សាលាដំបូងខេត្តកោះកុងសម្រេចផ្ដន្ទាទោសសកម្មជនមាតាធម្មជាតិ
ចេញផ្សាយ ថ្ងៃទី២៦ ខែមករា ឆ្នាំ២០១៨នារសៀលនេះ សាលាដំបូងខេត្តកោះកុងបានសម្រេចផ្ដន្ទាទោសលើសកម្មជនមាតាធម្មជាតិពីរនាក់ពីបទញុះញង់និងបទរំលោភសិទ្ធិបុគ្គល និងត្រូវបានផ្ដន្ទាទោសឱ្យជាប់ពន្ធនាគារយៈពេលមួយឆ្នាំ ប៉ុន្តែត្រូវអនុវត្តទោសក្នុងពន្ធនាគាររយៈពេល៥ខែ និង៧ខែទៀតនៃទោសត្រូវបានព្យួរ។ អ្នកទាំងពីរក៏ត្រូវបានពិន័យជាប្រាក់ម្នាក់ៗចំនួនមួយលានរៀលផងដែរ។
លោក ឌឹម គុនឌី និងលោក ហ៊ុន វណ្ណះ ត្រូវបានផ្ដន្ទាទោសផ្អែកតាមមាត្រា៤៩៥នៃក្រមព្រហ្មទណ្ឌស្ដីពីបទញុះញង់ឱ្យប្រព្រឹត្តបទឧក្រិដ្ឋជាអាទិ៍ និងមាត្រា៣០២ដែលចែងពីអំពើថតរូបភាពនៃបុគ្គលនៅក្នុងទីកន្លែងឯកជនដោយគ្មានការព្រមព្រៀង។
ការប្រកាសសាលក្រមលើការផ្ដន្ទាទោសនេះធ្វើឡើងដោយលោកចៅក្រម កែវ សុខា បន្ទាប់ពីសវនាការកាលពីម្សិលមិញ ទោះបីជាភាគីជាប់ចោទបានអះអាងថា មិនមានភ័ស្ដុតាងគ្រប់គ្រាន់ក្នុងការផ្ដន្ទាទោសលើអ្នកទាំងពីរពីបទញុះញង់និងរំលោភលើសិទ្ធិបុគ្គលនៃក្រុមហ៊ុនលីយ៉ុងផាត់ ដែលជាដើមបណ្ដឹងក្នុងរឿងក្ដីនេះទេ។
មុនពេលមានការចាប់និងឃុំខ្លួនអ្នកទាំងពីរ នៅថ្ងៃទី១២ ខែកញ្ញា ឆ្នាំ២០១៧ សកម្មជនទាំងពីរនាក់បានថតសកម្មភាពកប៉ាល់ ដែលអ្នកទាំងពីរសង្ស័យថាជាប់ពាក់ព័ន្ធនឹងសកម្មភាពបូមខ្សាច់ខុសច្បាប់នៅក្នុងលំហរសមុទ្រ។ យោងតាមច្បាប់កម្ពុជា ការថតរូបឬវីដេអូអាចចាត់ទុកថាខុសច្បាប់ លុះត្រាតែការថតនោះមានជាប់រូបបុគ្គលណាម្នាក់នៅទីកន្លែងឯកជនដោយគ្មានការព្រមព្រៀងពីបុគ្គលនោះ។
លោក ឌឹម គុនឌី និងលោក ហ៊ុន វណ្ណៈ ត្រូវបានអង្គការលើកលែងទោសអន្តរជាតិ (Amnesty International) ទទួលស្គាល់ថាជាអ្នកទោសមនសិការ។ ដោយសារអ្នកទាំងពីរត្រូវបានឃុំខ្លួនបណ្ដោះអាសន្នរង់ចាំសវនាការតាំងពីថ្ងៃចាប់ខ្លួន ពួកគាត់ត្រូវបានរំពឹងថានឹងត្រូវដោះលែងឱ្យមានសេរីភាពវិញនៅប៉ុន្មានសប្ដាហ៍ខាងមុខនេះ។
- ឯកសារទាក់ទង
- ចំណងជើង & មូលបទ
- មាតាធម្មជាតិ