សាលាដំបូងរាជធានីភ្នំពេញពិចារណាលើការឃុំខ្លួនអតីតអ្នកសារព័ត៌មានវិទ្យុអាស៊ីសេរី
ចេញផ្សាយ ថ្ងៃទី១៦ ខែឧសភា ឆ្នាំ២០១៨
នាព្រឹកនេះ អតីតអ្នកសារព័ត៌មានវិទ្យុអាស៊ីសេរីពីរនាក់ដែលរងការចោទប្រកាន់ពីបទចារកម្ម ត្រូវបាននាំខ្លួនមកសាលាដំបូងរាជធានីភ្នំពេញ ដើម្បីធ្វើសេចក្ដីសម្រេចថា គួរបន្តឃុំខ្លួន ឬត្រូវដោះលែងអ្នកទាំងពីរ។
យោងតាមច្បាប់នៃព្រះរាជាណាចក្រកម្ពុជា ជនសង្ស័យអាចត្រូវបានឃុំខ្លួនបណ្ដោះអាសន្នរង់ចាំសវនាការត្រឹមតែរយៈពេល៦ខែប៉ុណ្ណោះ លុះត្រាតែចៅក្រមរកឃើញថា ការបន្តឃុំខ្លួនជនសង្ស័យគឺមានភាពចាំបាច់ សម្រាប់ដំណើរការស៊ើបអង្កេត។ មិនមានភ័ស្ដុតាងគួរឱ្យជឿទុកចិត្តណាមួយ ត្រូវបានបង្ហាញជាសាធារណៈនៅឡើយទេ។
អំឡុងពេលសវនាការក្នុងខែមីនា ប្រធានក្រុមប្រឹក្សាជំនុំជម្រះ លោកចៅក្រម ឃឹម ប៉ុន បានមានប្រសាសន៍ថា រឿងក្ដីនេះស្ថិតក្នុងដំណាក់កាលស៊ើបអង្កេតនៅឡើយ ហើយការដោះលែងអ្នកទាំងពីរអាចនាំឱ្យមាន “គ្រោះថ្នាក់ធ្ងន់ធ្ងរ”។
លោក យាង សុធារិន និងលោក អ៊ួន ឈិន ធ្លាប់បានបម្រើការងារឲ្យវិទ្យុអាស៊ីសេរី រហូតដល់ស្ថាប័ននេះ សម្រេចចិត្តបិទការិយាល័យនៅរាជធានីភ្នំពេញ កាលពីថ្ងៃទី១២ ខែកញ្ញា ឆ្នាំ២០១៧ ដោយអះអាងថាបានរងការគាបសង្កត់ពីអាជ្ញាធររដ្ឋ ហើយត្រូវបង្ខំចិត្តបិទការផ្សាយរបស់ខ្លួនតាមវិទ្យុនានា អំឡុងពេលមានការបង្រ្កាបជាបន្តបន្ទាប់មកលើប្រព័ន្ធផ្សព្វផ្សាយដែលមានលក្ខណៈរិះគន់។
អ្នកទាំងពីរ ត្រូវបានអាជ្ញាធរចាប់ខ្លួនកាលពីថ្ងៃទី១៤ ខែវិច្ឆិកា ឆ្នាំ២០១៧។ រយៈពេលត្រឹមតែ៤ថ្ងៃបន្ទាប់ពីត្រូវបានចោទប្រកាន់ អ្នកទាំងពីរត្រូវបានបញ្ជូនទៅឃុំខ្លួនបណ្ដោះអាសន្នរង់ចាំសវនាការ នៅក្នុងមណ្ឌលអប់រំកែប្រែទី១ (ម.១) ដែលមានសភាពចង្អៀតខ្លាំង។ ក្រោយមក អ្នកទាំងពីរក៏ត្រូវបានចោទប្រកាន់ពី អំពើជួញដូរមនុស្សផងដែរ ទោះបីជាគ្មានការបង្ហាញភ័ស្ដុតាងក៏ដោយ។
អ្នកទាំងពីរ ត្រូវបានចោទប្រកាន់ដោយយោងតាមមាត្រា ៤៤៥ នៃក្រមព្រហ្មទណ្ឌ ពាក់ព័ន្ធនឹងការផ្តល់ព័ត៌មានដល់រដ្ឋ ឬភ្នាក់ងារបរទេស ដែលអាច “អន្តរាយដល់ការការពារជាតិ”។ អ្នកទាំងពីរ ប្រឈមនឹងការផ្ដន្ទាទោសដាក់ពន្ធនាគារពី ៧ ឆ្នាំ ដល់១៥ ឆ្នាំ។
ចៅក្រមស៊ើបសួរ លោក ពេជ្រ វិជ្ជាធម៌ នឹងប្រកាសសេចក្តីសម្រេច នៅថ្ងៃទី១៨ ខែឧសភា ឆ្នាំ២០១៨ វេលាម៉ោង៨ព្រឹក។
- ឯកសារទាក់ទង
- ចំណងជើង & មូលបទ
- វាយប្រហារលើអ្នកសារព័ត៌មាន និងបញ្ហាប្រព័ន្ធផ្សព្វផ្សាយ សិទិ្ធបញ្ចេញមតិ និងចូលរួម
