យុវជនគណបក្សសង្គ្រោះជាតិ ៣នាក់ ត្រូវដោះលែងឲ្យនៅក្រៅឃុំបណ្តោះអាសន្ន
ចេញផ្សាយ ថ្ងៃទី២២ ខែសីហា ឆ្នាំ២០១៤
នៅម៉ោង ៩ និង ៣០នាទី ព្រឹកនេះ មេដឹកនាំយុវជនគណបក្សសង្គ្រោះជាតិទាំង បីនាក់ ដែលត្រូវបានចាប់ខ្លួន និងឃុំខ្លួននៅពន្ធនាគារ ម១ កាលពីថ្ងៃទី២ ខែសីហា នឹងត្រូវបានដោះលែងឲ្យនៅក្រៅឃុំបណ្តោះអាសន្នរង់ចាំសវនាការ ដោយត្រូវដាក់ប្រាក់ធានារួមគ្នាសរុប ១០០០ ដុល្លារសហរដ្ឋអាមេរិក។ លោក ឃិន ជំរឿន សាន គីមហេង និងនាង សុខុន នឹងត្រូវបានដោះលែងឲ្យនៅក្រៅឃុំបណ្តោះអាសន្ន និងដាក់ឲ្យស្ថិតនៅក្រោមការត្រួតពិនិត្យពីតុលាការ។ មេធាវី កំពុងធ្វើការដើម្បីឲ្យមានការដោះលែងអ្នកទាំងនោះនៅល្ងាចនេះ។
ជំរឿន មានឈ្មោះនៅក្នុងឯកសាររបស់តុលាការ ដោយការប្តឹងរបស់ព្រះរាជអាជ្ញា កែវ សុជាតិ កាលពីថ្ងៃទី១៦ ខែកក្កដា ដោយត្រូវបានចោទប្រកាន់ដូចគ្នាជាមួយមន្ត្រីគណបក្សសង្គ្រោះជាតិ ៨ រូបផ្សេងទៀត ពីបទញុះញង់ឲ្យមានអំពើហិង្សា និងដឹកនាំចលនាកុបកម្ម។ គីម ហេង និងសុខុន ត្រូវបានចោទប្រកាន់ពីបទបង្កហិង្សា និងរារាំងមន្ត្រីសាធារណៈ និងចូលរួមក្នុងចលនាកុបកម្ម។
ដីកាកោះហៅជាច្រើនទៀត កំពុងរង់ចាំសមាជិកគណបក្សសង្គ្រោះជាតិ ៥នាក់ផ្សេងទៀត ដែលអ្នកទាំងនោះនឹងត្រូវចូលខ្លួនឆ្លើយបំភ្លឺនៅសាលាដំបូងរាជធានីភ្នំពេញនៅសប្តាហ៍ក្រោយ។
គណបក្សប្រជាជនកម្ពុជា និងគណបក្សសង្គ្រោះជាតិ នឹងត្រូវធ្វើការបោះឆ្នោតជ្រើសរើសតំណែងសំខាន់ៗ និងគណកម្មាធិការនៅក្នុងរដ្ឋសភា នៅថ្ងៃទី២៦ ខែសីហា ក្រោយពីមានដំណោះស្រាយនយោបាយមួយកាលពីថ្ងៃទី២២ ខែកក្កដា។
- ឯកសារទាក់ទង
- ចំណងជើង & មូលបទ
- ការបោះឆ្នោត សិទិ្ធបញ្ចេញមតិ និងចូលរួម អំពើនៅទីលានប្រជាធិបតេយ្យ ២០១៤
