សាលាឧទ្ធរណ៍ព្រះសីហនុ តម្កល់ការផ្តន្ទាទោសបទ បរិហារកេរ្តិ៍ លើសកម្មជនដីធ្លីខេត្តកោះកុង
ចេញផ្សាយ ថ្ងៃទី១៩ ខែធ្នូ ឆ្នាំ២០២៣
នាព្រឹកនេះសាលាឧទ្ធរណ៍ព្រះសីហនុ បានសម្រេចតម្កល់ការផ្តន្ទាទោសបទបរិហារកេរិ៍្ត លើសកម្មជនដីធ្លីខេត្តកោះកុងចំនួនពីររូប គឺអ្នកស្រី ផាវ ញើង និងអ្នកស្រី សេង លីន តាមបញ្ញត្តិមាត្រា ៣០៥ នៃក្រមព្រហ្មទណ្ឌ ។ តុលាការ ក៏បានសម្រេចឱ្យរួចផុតពីបទចោទ ញុះញង់ឱ្យប្រព្រឹត្តបទឧក្រិដ្ឋ ជាអាទិ៍ តាមមាត្រា ៤៩៤ និង៤៩៥ នៃក្រមព្រហ្មទណ្ឌ ពីអ្នកទាំងពីរផងដែរ ។ នេះជាការសម្រេចឱ្យរួចផុតពីបទចោទមួយ និងតម្កល់បទចោទមួយដែលបទចោទទាំងពីរត្រូវបានដាក់ដោយសាលាដំបូងខេត្តកោះកុង កាលពីខែសីហា កន្លងទៅ ។
អ្នកស្រី ញើង និងអ្នកស្រី លីន គឺជាអ្នកដែលរងការចោទប្រកាន់ពីអ្នកស្រី ឆាយ វី ដែលជាអតីតអ្នកតំណាងសហគមន៍មួយរូប ដែលត្រូវបានអ្នកទាំងពីរបានចោទប្រកាន់ថាបានរំលោភយកដីធ្លី កាលពីឆ្នាំ២០១៩ ។ សកម្មជនដីធ្លីទាំងពីរ ត្រូវបានតុលាការពិន័យជាប្រាក់ក្នុងម្នាក់ ៤ លានរៀល (ប្រហែល ១.០០០ ដុល្លារ) និងបង្គាប់ឱ្យសងជំងឺចិត្តអ្នកស្រី ឆាយ វី ចំនួន ៤០ លានរៀល (ប្រហែល ១០.០០០ ដុល្លារ) ។
ទាំងអ្នកស្រី ញើង និងអ្នកស្រី លីន ត្រូវបានតុលាការចាប់ដាក់ពន្ធនាគារឃុំខ្លួនបណ្តោះអាសន្នរង់ចាំសវនាការ ពីថ្ងៃទី៣០ ខែមិថុនា ដល់ថ្ងៃទី៦ ខែតុលា នាឆ្នាំនេះ ពីបទញុះញង់ឱ្យប្រព្រឹត្តបទឧក្រិដ្ឋជាអាទិ៍ ។ អំឡុងពេលឃុំខ្លួនបណ្តោះអាសន្ន អ្នកស្រី ផាវ ញើង ជាប់ឃុំក្នុងពន្ធនាគារខេត្តជាមួយនឹងកូនប្រុសតូចរបស់អ្នកស្រីដែលជាទារកនៅឡើយនាពេលនោះ ។
ព្រះរាជអាជ្ញា បានគាំទ្រឱ្យទម្លាក់បទចោទ នូវបទញុះញង់ឱ្យប្រព្រឹត្តបទឧក្រិដ្ឋជាអាទិ៍ អំឡុងពេលសវនាការ ដែលនេះជាសញ្ញាវិជ្ជមាន ថានឹងមិនមានការប្តឹងសាទុក្ខទៅនឹងសាលដីកាសាលាឧទ្ធរណ៍ ទៅតុលាការកំពូលនោះទេ ៕
- ចំណងជើង & មូលបទ
- សិទ្ធិដីធ្លី
