សកម្មជនព្រៃឈើ និងអតីតក្រុមប្រឹក្សាឃុំនៅខេត្តកោះកុង ត្រូវបានផ្តន្ទាទោស ប៉ុន្តែទោសត្រូវព្យួរ
ចេញផ្សាយ ថ្ងៃទី៣ ខែមីនា ឆ្នាំ២០១៦
សកម្មជនព្រៃឈើ លោក វ៉ែន វ៉ន (លោកក៏ជាក្រុមប្រឹក្សាឃុំជាប់ឆ្នោតមុនពេលលោកត្រូវបានគេចាប់ខ្លួនផងដែរ) ត្រូវបានដោះលែងពីពន្ធនាគារនៅរសៀលថ្ងៃនេះ បន្ទាប់ពីសាលាដំបូងខេត្តកោះកុង បានផ្តន្ទាទោសលោកឲ្យជាប់ពន្ធនាគាររយៈពេលមួយឆ្នាំ ដោយព្យួរទោសរយៈពេលប្រាំពីរខែ។ លោក ត្រូវបានតុលាការផ្តន្ទាទោសកាលពីព្រឹកមិញដោយរំលោភនឹងមាត្រា ៩៨ នៃច្បាប់ស្តីពីព្រៃឈើ។
លោក វ៉ែន វ៉ន គឺជាអ្នកឈរនៅជួរមុខនៅក្នុងយុទ្ធនាការមួយដើម្បីបញ្ឈប់ការអភិវឌ្ឍដ៏ចម្រូងចម្រាសនៃទំនប់វារីអគ្គីសនីរបស់ក្រុមហ៊ុនចិន ស៊ីណូហាយដ្រូ ដែលមានដៃគូជាមួយសមាជិកព្រឹទ្ធសភាមកពីគណបក្សកាន់អំណាច លោក ឡៅ ម៉េងឃីន នៃក្រុមហ៊ុនភាពីម៉ិច។ លោក ត្រូវបានគេចាប់ខ្លួន និងចោទប្រកាន់កាលពីថ្ងៃទី២៧ ខែតុលា ឆ្នាំ២០១៥ បន្ទាប់ពីលោកបានគាំទ្រការសាងសង់កន្លែងប្រជុំថ្នាក់ឃុំតូចមួយដែលត្រូវបានសាងសង់ដោយសហគមន៍នៅតំបន់អារ៉ែង។
សកម្មជនបីនាក់មកពីអង្គការបរិស្ថាន មាតាធម្មជាតិ ដែលសកម្មក្នុងការតវ៉ាជំទាស់នឹងទំនប់វារីអគ្គីសនី ក៏ត្រូវបានគេឃុំខ្លួនចាប់តាំងពីថ្ងៃទី១៧ ខែសីហា ដោយសារតែតួនាទីរបស់អ្នកទាំងនោះនៅក្នុងយុទ្ធនាការជាបន្តបន្ទាប់ដើម្បីបញ្ឈប់ការបូមខ្សាច់ខុសច្បាប់នៅក្នុងខេត្តកោះកុង។
- ឯកសារទាក់ទង
- ចំណងជើង & មូលបទ
- សិទ្ធិដីធ្លី មាតាធម្មជាតិ
