នាព្រឹកនេះ តំណាងសហគមន៍បឹងកក់ អ្នកស្រី ទេព វន្នី អ្នកស្រី បូ ឆវី អ្នកស្រី គង់ ចន្ថា និងអ្នកស្រី ហេង មុំ បានបង្ហាញខ្លួននៅក្នុងសវនាការឧទ្ធរណ៍ ដើម្បីប្ដឹងជំទាស់ទៅនឹងសាលក្រមសាលាដំបូងរាជធានីភ្នំពេញកាលពីខែកញ្ញា ពាក់ព័ន្ធនឹងការតវ៉ាមួយក្នុងឆ្នាំ២០១១។ ចៅក្រមសាលាឧទ្ធរណ៍ លោក ញូង ថុល នឹងប្រកាសសាលដីកានេះ នៅថ្ងៃទី២៧ ខែកុម្ភៈ។ ដើមចោទក្នុងសំណុំរឿងនេះមិនបានបង្ហាញវត្តមាននៅក្នុងសវនាការនោះទេ ដែលជាហេតុនាំឲ្យមេធាវីការពារជនជាប់ចោទមិនអាចសួរដេញដោលបាន ដោយសារភ័ស្ដុតាងដាក់បន្ទុកលើជនជាប់ចោទមិនគ្រប់គ្រាន់។
នៅក្នុងសវនាការសាលាដំបូងរាជធានីភ្នំពេញ ស្ត្រីទាំង៤នាក់នេះ ត្រូវបានរកឃើញថាមានពិរុទ្ធ ពាក់ព័ន្ធទៅនឹងការចោទប្រកាន់ពី បទរារាំងមន្រ្តីរាជការសាធារណៈនិងបទប្រមាថមន្រ្តីរាជការសាធារណៈដែលមានស្ថានទម្ងន់ទោស និងត្រូវផ្ដន្ទាទោសដាក់ពន្ធនាគាររយៈពេល៦ខែ។ បច្ចុប្បន្ននេះ អ្នកស្រី ទេព វន្នី កំពុងស្ថិតក្នុងការឃុំខ្លួនបណ្តោះអាសន្ននៅក្នុងមណ្ឌលអប់រំកែប្រែទី២ (ជាកន្លែងដែលអ្នកស្រីត្រូវបានឃុំខ្លួនអស់រយៈពេល៦ខែមកហើយ) ដែលទាក់ទិននឹងបទចោទផ្សេងៗទៀតពាក់ព័ន្ធទៅនឹងការតវ៉ារបស់សហគមន៍បឹងកក់កាលពីឆ្នាំ២០១៣ នៅមុខគេហដ្ឋានសម្តេចនាយករដ្ឋមន្ត្រីហ៊ុន សែន។ អ្នកស្រី បូ ឆវី អ្នកស្រី គង់ ចន្ថា និងអ្នកស្រី ហេង មុំ មិនត្រូវបានចាប់ខ្លួននោះទេ ដោយសារការផ្ដន្ទាទោសមិនទាន់អាចអនុវត្តបាន លុះត្រាតែសាលដីកាសាលាឧទ្ធរណ៍និងតុលាការកំពូលចូលជាធរមាន។ នៅក្នុងសវនាការរបស់សាលាដំបូងរាជធានីភ្នំពេញនិងសាលាឧទ្ធរណ៍ មិនមានការបង្ហាញភ័ស្តុតាងគ្រប់គ្រាន់ដែលអាចបញ្ជាក់ពីកំហុសរបស់ស្ត្រីទាំង៤នាក់នោះទេ។
អំឡុងពេលសវនាការថ្ងៃនេះ ប្រជាសហគមន៍និងអ្នកគាំទ្រប្រមាណជា៤០នាក់ មកពីសហគមន៍ដីធ្លីនិងសង្គមស៊ីវិល បានប្រមូលផ្ដុំគ្នានៅខាងក្រៅតុលាការ។
- ឯកសារទាក់ទង
- ចំណងជើង & មូលបទ
- តុលាការ និងនីតិរដ្ឋ សិទិ្ធបញ្ចេញមតិ និងចូលរួម សិទ្ធិដីធ្លី